ഹൂതികൾക്കെതിരെ പോരാടാൻ അമേരിക്കയുടെ സൈനിക സഹായം തേടി യെമൻ പ്രസിഡന്റ് റഷാദ് അൽ-അലിമി. ഞായറാഴ്ച നടന്ന ഫോൺ സംഭാഷണത്തിൽ അമേരിക്കൻ സൈനിക ഇടപെടലിന് പ്രസിഡന്റ് ഡൊണാൾഡ് ട്രംപ് നേരിട്ടുള്ള ഉറപ്പ് നൽകിയില്ലെന്നാണ് റിപ്പോർട്ടുകൾ. സൗദി പിന്തുണയുള്ള യെമൻ സർക്കാരിന് വാഷിങ്ടണിന്റെ പിന്തുണ ആവശ്യപ്പെട്ടാണ് അലിമി ട്രംപിനെ സമീപിച്ചത്.
ഇറാന്റെ പിന്തുണയുള്ള ഹൂതികൾ യെമന്റെ ചെങ്കടൽ തീരത്തെ നിർണായക മേഖലകൾ അതിവേഗം പിടിച്ചെടുത്തതോടെയാണ് സ്ഥിതിഗതികൾ കൂടുതൽ രൂക്ഷമായത്. തന്ത്രപ്രധാനമായ ബാബ് അൽ-മന്ദബ് കടലിടുക്കിന് ചുറ്റുമുള്ള പ്രദേശങ്ങളും ഹൂതികളുടെ നിയന്ത്രണത്തിലായിട്ടുണ്ട്. ഈ മേഖല ചെങ്കടലിനെയും ഏദൻ ഉൾക്കടലിനെയും ബന്ധിപ്പിക്കുന്ന പ്രധാന സമുദ്രമാർഗമായതിനാൽ ഇവിടെ ഉണ്ടാകുന്ന സംഘർഷം ആഗോള വ്യാപാരത്തെയും ബാധിക്കാനുള്ള സാധ്യതയുണ്ട്.
റോയിറ്റേഴ്സ് വൃത്തങ്ങൾ നൽകുന്ന റിപ്പോർട്ട് പ്രകാരം, ട്രംപ്-അലിമി ഫോൺ സംഭാഷണത്തിൽ ഹൂതികൾക്കെതിരെ സൈനിക സഹായം നൽകാമെന്ന നേരിട്ടുള്ള വാഗ്ദാനം അമേരിക്കൻ പ്രസിഡന്റ് നടത്തിയില്ല. അതേസമയം, ഒമാനിലെ അമേരിക്കൻ എംബസിയിൽ യുഎസ് ഉദ്യോഗസ്ഥർ ഹൂതി പ്രതിനിധികളുമായി കൂടിക്കാഴ്ച നടത്തിയതായും റിപ്പോർട്ടുണ്ട്. ദീർഘകാലമായി മേഖലയിൽ മധ്യസ്ഥനായി പ്രവർത്തിക്കുന്ന ഒമാന്റെ നേതൃത്വത്തിലാണ് കൂടിക്കാഴ്ച സംഘടിപ്പിച്ചതെന്നാണ് വിവരം. 2025ലെ വെടിനിർത്തൽ കരാറിനോടുള്ള പ്രതിബദ്ധത ഹൂതികൾ ആവർത്തിച്ചെന്നും ബാബ് അൽ-മന്ദബ് കടലിടുക്കിലൂടെ സഞ്ചരിക്കുന്ന വാണിജ്യ കപ്പലുകളെ ലക്ഷ്യമിടില്ലെന്ന് ഉറപ്പ് നൽകിയെന്നും റിപ്പോർട്ടുകളുണ്ട്. എന്നാൽ സൗദിയുമായി ബന്ധപ്പെട്ട കപ്പലുകൾക്ക് ഈ ഉറപ്പ് ബാധകമല്ലെന്നും റിപ്പോർട്ടിൽ പറയുന്നു.
Related Post
ഇറാനുമായുള്ള ഏകദേശം ഏഴ് മാസം നീണ്ടുനിൽക്കുന്ന സംഘർഷത്തിന്റെ പശ്ചാത്തലത്തിലാണ് യെമനിലെ പുതിയ സംഭവവികാസങ്ങൾ. ഹോർമുസ് കടലിടുക്ക് ഒഴിവാക്കി കപ്പൽഗതാഗതത്തിനായി ബാബ് അൽ-മന്ദബ് മറ്റൊരു പ്രധാന സമുദ്രമാർഗമായി മാറിയ സാഹചര്യത്തിൽ, ഹൂതികളുടെ നിയന്ത്രണത്തിലുള്ള മേഖലയിൽ അമേരിക്ക നേരിട്ട് സൈനിക നടപടി ആരംഭിക്കുന്നത് പ്രാദേശിക സഖ്യകക്ഷികൾക്കും ആഗോള വ്യാപാരത്തിനും വലിയ പ്രത്യാഘാതമുണ്ടാക്കുമെന്ന ആശങ്കയും നിലനിൽക്കുന്നു.
