തിരുവനന്തപുരം: നരുവാമൂട് മൊട്ടമൂട്ടിൽ വീട്ടമ്മയെ ട്രെയിൻ തട്ടി മരിച്ച നിലയിൽ കണ്ടെത്തി. മൊട്ടമൂട് വള്ളോട്ടുകോണം പുത്തൻവീട്ടിൽ മധുവിന്റെ ഭാര്യ മിനി (49) ആണ് മരിച്ചത്. തിരുവനന്തപുരം–കന്യാകുമാരി റെയിൽപാതയിൽ ഇന്ന് ഉച്ചയോടെയായിരുന്നു സംഭവം.
തിരുനെൽവേലിയിൽനിന്ന് കൊല്ലത്തേക്ക് വരികയായിരുന്ന ചരക്ക് തീവണ്ടിയാണ് മിനിയെ തട്ടിയത്. തൊഴിലുറപ്പ് തൊഴിലാളിയായിരുന്നു മിനി. ഒന്നര വർഷം മുമ്പ് മിനിയുടെ മൂത്ത മകൻ ആഴിമലയിലെ പാറയിൽനിന്ന് കാൽ വഴുതി കടലിൽ വീണ് മരിച്ചിരുന്നു.
മിനിയുടേത് ആത്മഹത്യയാണെന്നാണ് പ്രാഥമിക നിഗമനം. സംഭവത്തിൽ നരുവാമൂട് പൊലീസ് കേസെടുത്ത് അന്വേഷണം ആരംഭിച്ചു. മരണത്തിലേക്ക് നയിച്ച സാഹചര്യങ്ങൾ സംബന്ധിച്ച് കൂടുതൽ വിവരങ്ങൾ ലഭ്യമായിട്ടില്ല.
