ബാലരാമപുരം: രണ്ടുവയസ്സുള്ള കുട്ടിയുടെ ക്രൂരമായ കൊലപാതകത്തിന്റെ ഉത്തരം തേടിയുള്ള ചോദ്യം ചെയ്യൽ നീണ്ടത് പത്തു മണിക്കൂർ. വീട്ടുമുറ്റത്തെ കിണറ്റിൽ കുഞ്ഞിന്റെ മൃതദേഹം കണ്ടെത്തുമ്പോൾ തന്നെ പൊലീസ് ആദ്യ നിഗമനത്തിലെത്തിയിരുന്നു. വീട്ടിൽ ഉണ്ടായിരുന്ന അമ്മ ശ്രീതുവിനെയും സഹോദരൻ ഹരികുമാറിനെയും പിതാവ് ശ്രീജിത്തിനെയും അമ്മൂമ്മയെയും പൊലീസ് സ്റ്റേഷനിലേക്കെത്തിച്ചപ്പോഴും ഉറപ്പിച്ചു. ഈ നാലു പേരിലുണ്ട് പ്രതി. ഇതിനിടയിൽ പരിസരവാസികളിൽ നിന്നും ലഭിച്ച മൊഴിയും സ്പെഷ്യൽ ബ്രാഞ്ച് ശേഖരിച്ച വിവരങ്ങളും ചോദ്യം ചെയ്യുന്ന സംഘത്തിനു കൈമാറിയിരുന്നു. നാലു പേരെയും മാറ്റിയിരുത്തി ചോദ്യം ചെയ്തപ്പോൾ ആദ്യത്തെ മണിക്കൂറിൽ തന്നെ ഒരു കാര്യം ബോധ്യമായി.
കൊലപാതകത്തിൽ അച്ഛൻ ശ്രീജിത്തിനും അമ്മൂമ്മയ്ക്കും ബന്ധമില്ല. പിന്നീട് അവരോട് പൊലീസ് ചോദിച്ചത് മുഴുവൻ ശ്രീതുവിനെയും സഹോദരനെയും കുറിച്ചായിരുന്നു. അവരിൽനിന്നു കിട്ടിയ വിവരങ്ങളുമായി രണ്ട് ഡിവൈഎസ്പിമാരുടെ നേതൃത്വത്തിൽ രണ്ടുപേരെയും ഒറ്റയ്ക്ക് ഇരുത്തി ചോദ്യം ചെയ്തു.ആദ്യം ഹരികുമാർ പ്രകോപിതനായാണു പെരുമാറിയത്. ‘നിങ്ങൾ കണ്ടുപിടിക്കൂ, ഞങ്ങൾക്കെങ്ങനെ അറിയാൻ പറ്റും?’ എന്നൊക്കെ ചോദ്യങ്ങളുയർത്തി പ്രതിരോധിച്ചു. ആദ്യം സഹോദരനെ സംരക്ഷിക്കുന്ന ഉത്തരം നൽകിയ ശ്രീതു പിന്നീട് ചില കാര്യങ്ങൾ തുറന്നുപറഞ്ഞു.
സഹോദരിയോടുള്ള അടുപ്പക്കൂടുതൽ കൊണ്ടാണ് ഹരികുമാർ കുട്ടികളോട് ദേഷ്യത്തോടെ പെരുമാറുന്നതെന്നും നേരത്തെ ദേവേന്ദുവിനെ ദേഷ്യത്തിൽ എടുത്തെറിഞ്ഞ സംഭവമുണ്ടായെന്നും വരെ ശ്രീതു വിവരിച്ചു. ഈ വിവരങ്ങളുമായി മുന്നിലേക്കെത്തിയ പൊലീസ് സംഘത്തോട് അരമണിക്കൂറിനുള്ളിൽ ഹരികുമാർ കുറ്റം സമ്മതിച്ചു. ഒന്നര മണിയോടെ തന്നെ ഹരികുമാർ കുറ്റം സമ്മതിച്ചെങ്കിലും മൊഴിയുറപ്പിക്കുന്ന ചില വിവരങ്ങൾ കൂടി മറ്റു മൂന്നുപേരിൽ നിന്നു ശേഖരിച്ചു.