അതേസമയം ഹൂതികൾക്കെതിരെ ഞായറാഴ്ച വ്യോമാക്രമണം നടത്താൻ ട്രംപ് ഭരണകൂടം തയ്യാറെടുത്തിരുന്നെങ്കിലും അവസാന നിമിഷം ആക്രമണം മാറ്റിവച്ചതായി ന്യൂയോർക്ക് ടൈംസ് റിപ്പോർട്ട് ചെയ്തു. സൗദി കിരീടാവകാശിയുടെ പുതിയ അഭ്യർഥനകൾക്ക് പിന്നാലെയായിരുന്നു ആക്രമണത്തിന് തയ്യാറെടുപ്പുകൾ നടത്തിയതെന്നാണ് റിപ്പോർട്ട്.
ഓപ്പറേഷനെക്കുറിച്ച് വിവരമുണ്ടായിരുന്ന രണ്ട് പേരെ ഉദ്ധരിച്ച് റിപ്പോർട്ട് പറയുന്നത്, ഹൂതി കേന്ദ്രങ്ങൾ ആക്രമിക്കുന്നതിനുള്ള ലക്ഷ്യങ്ങളുടെ പട്ടിക സൈനിക കമാൻഡർമാർ അംഗീകരിച്ചിരുന്നുവെന്നാണ്. ആക്രമണത്തിനായി തെരഞ്ഞെടുത്ത അമേരിക്കൻ യുദ്ധവിമാനങ്ങളിലേക്ക് ബോംബുകൾ കയറ്റുന്നതിനുള്ള നടപടികളും ആരംഭിച്ചിരുന്നു. ആക്രമണ പരമ്പര ഉടൻ ആരംഭിക്കാനിരിക്കെയാണ് ട്രംപ് നടപടി പിന്മാറ്റുകയോ കുറഞ്ഞത് മാറ്റിവയ്ക്കുകയോ ചെയ്തതെന്നാണ് റിപ്പോർട്ട്.
തൊട്ടുമുൻപ് ദിവസം ഉപദേഷ്ടാക്കളുമായി കൂടിക്കാഴ്ച നടത്തിയ ട്രംപ് ആക്രമണത്തിന് അനുകൂലമല്ലെന്ന നിലപാട് വ്യക്തമാക്കിയിരുന്നതായും റിപ്പോർട്ടിലുണ്ട്. അതേസമയം ഹൂതികളും സൗദിയുടെ നേതൃത്വത്തിലുള്ള സഖ്യസേനയും തമ്മിലുള്ള പോരാട്ടം ഒരു ദശാബ്ദത്തിലേറെയായി തുടരുകയാണ്. ജൂലൈയിൽ ചെങ്കടലിലെ സൗദി കപ്പൽഗതാഗതത്തിന് ഉപരോധം പ്രഖ്യാപിച്ചതോടെയാണ് സംഘർഷം വീണ്ടും ശക്തമായത്. യെമന്റെ തുറമുഖങ്ങൾക്ക് സൗദി ഏർപ്പെടുത്തിയ ഉപരോധത്തിന് മറുപടിയായാണ് ഹൂതികൾ നടപടി പ്രഖ്യാപിച്ചതെന്നാണ് റിപ്പോർട്ടുകൾ.
ഇതിനിടെ സൗദി സേന യെമനിലെ പർവതപ്രദേശങ്ങളിലുള്ള ഹൂതി കേന്ദ്രങ്ങളിൽ നൂറുകണക്കിന് വ്യോമാക്രമണങ്ങൾ നടത്തിയതായും റോയിട്ടേഴ്സ് റിപ്പോർട്ട് ചെയ്തു. സംഘർഷം രൂക്ഷമായതോടെ ഇതുവരെ ഏകദേശം 700 പേർ കൊല്ലപ്പെടുകയും ആയിരക്കണക്കിന് പേർക്ക് പരിക്കേൽക്കുകയും ചെയ്തതായി ഐക്യരാഷ്ട്രസഭയുടെ കണക്കുകൾ വ്യക്തമാക്കുന്നു. രാജ്യത്തിനകത്ത് ഏകദേശം 1.30 ലക്ഷം യെമൻ പൗരന്മാർക്ക് വീടുവിട്ട് മാറേണ്ടിവന്നതായും റിപ്പോർട്ടുണ്ട്. ചെങ്കടൽ കടന്ന് ബോട്ടുകളിൽ ആഫ്രിക്കയിലേക്ക് പലായനം ചെയ്തവരുടെ എണ്ണം 3,000 കവിഞ്ഞതായും യുഎൻ കണക്കുകൾ പറയുന്നു.