ഒടുവിൽ ആ കാത്തിരിപ്പിന് വിരാമമായി. തിരഞ്ഞെടുപ്പ് വിജയത്തിന് പിന്നാലെ ദിവസങ്ങളായി നീണ്ട രാഷ്ട്രീയ ചർച്ചകൾക്കും പാർട്ടിക്കുള്ളിലെ നീക്കങ്ങൾക്കും ഒടുവിൽ കോൺഗ്രസ് നേതൃത്വം തീരുമാനത്തിലെത്തി — വി.ഡി. സതീശൻ കേരളത്തിന്റെ പുതിയ മുഖ്യമന്ത്രി. നിയമസഭയിൽ പ്രതിപക്ഷത്തിന്റെ ഏറ്റവും ശക്തമായ ശബ്ദമായി മാറിയ നേതാവ് ഇനി ഭരണത്തിന്റെ അമരത്തേക്ക് എത്തുകയാണ്. വിദ്യാർഥി രാഷ്ട്രീയത്തിൽ നിന്ന് ആരംഭിച്ച് ആറുതവണ തുടർച്ചയായി പറവൂരിന്റെ വിശ്വാസം നേടിയ സതീശൻ, 2026ലെ യു.ഡി.എഫിന്റെ ചരിത്രവിജയത്തിന്റെ മുഖമായി മാറി. തിരഞ്ഞെടുപ്പിലെ സെഞ്ചുറി ജയത്തോടെ സതീശന്റെ ജനപിന്തുണ വർദ്ധിച്ചു. ആ ശക്തമായ ജനവികാരം തന്നെയാണ് അദ്ദേഹത്തിന് മുഖ്യമന്ത്രിക്കസേര നേടി കൊടുത്തതും.
1964 മെയ് 31ന് എറണാകുളം നെട്ടൂരിലെ ഒരു സാധാരണ വീട്ടിലാണ് സതീശന്റെ ജനനം. കെ. ദാമോദര മേനോന്റെയും വി. വിലാസിനി അമ്മയുടെയും മകനായ സതീശൻ പിന്നീട് കേരള രാഷ്ട്രീയത്തിൽ “വി.ഡി.” എന്ന രണ്ടക്ഷരത്തിൽ അറിയപ്പെടുന്ന ശക്തമായ സാന്നിധ്യമായി മാറി — വി.ഡി. സതീശൻ.
2026-ൽ കേരളത്തിന്റെ പുതിയ മുഖ്യമന്ത്രിയായി സത്യപ്രതിജ്ഞ ചെയ്യാൻ ഒരുങ്ങുന്ന സതീശന്റെ രാഷ്ട്രീയയാത്ര ഒരു ദിവസം കൊണ്ടുണ്ടായ അത്ഭുതമല്ല. തോൽവിയും വിമർശനങ്ങളും കാത്തിരിപ്പും കടന്നുപോയ ദീർഘമായ പോരാട്ടത്തിന്റെ കഥയാണ് അത്.
പനങ്ങാട് ഹൈസ്കൂളിലായിരുന്നു സ്കൂൾ പഠനം. തുടർന്ന് തേവര സേക്രഡ് ഹാർട്ട് കോളജിൽ ബിരുദം. സമൂഹത്തെ കൂടുതൽ അടുത്തറിയണമെന്ന ആഗ്രഹം അദ്ദേഹത്തെ രാജഗിരി കോളജ് ഓഫ് സോഷ്യൽ സയൻസസിൽ സോഷ്യൽ വർക്കിൽ ബിരുദാനന്തര ബിരുദത്തിലേക്ക് എത്തിച്ചു. അതിന് ശേഷം നിയമപഠനം — കേരള ലോ അക്കാദമിയിൽ എൽഎൽബി, തിരുവനന്തപുരം ഗവൺമെന്റ് ലോ കോളജിൽ എൽഎൽഎം. പിന്നീട് ഏകദേശം പത്ത് വർഷത്തോളം കേരള ഹൈക്കോടതിയിൽ അഭിഭാഷകനായി പ്രവർത്തിച്ചു.
