തിരുവനന്തപുരം: സോഷ്യൽ മീഡിയയിൽ ഏറെ ശ്രദ്ധനേടിയ കൃഷ്ണകുമാർ കുടുംബവുമായി ബന്ധപ്പെട്ട വിവാദങ്ങൾക്കിടെ മകൾ അഹാന കൃഷ്ണയ്ക്ക് പരസ്യ പിന്തുണയുമായി അമ്മ സിന്ധു കൃഷ്ണ. അഹാനയ്ക്ക് നേരെ സമൂഹമാധ്യമങ്ങളിൽ ഉയർന്ന വിമർശനങ്ങൾക്കിടെയാണ് വികാരനിർഭരമായ കുറിപ്പിലൂടെ മകളെ ചേർത്തുപിടിച്ച് സിന്ധു രംഗത്തെത്തിയത്.
സിന്ധുവിന്റെ സഹോദരിയുടെ മകളായ തൻവി നടത്തിയ ചില വെളിപ്പെടുത്തലുകളും പിന്നാലെ അഹാനയുടെ അമ്മൂമ്മ വസന്ത പങ്കുവെച്ച ആരോപണങ്ങളുമാണ് കഴിഞ്ഞ ദിവസങ്ങളിൽ സമൂഹമാധ്യമങ്ങളിൽ വലിയ ചർച്ചയായത്. കുടുംബവുമായി ബന്ധപ്പെട്ട വിഷയങ്ങൾ പരസ്യമായതോടെ അഹാനയ്ക്ക് നേരെ കടുത്ത സൈബർ ആക്രമണവും വിമർശനങ്ങളും ഉയർന്നു.
ഇൻസ്റ്റാഗ്രാം സ്റ്റോറിയിലൂടെയാണ് സിന്ധു മകൾക്ക് വൈകാരികമായ പിന്തുണ പ്രഖ്യാപിച്ചത്. അഹാനയെ കുഞ്ഞായിരിക്കുമ്പോൾ നെഞ്ചോട് ചേർത്തുപിടിച്ചു നിൽക്കുന്ന ഒരു പഴയകാല ചിത്രത്തിനൊപ്പമാണ് സിന്ധു കൃഷ്ണ ഈ ഹൃദയസ്പർശിയായ കുറിപ്പ് പങ്കുവച്ചത്.
Related Post
സിന്ധു കൃഷ്ണയുടെ ഇൻസ്റ്റാഗ്രാം കുറിപ്പ്
‘‘അമ്മു… എനിക്കു താങ്ങായി നിന്നതിനും, സ്വന്തം സ്വാർഥത താൽപര്യങ്ങൾക്കായി എന്നെ പിന്നിൽ നിന്നു കുത്തിയ പ്രിയപ്പെട്ടവരിൽ നിന്ന് എന്നെ കാത്തതിനും സോഷ്യൽ മീഡിയയിൽ നീ നേരിടുന്ന ഈ വിദ്വേഷങ്ങൾക്കെല്ലാം ഞാൻ ഹൃദയപൂർവം ക്ഷമ ചോദിക്കുന്നു..
നീ ഒരു തെറ്റും ചെയ്തിട്ടില്ല… ഈ പ്രപഞ്ചത്തിനും നിന്നെ സ്നേഹിക്കുന്നവർക്കും അതറിയാം. അതുകൊണ്ട് വെറുപ്പ് പ്രചരിപ്പിക്കുന്നവർ എന്തും പറഞ്ഞോട്ടെ, നീ തളരരുത്…’’” എന്നായിരുന്നു കുറിച്ചത്.
അതേസമയം, കുടുംബവിവാദത്തിന് തുടക്കമായ വീഡിയോ തൻവി പിന്നീട് സമൂഹമാധ്യമങ്ങളിൽ നിന്ന് പിൻവലിച്ചു. താനും അഹാനയും തമ്മിലുള്ള തെറ്റിദ്ധാരണകൾ സംസാരിച്ച് പരിഹരിച്ചെന്നും അതിനാലാണ് വീഡിയോ നീക്കിയതെന്നും തൻവി വ്യക്തമാക്കി.
കുടുംബാംഗങ്ങൾ തമ്മിൽ ചർച്ച നടത്തിയെന്നും കുടുംബകാര്യങ്ങൾ വ്യക്തിപരമായ നേട്ടങ്ങൾക്കായി സമൂഹമാധ്യമങ്ങളിൽ പങ്കുവയ്ക്കുന്നത് ശരിയല്ലെന്നാണ് തന്റെ നിലപാടെന്നും അഹാനയും പ്രതികരിച്ചു.
