തൃശൂർ: ജില്ലയിലെ അകമലയിൽ മുത്തശ്ശനോടൊപ്പം ക്ഷേത്രക്കുളത്തിൽ കുളിക്കാനെത്തിയ ആറുവയസുകാരിയുടെ കവിളിൽ യുവാവ് കടിച്ചുപരുക്കേൽപ്പിച്ചു. സംഭവവുമായി ബന്ധപ്പെട്ട് പാഞ്ഞാൾ സ്വദേശിയായ വിഷ്ണു എന്ന യുവാവിനെ വടക്കാഞ്ചേരി പോലീസ് കസ്റ്റഡിയിലെടുത്തു. അതേസമയം പ്രതിക്ക് മാനസിക പ്രശ്നങ്ങളുണ്ടെന്നാണ് പോലീസിന്റെ പ്രാഥമിക കണ്ടെത്തൽ.
ക്ഷേത്രക്കുളത്തിന് സമീപം ഇന്നലെ വൈകിട്ടോടെയാണ് അപ്രതീക്ഷിത സംഭവം അരങ്ങേറിയത്. മുത്തശ്ശനോടൊപ്പം അകമല ക്ഷേത്രക്കുളത്തിന് സമീപം കുളിക്കാനായി എത്തിയതായിരുന്നു ആറുവയസുകാരി. ഈ സമയത്ത് അവിടെയുണ്ടായിരുന്ന വിഷ്ണു യാതൊരു പ്രകോപനവുമില്ലാതെ കുട്ടിയെ അപ്രതീക്ഷിതമായി ആക്രമിച്ച് കവിളിൽ കടിച്ചു പരുക്കേൽപ്പിക്കുകയായിരുന്നു.
കുട്ടിയെ ആക്രമിക്കാനുണ്ടായ കൃത്യമായ കാരണം എന്താണെന്ന് നിലവിൽ വ്യക്തമായിട്ടില്ലെങ്കിലും കസ്റ്റഡിയിലായ വിഷ്ണു നിലവിൽ മാനസികാരോഗ്യത്തിന് ചികിത്സ തേടുന്ന വ്യക്തിയാണെന്നാണ് പോലീസിന്റെ പ്രാഥമിക അന്വേഷണത്തിൽ ലഭിക്കുന്ന സൂചന. എന്നാൽ, ഈ ആക്രമണത്തിന് പിന്നിൽ ലഹരിയുടെ ഉപയോഗമാണോ, അതോ പൂർണ്ണമായും മാനസിക വിഭ്രാന്തിയാണോ എന്ന കാര്യം വിശദമായ പരിശോധനകൾക്ക് ശേഷം മാത്രമേ സ്ഥിരീകരിക്കാൻ കഴിയൂ എന്ന് വടക്കാഞ്ചേരി പോലീസ് അറിയിച്ചു.
