തിരുവനന്തപുരം: സര്‍ക്കാര്‍ നടത്തുന്ന ഓണം വാരാഘോഷ പരിപാടിയിലേക്ക് ഗവര്‍ണറെ ക്ഷണിച്ച് മന്ത്രിമാര്‍. സര്‍ക്കാറിന് വേണ്ടി മന്ത്രിമാരായ പി എ മുഹമ്മദ് റിയാസും വി ശിവന്‍കുട്ടിയും ഗവര്‍ണറെ രാജ്ഭവനിലെത്തി ക്ഷണിക്കുകയും ഓണക്കോടി കൈമാറുകയും ചെയ്തു. ഇതോടെ പരിപാടിയില്‍ പങ്കെടുക്കാമെന്ന് ഗവര്‍ണര്‍ രാജേന്ദ്ര ആര്‍ലേക്കര്‍ സമ്മതിക്കുകയും ചെയ്തിട്ടുണ്ട്.
സര്‍ക്കാര്‍-രാജ്ഭവന്‍ ഏറ്റുമുട്ടല്‍ തുടരുന്നതിനിടെ ഓണം വാരാഘോഷത്തിന് ഗവര്‍ണറെ ക്ഷണിക്കാത്തത് സംബന്ധിച്ച് വിവാദം ഉയര്‍ന്നിരുന്നു. പിന്നാലെയാണ് മന്ത്രിമാരെത്തി ഗവര്‍ണറെ ക്ഷണിച്ചത്. ഇതോടെയാണ് ഗവര്‍ണര്‍ പരിപാടിയില്‍ പങ്കെടുക്കുമെന്ന് അറിയിച്ചത്. ഗവര്‍ണര്‍ പരിപാടിയില്‍ പങ്കെടുത്ത് ഓണം ഘോഷയാത്രയുടെ ഫ്ലാഗ് ഓഫ് നിര്‍വഹിക്കുമെന്ന് അറിയിച്ചതായും മന്ത്രി പി എ മുഹമ്മദ് റിയാസ് പറഞ്ഞു.
നാളെ മുതല്‍ ഈ മാസം ഒമ്പത് വരെയാണ് ഓണം വാരാഘോഷം. നാളെ വൈകുന്നേരം മുഖ്യമന്ത്രി പിണറായി വിജയനാണ് ആഘോഷ ങ്ങള്‍ക്ക് തിരിതെളിക്കുക. സംവിധായകനും നടനുമായ ബേസില്‍ ജോസഫ്, തമിഴ് നടന്‍ ജയം രവി എന്നിവര്‍ മുഖ്യാതിഥികളായിരിക്കും. മൂന്ന് വേദികളിലായി നടക്കുന്ന ആഘോഷപരിപാടികളില്‍ ആയിരത്തോളം പരമ്പരാഗത കലാകാരന്മാര്‍ അണിനിരക്കും.
