വാഷിങ്ടൺ: അമേരിക്ക നവംബറിൽ നടക്കുന്ന ഇടക്കാല കോൺഗ്രസ് തെരഞ്ഞെടുപ്പിന് മുമ്പ് ഇറാനെതിരെ ആക്രമണം നടത്തില്ലെന്ന പ്രഖ്യാപനവുമായി പ്രസിഡന്റ് ഡൊണാൾഡ് ട്രംപ്. ആറ് മാസമായി തുടരുന്ന യുദ്ധം അവസാനിപ്പിക്കുന്നതിനായി അമേരിക്കയും ഇറാനും തമ്മിൽ ഫലപ്രദമായ ചർച്ചകൾ നടക്കുകയാണെന്നും ട്രംപ് വ്യക്തമാക്കി.
“ഇസ്ലാമിക് റിപ്പബ്ലിക് ഓഫ് ഇറാനുമായി ഞങ്ങൾ ഫലപ്രദമായ ചർച്ചകളിലാണ്. നവംബർ 3ന് അമേരിക്കയിൽ നടക്കുന്ന ഇടക്കാല തെരഞ്ഞെടുപ്പിന് മുമ്പ് ഒരു സമയത്തും ഇറാനെതിരെ ആക്രമണം നടത്തില്ല,” ട്രംപ് ട്രൂത്ത് സോഷ്യലിലൂടെയാണ് അറിയിച്ചത്.
ഫെബ്രുവരിയിൽ അമേരിക്കയും ഇസ്രയേലും ഇറാനെതിരെ ആക്രമണം ആരംഭിച്ചതോടെയാണ് നിലവിലെ യുദ്ധം തുടങ്ങിയത്. സംഘർഷം ട്രംപിന്റെ ആഭ്യന്തര ജനപ്രീതിയെ പ്രതികൂലമായി ബാധിച്ചതായാണ് റിപ്പോർട്ട്. നവംബറിലെ തെരഞ്ഞെടുപ്പിൽ കോൺഗ്രസിലെ നേരിയ ഭൂരിപക്ഷം നിലനിർത്താൻ ശ്രമിക്കുന്ന റിപ്പബ്ലിക്കൻ പാർട്ടിക്കും യുദ്ധം വലിയ സമ്മർദമായി മാറിയിട്ടുണ്ട്.
Related Post
മാത്രമല്ല ഇറാനിലെ സ്ഥിതിഗതികൾ കൈകാര്യം ചെയ്യുന്നതിൽ ട്രംപിന്റെ നിലപാടിനെ ഏകദേശം 60 ശതമാനം അമേരിക്കക്കാരും അംഗീകരിക്കുന്നില്ലെന്ന് അടുത്തിടെ പുറത്തുവന്ന റോയിട്ടേഴ്സ്/ഇപ്സോസ് സർവേ വ്യക്തമാക്കുന്നു. റിപ്പബ്ലിക്കൻ പാർട്ടി അനുഭാവികളിൽ നാലിൽ ഒരാളും ട്രംപിന്റെ നടപടികളെ അംഗീകരിക്കുന്നില്ല. സംഘർഷത്തെ തുടർന്ന് പെട്രോൾ വില കുത്തനെ ഉയർന്നതും ജനങ്ങളുടെ അസംതൃപ്തിക്ക് കാരണമായിട്ടുണ്ട്. ജീവിതച്ചെലവാണ് നിലവിൽ വോട്ടർമാരുടെ പ്രധാന ആശങ്കകളിലൊന്ന്.
തെരഞ്ഞെടുപ്പിന് ശേഷം എണ്ണവില കുറയുമെന്ന് ട്രംപ് പലതവണ വ്യക്തമാക്കിയിട്ടുണ്ടെങ്കിലും യുദ്ധത്തിൽ നിന്ന് എങ്ങനെ പിന്മാറുമെന്നതിനെക്കുറിച്ച് വിശദമായ പദ്ധതി അദ്ദേഹം ഇതുവരെ പുറത്തുവിട്ടിട്ടില്ല. യുദ്ധം അവസാനിപ്പിക്കുകയും ആഗോള ഊർജവിതരണത്തിന് നിർണായകമായ ഹോർമുസ് കടലിടുക്ക് വീണ്ടും തുറക്കുകയും ചെയ്യുന്നതിനായി കഴിഞ്ഞ ഏതാനും ആഴ്ചകളായി ഇറാനും അമേരിക്കയും വിവിധ നിർദേശങ്ങൾ കൈമാറിയിരുന്നു. എന്നാൽ ടെഹ്റാൻ മുന്നോട്ടുവച്ച ഏറ്റവും പുതിയ നിർദേശം ട്രംപ് നിരസിച്ചു.
അതേസമയം, യുറേനിയം സമ്പുഷ്ടീകരണം ഉപേക്ഷിക്കാനോ രാജ്യത്തിന്റെ കൈവശമുള്ള യുറേനിയം ശേഖരം കൈമാറാനോ തയ്യാറല്ലെന്ന് ഇറാൻ ഔദ്യോഗിക മാധ്യമങ്ങൾ റിപ്പോർട്ട് ചെയ്തു. രാജ്യത്തെ ആണവോർജ സംഘടനാ മേധാവിയെ ഉദ്ധരിച്ചാണ് റിപ്പോർട്ട്. ഇറാൻ സമ്പുഷ്ടീകരണ ശേഷിയിൽ അർഥവത്തായ കുറവ് വരുത്തണമെന്നാണ് അമേരിക്കയുടെ ആവശ്യമെന്ന് യുഎസ് വൈസ് പ്രസിഡന്റ് ജെ.ഡി. വാൻസ് ഒക്ടോബർ 6ന് റോയിട്ടേഴ്സിന് നൽകിയ അഭിമുഖത്തിൽ പറഞ്ഞിരുന്നു.
ആണവായുധം വികസിപ്പിക്കാനാണ് ഇറാൻ ശ്രമിക്കുന്നതെന്ന് അമേരിക്കയും ഇസ്രയേലും പാശ്ചാത്യ സഖ്യകക്ഷികളും ദീർഘകാലമായി ആരോപിക്കുന്നുണ്ട്. എന്നാൽ ഇറാൻ ഈ ആരോപണം നിഷേധിക്കുകയും തങ്ങളുടെ ആണവപരിപാടി സമാധാനപരമായ ആവശ്യങ്ങൾക്കുള്ളതാണെന്ന് വ്യക്തമാക്കുകയും ചെയ്തിട്ടുണ്ട്.