ചേർത്തല: ട്രെയിനിൽനിന്ന് ഇറങ്ങുന്നതിനിടെ കാൽതെറ്റി റെയിൽ പാളത്തിലേക്ക് വീണ് യാത്രക്കാരിയായ വിദ്യാർഥിനിയുടെ കാൽപാദം അറ്റു. കടക്കരപ്പള്ളി തറേപറമ്പിൽ രാധാകൃഷ്ണന്റെയും നിഷയുടെയും മകൾ കാർത്തിക (19) ആണ് അപകടത്തിൽപ്പെട്ടത്. തിരുവനന്തപുരത്ത് എൽഎൽബിക്ക് പഠിക്കുന്ന വിദ്യാർഥിനിയാണ് കാർത്തിക.
കൊച്ചുവേളിയിൽനിന്ന് മൈസൂരിലേക്ക് പോകുകയായിരുന്ന ട്രെയിൻ ചേർത്തല റെയിൽവേ സ്റ്റേഷനിലെത്തിയപ്പോഴാണ് അപകടം. ട്രെയിൻ നിർത്തുന്നതിനു മുൻപ് ഇറങ്ങിയ കാർത്തിക കാൽതെറ്റി ട്രെയിനിന്റെയും ഫ്ലാറ്റ് ഫോമിന്റെയും ഇടയിലേക്ക് വീഴുകയായിരുന്നു. ട്രെയിനിന്റെ ചക്രങ്ങൾ കയറിയാണ് കാൽപാദം അറ്റുപോയത്.