വാറുവിള വീട്ടിലേക്ക് മൂന്നു വർഷം മുൻപാണ് ശ്രീതുവും കുടുംബവും വാടകയ്ക്കെത്തിയത്. ഈ വീട്ടിൽ താമസിക്കുമ്പോഴാണ് ദേവേന്ദുവിനു ജന്മം നൽകിയത്. അന്നുമുതൽ അയൽക്കാരുടെ ഓമനയായിരുന്നു. ഇന്നലെ വെള്ളത്തുണിയിൽ പൊതിഞ്ഞ് കുഞ്ഞു ദേവേന്ദുവിനെ ആംബുലൻസിലേക്ക് എടുത്തുകൊണ്ടു പോകുമ്പോൾ കരയാത്തവരായി ആരുമുണ്ടായിരുന്നില്ല. സ്ത്രീകളിൽ ചിലർ അലമുറയിട്ടു. ദേവേന്ദു ജനിച്ചുകഴിഞ്ഞ് ശ്രീതു ജോലിക്കായി ദിവസങ്ങളോളം വീടു വിട്ടുനിന്നപ്പോൾ എടുത്തുനടന്നതും കൊഞ്ചിച്ചതുമെല്ലാം അമ്മൂമ്മ ശ്രീകലയും അയൽക്കാരായ സ്ത്രീകളുമായിരുന്നു. അവളുടെ കളിയും ചിരിയും നിറഞ്ഞതായിരുന്നു മതിൽ വ്യത്യാസം പോലുമില്ലാതെ ചേർന്നുകിടക്കുന്ന ഈ വീടുകളിലെ പകൽനേരങ്ങൾ. തന്നെ കാണുമ്പോൾ ‘ഷീജേ..’ എന്നു പേരെടുത്തു കൊഞ്ചിവിളിച്ചാണ് കുഞ്ഞ് സംസാരിച്ചിരുന്നതെന്നു തൊട്ടടുത്തവീട്ടിലെ ഷീജ ഓർമിച്ചു. ഷീജ തയ്യൽ ജോലി ചെയ്തിരുന്നതിനാൽ, കാലറ്റം നീളമുള്ള പാവാട തയ്ച്ചുനൽകണമെന്ന് ആവശ്യപ്പെട്ട് എപ്പോഴും വീട്ടിലേക്കും കയറിവന്നിരുന്നതും അവർ ഓർത്തു. എപ്പോഴും എടുത്തുനടന്നിരുന്ന സഹോദരിയും ഇൻക്വസ്റ്റ് നടപടികൾ നടക്കുന്ന നേരമത്രയും തൊട്ടടുത്ത വീട്ടിലിരുന്ന് ‘വാവയെ കാണണം’ എന്ന് ഏങ്ങലടിക്കുകയായിരുന്നു.
ശ്രീതുവിന്റെ കുടുംബത്തെ വലിയ സാമ്പത്തിക പ്രശ്നങ്ങൾ അലട്ടിയിരുന്നതായി പൊലീസും നാട്ടുകാരും പറയുന്നു. പണം കടം നൽകിയ പലരും വീട്ടിലെത്തി ബഹളമുണ്ടാക്കിയതിനു നാട്ടുകാരും സാക്ഷികളാണ്. സ്വന്തം വീട് തകർന്നു തുടങ്ങിയതിനാൽ കോട്ടുകാൽകോണത്ത് വാടക വീട്ടിലാണ് ഇവർ താമസിച്ചിരുന്നത്.വീട്ടിൽ സൂക്ഷിച്ചിരുന്ന 30 ലക്ഷം രൂപ കാണാനില്ലെന്ന പരാതിയുമായി ശ്രീതു കഴിഞ്ഞ ദിവസം രാത്രി ബാലരാമപുരം പൊലീസ് സ്റ്റേഷനിൽ എത്തിയിരുന്നു. സംഭവത്തിൽ ദുരൂഹത സംശയിച്ച പൊലീസ് തെളിവുകളുമായി ഹാജരാകാൻ നിർദേശിച്ചു. തുടർന്ന് തിരിച്ചെത്തിയ ഇവർ ദേവേന്ദു കൊല്ലപ്പെടുന്നതിനു തലേന്ന് പരാതി പിൻവലിച്ചു. മകൾക്ക് വീടിനു മുന്നിൽവച്ച് അപകടം പറ്റിയെന്നും മെഡിക്കൽ കോളജ് ആശുപത്രിയിൽ ചികിത്സയിലാണെന്നും പറഞ്ഞ് ശ്രീതു ചിലരിൽ നിന്നു പണപ്പിരിവു നടത്തിയെന്നും നാട്ടുകാർ ആരോപിക്കുന്നു.
Balaramapuram murder investigation reveals uncle’s confession after a ten-hour interrogation. The police investigation focused on the family, leading to the confession of the child’s uncle, Harikumar, based on statements from the family and witnesses.
Thiruvananthapuram News Kerala News Crime Kerala Murder
