കോഴിക്കോട്: വീടിനുസമീപത്തെ പരസ്യ മദ്യപാനം ചോദ്യംചെയ്തതിന് ഗൃഹനാഥനെയും ഭാര്യയേയും പെണ്‍മക്കളെയും യുവാക്കള്‍ വീട്ടില്‍ക്കയറി ആക്രമിച്ചതായി പരാതി. കൊയിലാണ്ടി പന്തലായനി സ്വദേശി ശ്രീവല്‍സം വീട്ടില്‍ ഉണ്ണിക്കൃഷ്ണനും കുടുംബത്തിനും നേരെയാണ് ആക്രമണം ഉണ്ടായത്. അക്രമത്തിന്റെ ദൃശ്യങ്ങള്‍ പുറത്തുവന്നു. പരുക്കേറ്റ കുടുംബം കൊയിലാണ്ടി ആശുപത്രിയില്‍ ചികിത്സ തേടി.
ഞായറാഴ്ച ഉച്ചയ്ക്ക് രണ്ടുമണിയോടെയാണു സംഭവം. വീടിനുസമീപത്തായി തകര്‍ന്നു കിടക്കുന്ന കെട്ടിടത്തില്‍ സ്ഥിരമായി മദ്യപാനവും ലഹരി ഉപയോഗവും നടന്നിരുന്നതായി ഉണ്ണിക്കൃഷ്ണന്‍ പറയുന്നു. ഇത് ചോദ്യം ചെയ്ത ഉണ്ണിക്കൃഷ്ണനെ യുവാക്കള്‍ ആക്രമിക്കുകയായിരുന്നു,
ഇതോടെ ഉണ്ണിക്കൃഷ്ണന്‍ വീട്ടിലേക്ക് മടങ്ങി. ഉച്ചയ്ക്ക് കുടുംബത്തിനൊപ്പം ആഹാരം കഴിക്കുന്ന സമയത്ത് മൂന്നംഗസംഘം വീണ്ടുമെത്തി വീട്ടില്‍ക്കയറി ഇദ്ദേഹത്തെ തല്ലുകയായിരുന്നു. ഉണ്ണിക്കൃഷ്ണനെ ഉപദ്രവിക്കുന്നത് തടയാന്‍ ശ്രമിച്ചപ്പോഴാണ് ഭാര്യക്കും മക്കള്‍ക്കും മര്‍ദനമേറ്റത്.
അക്രമികള്‍ കുടുംബത്തോട് അസഭ്യം പറയുന്നതും ഉണ്ണിക്കൃഷ്ണനെയും ഭാര്യേയും മക്കളേയും ഉപദ്രവിക്കുന്നതും ദൃശ്യങ്ങളില്‍ വ്യക്തമാണ്. ഉണ്ണിക്കൃഷ്ണന്റെ ഭാര്യയേയും മക്കളേയും വടി ഉപയോഗിച്ച് തല്ലിയതായും വീടിന്റെ ജനല്‍ ചില്ലുകളും ഉപകരണങ്ങളും തകര്‍ത്തതായും പരാതിയില്‍ പറയുന്നു. ഉണ്ണിക്കൃഷ്ണന്റെ പരാതിയിൽ അന്വേഷണം ആരംഭിച്ചതായി കൊയിലാണ്ടി പോലീസ് അറിയിച്ചു.
Leave a Comment