പക്ഷേ കോടതി മുറികളിൽ വാദം ജയിക്കുന്നത് മാത്രം അദ്ദേഹത്തെ തൃപ്തിപ്പെടുത്തിയില്ല. ജനങ്ങളുടെ ഇടയിലായിരുന്നു അദ്ദേഹത്തിന്റെ യഥാർത്ഥ വേദി.
1986-87 കാലത്ത് മഹാത്മാഗാന്ധി സർവകലാശാല യൂണിയൻ ചെയർമാനായിരുന്ന സതീശൻ വിദ്യാർഥി രാഷ്ട്രീയത്തിലൂടെയാണ് പൊതുജീവിതത്തിൽ ശ്രദ്ധിക്കപ്പെടുന്നത്. എൻഎസ്‌യുഐയുടെ സെക്രട്ടറിയായും പ്രവർത്തിച്ചു. കോൺഗ്രസിന്റെ യുവമുഖങ്ങളിൽ ശ്രദ്ധേയനായെങ്കിലും രാഷ്ട്രീയത്തിലെ തുടക്കം അത്ര സുഖകരമായിരുന്നില്ല.
1996-ൽ കമ്മ്യൂണിസ്റ്റ് ശക്തികേന്ദ്രമായ പറവൂരിൽ നിന്ന് മത്സരിച്ചപ്പോൾ സി.പി.ഐയുടെ പി. രാജുവിനോട് പരാജയം. പലരും അത് രാഷ്ട്രീയജീവിതത്തിന്റെ അവസാനമെന്നു വിലയിരുത്തി. എന്നാൽ ആ തോൽവി സതീശനെ പിന്നോട്ടടിപ്പിച്ചില്ല. അഞ്ച് വർഷത്തിന് ശേഷം, 2001-ൽ അതേ പറവൂരിൽ നിന്ന് വിജയിച്ച് ആദ്യമായി നിയമസഭയിലെത്തി. അന്നുമുതൽ പറവൂർ അദ്ദേഹത്തിന്റെ രാഷ്ട്രീയ കോട്ടയായി.
2006-ൽ കെ.എം. ദിനകരനെ പരാജയപ്പെടുത്തി വീണ്ടും വിജയം.
2011-ൽ പന്ന്യൻ രവീന്ദ്രനെ 11,349 വോട്ടുകൾക്ക് തോൽപ്പിച്ച് ഹാട്രിക്.
2016-ൽ ശാരദ മോഹനെ 20,634 വോട്ടുകൾക്ക് പരാജയപ്പെടുത്തി നാലാം ജയം.
2021-ൽ എം.ടി. നിക്സണെ 22,000-ത്തിലധികം വോട്ടുകൾക്ക് തോൽപ്പിച്ച് അഞ്ചാം തവണയും നിയമസഭയിലേക്ക്.
ഈ കാലയളവിൽ നിയമസഭയിൽ അദ്ദേഹത്തിന്റെ പ്രസംഗങ്ങൾ വലിയ ചർച്ചയായി. സർക്കാരിനെ അക്കമിട്ട് ചോദ്യം ചെയ്യുന്ന നേതാവ്. സാമ്പത്തിക വിഷയങ്ങളിൽ കടുപ്പമുള്ള വിമർശകൻ. പ്രത്യേകിച്ച് മുൻ ധനമന്ത്രി ടി.എം. തോമസ് ഐസക്കുമായുള്ള വാദപ്രതിവാദങ്ങൾ പലപ്പോഴും നിയമസഭയുടെ ഹൈലൈറ്റായി മാറി.
2021 മെയ് 22-നാണ് സതീശന്റെ രാഷ്ട്രീയജീവിതത്തിലെ വലിയ വഴിത്തിരിവ് ഉണ്ടായത്. രമേശ് ചെന്നിത്തലയ്ക്ക് ശേഷം പ്രതിപക്ഷ നേതാവായി കോൺഗ്രസ് ഹൈക്കമാൻഡ് വി.ഡി. സതീശനെ പ്രഖ്യാപിച്ചു. അതോടെ കേരളത്തിലെ കോൺഗ്രസ് രാഷ്ട്രീയത്തിൽ തലമുറമാറ്റം ഔദ്യോഗികമായി തുടങ്ങി.
