കൊച്ചി: കേരളത്തിന്റെ കായിക ചരിത്രത്തിൽ ഇടംനേടാൻ ഒരുങ്ങുന്ന പ്രഥമ അണ്ടർ 23 ത്രീXത്രീ ദേശീയ ബാസ്‌കറ്റ്‌ബോൾ ചാമ്പ്യൻഷിപ്പിന് കൊച്ചി വേദിയാകുന്നു. ജൂൺ 12 മുതൽ 14 വരെ രാജീവ് ഗാന്ധി ഇൻഡോർ സ്റ്റേഡിയം റീജിയണൽ സ്‌പോർട്‌സ് സെന്ററിലാണ് (ആർ.എസ്.സി) മത്സരങ്ങൾ നടക്കുന്നത്. രാജ്യത്തെ യുവപ്രതിഭകൾ മാറ്റുരയ്ക്കുന്ന ഈ ദേശീയ ചാമ്പ്യൻഷിപ്പ് ആദ്യമായിട്ടാണ് അണ്ടർ 23 വിഭാഗത്തിൽ സംഘടിപ്പിക്കപ്പെടുന്നത്. ഒരു ഹാഫ് കോർട്ടിൽ, ഒരു ഹൂപ്പ് മാത്രം ഉപയോഗിച്ച് കളിക്കുന്നതാണ് 3×3 ബാസ്‌കറ്റ്‌ബോൾ. 28 പുരുഷ ടീമുകളും 23 വനിതാ ടീമുകളും ഉൾപ്പെടെ 51 സംസ്ഥാന ടീമുകളാണ് ചാമ്പ്യൻഷിപ്പിൽ പങ്കെടുക്കുന്നത്. രാജ്യത്തിന്റെ വിവിധ ഭാഗങ്ങളിൽ നിന്നുള്ള ഏകദേശം 200 യുവ കളിക്കാർ ദേശീയ കിരീടത്തിനായി മാറ്റുരയ്ക്കും.
മത്സര ക്രമം
മൂന്ന് ദിവസങ്ങളിലായി 109 മത്സരങ്ങളാണ് അരങ്ങേറുന്നത്. ആർ.എസ്.സി ഇൻഡോർ സ്റ്റേഡിയത്തിൽ പ്രത്യേകം തയ്യാറാക്കിയ രണ്ട് ഹാഫ് കോർട്ടുകളിലാണ് മത്സരങ്ങൾ നടക്കുക. രാവിലെ 8:00 മുതൽ ഉച്ചയ്ക്ക് 2:00 വരെയും വൈകുന്നേരം 4:00 മുതൽ രാത്രി 10:00 വരെയും കളികൾ നടക്കും. മത്സരദിനങ്ങളിൽ സ്‌കൂൾ കുട്ടികൾക്കായി രസകരമായ മത്സരങ്ങളും വേദിയിൽ ഒരുക്കിയിട്ടുണ്ട്.
ത്രീXത്രീ ബാസ്‌കറ്റ്‌ബോളിന്റെ വളർച്ച
2010-ലെ യൂത്ത് ഒളിമ്പിക് ഗെയിംസിൽ FIBA (ഇന്റർനാഷണൽ ബാസ്‌കറ്റ്‌ബോൾ ഫെഡറേഷൻ) അവതരിപ്പിച്ച ത്രീXത്രീ ബാസ്‌കറ്റ്‌ബോൾ പിന്നീട് ഒരു ആഗോള പ്രതിഭാസമായി വളർന്നു. FIBA ത്രീXത്രീ വേൾഡ് ടൂർ, വേൾഡ് കപ്പ്, കോണ്ടിനെന്റൽ കപ്പുകൾ തുടങ്ങിയ അന്താരാഷ്ട്ര ഇവന്റുകളുടെ പിന്തുണയോടെ ഈ ഫോർമാറ്റ് ഇന്ത്യയിലും അതിവേഗം പ്രചാരം നേടിയിട്ടുണ്ട്.
ചാമ്പ്യൻഷിപ്പിന്റെ പ്രാധാന്യം
ബാസ്‌കറ്റ്‌ബോൾ ഫെഡറേഷൻ ഓഫ് ഇന്ത്യ (BFI) ഈ സുപ്രധാന പരിപാടിക്ക് ആതിഥേയത്വം വഹിക്കാൻ കേരള ബാസ്‌കറ്റ്‌ബോൾ അസോസിയേഷനെ (Starting Five Sports Management Pvt Ltd-മായി സഹകരിച്ച്) ചുമതലപ്പെടുത്തിയിരിക്കുകയാണ്. കേരളം സംഘടിപ്പിക്കുന്ന ആദ്യ ദേശീയ തല അണ്ടർ 23 ത്രീXത്രീ ചാമ്പ്യൻഷിപ്പ് കൂടിയാണിത്. ഇത് സംസ്ഥാനത്തിന്റെ ബാസ്‌കറ്റ്‌ബോൾ മികവിനുള്ള അംഗീകാരം കൂടിയാണ്.
FIBA അംഗീകരിച്ച അന്താരാഷ്ട്ര ത്രീXത്രീ മത്സരങ്ങളിൽ ഇന്ത്യയെ പ്രതിനിധീകരിക്കാനുള്ള കഴിവുകളെ കണ്ടെത്താനും വളർത്താനും ഈ ടൂർണമെന്റ് പ്രധാന പങ്കുവഹിക്കുമെന്നാണ് പ്രതീക്ഷിക്കുന്നത്. ചാമ്പ്യൻഷിപ്പിന്റെ വിജയകരമായ നടത്തിപ്പ് രാജ്യത്തിന്റെ ബാസ്‌കറ്റ്‌ബോൾ മേഖലയിൽ കേരളത്തിന്റെ സ്ഥാനം കൂടുതൽ ഉറപ്പിക്കുമെന്നും കരുതുന്നു.
സംഘാടക സമിതി
ചാമ്പ്യൻഷിപ്പിന്റെ സുഗമമായ നടത്തിപ്പിനായി സംഘാടക സമിതി രൂപീകരിച്ചിട്ടുണ്ട്. ആർ.എസ്.സി സെക്രട്ടറി ശ്രീ. എസ്.എ.എസ്. നവാസ് ഐ.ആർ.എസ്., കേരള ബാസ്‌കറ്റ്‌ബോൾ അസോസിയേഷൻ പ്രസിഡന്റ് ശ്രീ. ജേക്കബ് ജോസഫ്, ലൈഫ് പ്രസിഡന്റ് പി.ജെ. സണ്ണി, കേരള ബാസ്‌കറ്റ്‌ബോൾ അസോസിയേഷൻ സെക്രട്ടറി പി സി ആന്റണി, ഇ.ഡി.ബി.എ പ്രസിഡന്റ് ഷിഹാബ് നീറുങ്ങൽ എന്നിവർ മുഖ്യ കോ-ഓർഡിനേറ്റർമാരായും അജിത്കുമാർ ആർ. നായർ (Starting Five Sports Management Pvt Ltd) ജനറൽ കൺവീനറായും നിരവധി പ്രമുഖ വ്യക്തികളും പൊതുപ്രവർത്തകരും രക്ഷാധികാരികളും പ്രധാന നേതൃത്വ അംഗങ്ങളായി സമിതിയിൽ ഉൾപ്പെടുന്നു.
