കോട്ടയം: ഒരേ പരീക്ഷയിൽ ഒരേ മാർക്കോടെ ഒന്നാം റാങ്ക് പങ്കുവച്ച് കോട്ടയത്തെ ഇരട്ട സഹോദരിമാരുടെ വിജയം. കോട്ടയം കാഞ്ഞിരപ്പള്ളി സ്വദേശികളായ ലിസ മറിയം ജോർജും ലിയ ട്രീസ ജോർജുമാണ് അപൂർവ നേട്ടം സ്വന്തമാക്കിയത്. മഹാത്മാഗാന്ധി സർവകലാശാലയിലെ ബിഎ ഇംഗ്ലീഷ് ലാഗ്വേജ് ആന്റ് ലിറ്ററേച്ച‌ർ ടു ടീച്ചിങ് കോഴ്സിലാണ് ഈ ഇരട്ട സഹോദരിമാർക്ക് ഒരേ മാർക്കോടെ ഒന്നാം റാങ്ക് പങ്കിട്ടത്. അതിലും രസം എന്താന്നുവച്ചാൽ പ്ലസ് ടുവിൽ ഇരുവർക്കും എ പ്ലസ് നഷ്ടമായതും ഒരേ വിഷയത്തിനു തന്നെ.
കാഞ്ഞിരപ്പള്ളി സെൻ്റ് ഡൊമിനിക്സ് കോളേജിലെ വിദ്യാർഥികളായ ഇരുവരും 8.43 പോയിൻ്റും എ ഗ്രേഡും നേടിയാണ് തങ്ങളുടെ ബിരുദം പൂർത്തിയാക്കിയത്. പത്താം ക്ലാസിൽ എല്ലാ വിഷയത്തിലും എ പ്ലസ് നേടിയ ഇവർ പ്ലസ് ടുവിൽ അഞ്ച് എ പ്ലസും ഒരു എ ഗ്രേഡും നേടി ഒരുമിച്ചാണ് വിജയിച്ചുകയറിയത്. പ്ലസ് ടുവിൽ ഒരേ വിഷയത്തിന് തന്നെയാണ് ഇരുവർക്കും എ പ്ലസ് നഷ്ടമായത്.
പൊടിമറ്റം വെട്ടിക്കൽ രാജു മാത്യുവിൻ്റെയും ഹയർ സെക്കൻഡറി അധ്യാപികയായ റീന രാജുവിൻ്റെയും മക്കളാണ് ലിസ മറിയം ജോർജും ലിയ ട്രീസ ജോർജും. ഒരുമിച്ച് സർക്കാർ ജോലി നേടണം എന്നാണ് ഇരുവരുടെയും ആഗ്രഹം. അതിന് വേണ്ടിയുള്ള തയ്യാറെടുപ്പുകളിലാണ് ഈ ഇരട്ടകൾ. ഇനിയങ്ങോട്ടുള്ള ജീവിതത്തിൽ ജോലിയും ഒരുമിച്ച് ലഭിക്കണമെന്നും ഇവർ പറയുന്നു.
