തിരുവനന്തപുരം: വാഴിച്ചലിൽ വൻ കഞ്ചാവ് വേട്ട. ആന്ധ്രാപ്രദേശിൽ നിന്ന് തമിഴ്നാട് വഴി കടത്തിക്കൊണ്ടുവന്ന ഏകദേശം 90 കിലോ കഞ്ചാവ് തിരുവനന്തപുരം റൂറൽ പൊലീസ് പിടികൂടി. സംഭവത്തിൽ രണ്ടുപേരെ പൊലീസ് അറസ്റ്റ് ചെയ്തു. തിരുവനന്തപുരം റൂറൽ എസ്.പി. പ്രശാന്തൻ കാണി ഐപിഎസിന് ലഭിച്ച രഹസ്യവിവരത്തിന്റെ അടിസ്ഥാനത്തിലായിരുന്നു പരിശോധന.
ഒരാഴ്ചയോളം നീണ്ട രഹസ്യനീക്കത്തിനൊടുവിലാണ് വാഴിച്ചൽ ഇമ്മാനുവൽ കോളേജിന് സമീപത്തുനിന്ന് കഞ്ചാവ് ശേഖരം പിടികൂടിയത്. തമിഴ്നാട് രജിസ്ട്രേഷനിലുള്ള TN 09 AR 6156 വാഹനത്തിലാണ് കഞ്ചാവ് കടത്തിക്കൊണ്ടുവന്നത്. പൊലീസിന്റെ പരിശോധനയിൽ കാറിന്റെ ഡിക്കിയിൽ പ്രത്യേകം നിർമിച്ച രഹസ്യ അറയിൽ 2 കിലോ വീതമുള്ള 40 പാക്കറ്റ് കഞ്ചാവാണ് കണ്ടെത്തിയത്.
ഏകദേശം 90 കിലോയാണ് പിടികൂടിയ ലഹരിയുടെ ഭാരം. വാഹനത്തിലുണ്ടായിരുന്ന വെള്ളറട അഞ്ചുമരങ്കാല സ്വദേശി സുധീഷ്, പൂഴനാട് കുന്നനാട് സ്വദേശി അഖിൽ എന്നിവരെ പൊലീസ് അറസ്റ്റ് ചെയ്തിട്ടുണ്ട്. ആന്ധ്രയിൽ നിന്ന് കഞ്ചാവ് എത്തിച്ച് തമിഴ്നാട് വഴി കേരളത്തിലേക്ക് കടത്തിയ സംഘത്തെക്കുറിച്ചും വിതരണ ശൃംഖലയെക്കുറിച്ചും പൊലീസ് അന്വേഷണം ആരംഭിച്ചിട്ടുണ്ട്.
Related Post
