മലപ്പുറം: ദേശീയപാത 66 വട്ടപ്പാറ വയഡക്റ്റ് ബൈപ്പാസിൽ ലോറികൾക്കിടയിൽപെട്ട് സ്കൂട്ടർ യാത്രികരായ ദമ്പതികൾ മരിച്ചതിന്റെ ഞെട്ടിക്കുന്ന സിസിടിവി ദൃശ്യങ്ങൾ പുറത്ത്. കുറ്റിപ്പുറം പേരശന്നൂർ ആന്ത്ര വളപ്പിൽ വീട്ടിൽ അഫ്‌സൽ (37), ഭാര്യ സാബിറ എന്നിവരാണ് വെള്ളിയാഴ്ച രാത്രി 11.30ഓടെയുണ്ടായ അപകടത്തിൽ മരിച്ചത്. ഇതിന്റെ സിസിടിവി ദൃശ്യങ്ങൾ പുറത്തുവന്നത്.
കോട്ടക്കലിലെ ഒരു സ്വകാര്യ ആശുപത്രിയിൽ പനി ബാധിച്ചു ചികിത്സയിൽ കഴിയുന്ന ബന്ധുവിനെ സന്ദർശിച്ച ശേഷം വീട്ടിലേക്ക് മടങ്ങുകയായിരുന്നു അഫ്‌സലും സാബിറയും. കുറ്റിപ്പുറം ഭാഗത്തേക്ക് സഞ്ചരിക്കുകയായിരുന്ന സ്കൂട്ടർ. ഇവരുടെ വാഹനത്തിന്റെ തൊട്ടുമുന്നിൽ മറ്റൊരു ലോറിയും പോകുന്നുണ്ടായിരുന്നു.
വട്ടപ്പാറ വയഡക്റ്റിൽ ലോറിക്ക് പിറകിലായി ദമ്പതികൾ സഞ്ചരിക്കവേ പിന്നിൽനിന്നും അമിത വേഗതയിലെത്തിയ മറ്റൊരു ലോറി സ്കൂട്ടറടക്കം മുന്നിൽ പോയ ലോറിയിലേക്ക് ഇടിച്ചുകയറുകയായിരുന്നു. ഇരു ലോറികൾക്കുമിടയിൽ പെട്ട് ഞെരിഞ്ഞമർന്നായിരുന്നു ദമ്പതികളുടെ മരണം. അരമണിക്കൂറോളം മൃതദേഹങ്ങൾ സംഭവസ്ഥലത്ത് നിന്ന് മാറ്റാൻ കഴിയാത്ത വിധം ലോറിക്കിടയിൽ കുടുങ്ങിയിരുന്നു. സ്കൂട്ടർ പൂർണമായും തകർന്നു.
