മസ്കറ്റ്: ഒമാനിൽ വാഹനാപകടത്തിൽ രണ്ട് മരണം. നിസ്‌വ-മസ്കറ്റ് റോഡിലാണ് അപകടം ഉണ്ടായത്. ബിദിയ പാലത്തിനടിയിൽ ഉണ്ടായ പല വാഹനങ്ങൾ ഉൾപ്പെട്ട അപകടത്തിൽ രണ്ട് പ്രവാസികൾ മരിച്ചു. അപകടത്തിൽ നിരവധി പേർക്ക് പരിക്കേറ്റു.
സുൽത്താൻ തുവൈനി ബിൻ സഈദ് റോഡിലുണ്ടായ ഈ അപകടത്തിൽ രണ്ട് ട്രക്കുകൾ തമ്മിൽ ഇടിച്ചത് മൂലം, അതേ ലെയിനിൽ സഞ്ചരിച്ചുകൊണ്ടിരുന്ന അഞ്ച് വാഹനങ്ങൾ തമ്മിൽ കൂട്ടിയിടിക്കുകയായിരുന്നു. ഇതോടെ സ്ഥലത്ത് വലിയ ഗതാഗത കുരുക്ക് ഉണ്ടായി. റോയൽ ഒമാൻ പൊലീസ് നൽകിയ വിവരങ്ങൾ പ്രകാരം മരിച്ച രണ്ടുപേരും ഏഷ്യൻ സ്വദേശികളാണ്. പരിക്കേറ്റവർക്ക് വേണ്ട വൈദ്യ സഹായം നൽകുന്നുണ്ടെന്ന് അധികൃതർ അറിയിച്ചു.
അപകടത്തിന്‍റെ പശ്ചാത്തലത്തിൽ നിസ്‌വയിൽ നിന്ന് മസ്‌കറ്റിലേക്കുള്ള ഗതാഗതം താൽക്കാലികമായി തിരിച്ചു വിട്ടിട്ടുണ്ട്. രക്ഷാപ്രവർത്തന സംഘങ്ങൾ സ്ഥലത്ത് എത്തി അപകടവാഹനങ്ങൾ മാറ്റാനും സംഭവത്തിന്റെ കാരണം അന്വേഷിക്കാനും നടപചികൾ ആരംഭിച്ചു. അപകടത്തെ കുറിച്ചുള്ള കൂടുതൽ വിവരങ്ങൾ ലഭ്യമാകുന്നതിനനുസരിച്ച് പിന്നീട് അറിയിക്കുമെന്ന് അധികൃതർ പ്രസ്താവനയിൽ വ്യക്തമാക്കിയിട്ടുണ്ട്.
