തിരുവനന്തപുരം: ഞങ്ങളാണ് യഥാര്‍ത്ഥ പ്രതിപക്ഷം അത് സഭ തുടങ്ങുമ്പോള്‍ കാണാമെന്ന് ബിജെപി നേതാവ് വി മുരളീധരന്‍. കഴക്കൂട്ടം നിയോജക മണ്ഡലത്തില്‍ നിന്ന് ബിജെപി സ്ഥാനാര്‍ഥിയായി വിജയിച്ച വി മുരളീധരന്‍, സഭയില്‍ ഇന്ന് എംഎല്‍എയായി സത്യപ്രതിജ്ഞ ചെയ്യുന്നതിന് മുന്‍പ് മാധ്യമങ്ങളോട് പ്രതികരിക്കുകയായിരുന്നു. ‘ഞങ്ങള്‍ യഥാര്‍ഥ പ്രതിപക്ഷമാകും, ബാക്കിയുള്ളവര്‍ കപട പ്രതിപക്ഷമാണെന്നൊക്കെ സഭാ നടപടികള്‍ തുടങ്ങി കഴിയുമ്പോള്‍ എന്താണ് വരുന്നത് എന്ന് കാണാം.
ഇത്രയും നാളും ഇവര്‍ രണ്ടുപേരും അപ്പുറത്തും ഇപ്പുറത്തും ഇരുന്ന് സഹകരിക്കുകയായിരുന്നു. ഇനി ഏതായാലും നടക്കില്ല. ഞങ്ങള്‍ ഭാരതീയ ജനതാ പാര്‍ട്ടി നാടിന്റെ താത്പര്യം ഉയര്‍ത്തിപ്പിടിച്ച് പ്രവര്‍ത്തിക്കും. കേരളത്തിന്റെ വികസനത്തിന് വേണ്ടി പ്രവര്‍ത്തിക്കും’- വി മുരളീധരന്‍ പറഞ്ഞു.
തെരഞ്ഞെടുപ്പില്‍ എന്‍ഡിഎ മൂന്നിടത്താണ് വിജയിച്ചത്. കഴക്കൂട്ടത്തിന് പുറമേ ചാത്തനൂരിലും നേമത്തുമാണ് എന്‍ഡിഎ സ്ഥാനാര്‍ഥികള്‍ വിജയിച്ചത്. ചാത്തനൂരില്‍ ഗോപകുമാറും നേമത്ത് രാജീവ് ചന്ദ്രശേഖറുമാണ് വെന്നിക്കൊടി പാറിച്ചത്.
