ന്യൂഡൽഹി: ഡൽഹിയിലെ സമയ്പുർ ബദ്ലിയിൽ യുവതിയും മൂന്ന് പെൺമക്കളും കൊല്ലപ്പെട്ട നിലയിൽ. യുവതിയുടെ ഭർത്താവാണ് കൊലപാതകം നടത്തിയതെന്നാണ് പൊലീസ് സംശയിക്കുന്നത്. ഔട്ടർ നോർത്ത് ഡൽഹിയിലെ എസ്പി ബദ്‌ലി പൊലീസ് സ്റ്റേഷൻ പരിധിയിൽ ചന്ദൻ പാർക്ക് പ്രദേശത്ത് ചൊവ്വാഴ്ചയാണ് സംഭവം.
ഇവിടെ താമസിക്കുന്ന അനിതയും ഏഴും, അഞ്ചും, മൂന്നും വയസുള്ള മൂന്ന് പ്രായപൂർത്തിയാകാത്ത പെൺമക്കളെയും കഴുത്തറുത്ത് കൊലപ്പെടുത്തിയ നിലയിൽ കണ്ടെത്തുകയായിരുന്നു. കൊലയ്ക്ക് ശേഷം ഇയാൾ സ്ഥലത്തുനിന്ന് ഓടി രക്ഷപ്പെട്ടതായാണ് പൊലീസ് പറയുന്നത്.
വീടിന്റെ താഴത്തെ നിലയിലെ ഒരു മുറിയിലായിരുന്നു മൃതദേഹം. ബീഹാറിലെ പട്‌ന ജില്ലയിൽ നിന്നുള്ളവരാണ് ഈ കുടുംബം. യുവതിയുടെ ഭർത്താവ് മുഞ്ചൻ കെവാട്ടിനായുള്ള അന്വേഷണം ഊർജിതമാക്കി. ആസാദ്പൂർ മണ്ടിയിലെ ഒരു പച്ചക്കറി വിൽപ്പനക്കാരനാണ് മുഞ്ചൻ കെവാട്ട്. ക്രൈം സംഘവും ഫോറൻസിക് വിദഗ്ധരും സ്ഥലത്തെത്തി വിശദമായ പരിശോധന നടത്തി.