പ്രതിപക്ഷ നേതാവെന്ന നിലയിൽ അദ്ദേഹം സ്വീകരിച്ച ആക്രമണാത്മക ശൈലി വേഗത്തിൽ ശ്രദ്ധ നേടി. നിയമസഭയ്ക്കകത്തും പുറത്തും സർക്കാരിനെതിരെ ശക്തമായ നിലപാട്, സാമൂഹ്യമാധ്യമങ്ങളിലെ സാന്നിധ്യം, യുവാക്കളുമായുള്ള ബന്ധം — എല്ലാം ചേർന്ന് വി.ഡി. സതീശനെ യു.ഡി.എഫിന്റെ ഏറ്റവും ശക്തമായ മുഖമാക്കി മാറ്റി.
2026-കേരള രാഷ്ട്രീയത്തിന്റെ ചരിത്രം തിരുത്തിയ തിരഞ്ഞെടുപ്പ്.
പത്ത് വർഷമായി അധികാരത്തിലിരുന്ന എൽ.ഡി.എഫിനെ നേരിട്ട് വെല്ലുവിളിച്ച യു.ഡി.എഫിനെ നയിച്ചത് വി.ഡി. സതീശനായിരുന്നു. തിരഞ്ഞെടുപ്പ് ഫലം പുറത്തുവന്നപ്പോൾ കേരളം കണ്ടത് വമ്പിച്ച രാഷ്ട്രീയ അട്ടിമറി. 140 അംഗ നിയമസഭയിൽ 102 സീറ്റുകൾ നേടി യു.ഡി.എഫ് അധികാരത്തിലേക്ക് കുതിച്ചു. കേരള രാഷ്ട്രീയത്തിൽ കോൺഗ്രസിന്റെ തിരിച്ചുവരവിന്റെ പ്രധാന ശിൽപ്പിയായി രാഷ്ട്രീയ നിരീക്ഷകർ ഒരേയൊരു പേരാണ് ഉയർത്തിക്കാട്ടിയത് — വി.ഡി. സതീശൻ.
അതേസമയം സ്വന്തം മണ്ഡലമായ പറവൂരിലും അദ്ദേഹം ആറാം തവണ വിജയം ആവർത്തിച്ചു. എൽ.ഡി.എഫ് സ്ഥാനാർത്ഥി ഇ.ടി. ടൈസണെതിരെ 20,600 വോട്ടുകളുടെ ഭൂരിപക്ഷം. ആകെ 78,658 വോട്ടുകൾ. ഒരിക്കൽ തോറ്റ അതേ മണ്ഡലത്തിൽ നിന്ന് തുടർച്ചയായ ആറാം ജയം.
1964-ൽ നെട്ടൂരിൽ ജനിച്ച ആ വിദ്യാർഥി നേതാവ് ഇന്ന് കേരളത്തിന്റെ മുഖ്യമന്ത്രിപദത്തിലേക്ക് ഉയരുമ്പോൾ, അത് ഒരു രാഷ്ട്രീയ നേതാവിന്റെ വ്യക്തിഗത വിജയം മാത്രമല്ല; തോൽവിയിൽ നിന്ന് ഉയർന്നുവരാനുള്ള രാഷ്ട്രീയ മനോബലത്തിന്റെ കഥ കൂടിയാണ്.
വി.ഡി. സതീശന്റെ രാഷ്ട്രീയയാത്ര ഇപ്പോൾ പുതിയ അധ്യായത്തിലേക്ക് കടക്കുകയാണ്. പ്രതിപക്ഷത്തിന്റെ തീപ്പൊരി ശബ്ദത്തിൽ നിന്ന് ഭരണത്തിന്റെ മുഖമായി മാറുന്ന നിമിഷത്തിലേക്ക്.
