ന്യൂഡൽഹി: ഇന്ത്യ- അമേരിക്ക വ്യാപാര കരാർ യാഥാർത്ഥ്യമായതിനു പിന്നാലെ കരാറു സംബന്ധിച്ച സംയുക്ത പ്രസ്താവന ഇരു രാജ്യങ്ങളും പുറത്തുവിട്ടു. റഷ്യൻ എണ്ണ വാങ്ങുന്നതിൽ ഇന്ത്യക്കുമേൽ അമേരിക്ക ചുമത്തിയിരുന്ന അധിക തീരുവ ഒഴിവാക്കി. ഇന്ത്യൻ ഉത്പന്നങ്ങൾക്ക് അമേരിക്കയിൽ പരമാവധി നികുതി 18 ശതമാനമാക്കി കുറച്ചു. അതുപോലെ അമേരിക്കയിൽ നിന്നുള്ള നിരവധി ഉത്പന്നങ്ങൾക്ക് തീരുവ ഒഴിവാക്കും. അമേരിക്കയിൽ നിന്നുള്ള ധാന്യങ്ങളും പഴങ്ങളും ഉൾപ്പെടെ കാർഷിക വിഭവങ്ങൾ ഇന്ത്യയിൽ ഇറക്കുമതി ചെയ്യുന്നതിനും നികുതി ഇളവുണ്ടാകും. അതേസമയം റഷ്യൻ എണ്ണ സംബന്ധിച്ച് കരാറിൽ യാതൊരു വിധ പരാമർശവുമില്ല
അഞ്ചുവർഷത്തിനുള്ളിൽ 50000 കോടി ഡോളറിൻറെ സാധനങ്ങൾ അമേരിക്ക ഇന്ത്യയിലേക്ക് ഇറക്കുമതി ചെയ്യും. കാർഷിക, ക്ഷീര മേഖലകളിൽ നിയന്ത്രിത ഇളവാണ് വരുത്തിയിരിക്കുന്നത്. ചില അമേരിക്കൻ വിളകൾക്ക് തീരുവ കുറയ്ക്കും. മണിച്ചോളം, സോയബീൻ എണ്ണ, പിസ്ത, കശുവണ്ടി, ബദാം, പഴങ്ങൾ എന്നിവയ്ക്ക് ഇന്ത്യ തീരുവ കുറയ്ക്കുകയോ ഒഴിവാക്കുകയോ ചെയ്യും. ഇന്ത്യൻ അരി ഇറക്കുമതിക്ക് മുൻഗണന നൽകുമെന്ന് യുഎസ് സംയുക്ത പ്രസ്താവനയിൽ വ്യക്തമാക്കുന്നു. അതേസമയം, കരാർ ഇന്ത്യയുടെ ക്ഷീര മേഖലയ്ക്ക് സംരക്ഷണമുണ്ടാകും. ഓറഞ്ച്, പ്ലം, മുന്തിരി, നാരങ്ങ, വാഴപഴം എന്നിവയ്ക്ക് ഇന്ത്യ നികുതി ഇളവ് നൽകില്ല.തേയിലയ്ക്കും ഇന്ത്യ തീരുവ കുറയ്ക്കില്ല, മാങ്ങ ഇറക്കുമതിക്കും നിയന്ത്രണം തുടരും. ഇന്ത്യ മസാലകൾക്കും ഉള്ളിക്കും ഉരുളക്കിഴങ്ങിനും പൂർണ സംരക്ഷണം ഉണ്ടാകും. ഇവ ഇറക്കുമതി ചെയ്യുന്നതിനുള്ള നിയന്ത്രണം തുടരും.അതുപോലെ അമേരിക്കൻ മദ്യത്തിന് ഇന്ത്യ തീരുവ കുറയ്ക്കുമെന്നും പ്രസ്താവനയിലുണ്ട്.
കരാറിലെ പ്രധാന വ്യവസ്ഥകൾ:
* യുഎസ് വ്യവസായ ഉൽപ്പന്നങ്ങൾക്കും നിരവധി ഭക്ഷ്യ-കൃഷി ഉൽപ്പന്നങ്ങൾക്കും ഇന്ത്യ തീരുവ കുറയ്ക്കുകയോ പൂർണമായും ഒഴിവാക്കുകയോ ചെയ്യും. ഡിഡിജികൾ, റെഡ് സോർഗം, മരക്കുരുക്കൾ, പഴവർഗങ്ങൾ, സോയാബീൻ ഓയിൽ, വൈൻ, മദ്യപാനങ്ങൾ തുടങ്ങിയവ ഇതിൽ ഉൾപ്പെടും.
* ഇന്ത്യൻ ഉൽപ്പന്നങ്ങൾക്ക് യുഎസ് 18 ശതമാനം പരസ്പര തീരുവ തുടരും. എന്നാൽ ഇടക്കാല കരാർ പൂർണമായി നടപ്പിലായാൽ ജനറിക് ഫാർമസ്യൂട്ടിക്കൽസ്, വജ്ര-രത്നങ്ങൾ, വിമാന ഭാഗങ്ങൾ തുടങ്ങിയ നിരവധി ഉൽപ്പന്നങ്ങൾക്ക് ഈ തീരുവ ഒഴിവാക്കും.
* വിമാനങ്ങളും വിമാന ഭാഗങ്ങളും, സ്റ്റീൽ, അലുമിനിയം, കോപ്പർ എന്നിവയ്ക്ക് യുഎസ് ഏർപ്പെടുത്തിയിരുന്ന ദേശീയ സുരക്ഷാ തീരുവകൾ ഇന്ത്യയ്ക്ക് ഒഴിവാക്കും. അതേസമയം, വാഹന ഭാഗങ്ങൾക്കായി ഇന്ത്യയ്ക്ക് പ്രാധാന്യമുള്ള ടാരിഫ് ക്വോട്ട അനുവദിക്കും.
* ഫാർമസ്യൂട്ടിക്കൽ മേഖലയിൽ യുഎസിന്റെ സെക്ഷൻ 232 അന്വേഷണ ഫലത്തിന്റെ അടിസ്ഥാനത്തിൽ ഇന്ത്യയ്ക്ക് പ്രത്യേക ഇളവുകൾ ലഭിക്കും.
* ഇരുരാജ്യങ്ങളും പരസ്പരം പ്രാധാന്യമുള്ള വിപണി പ്രവേശനം ദീർഘകാല അടിസ്ഥാനത്തിൽ ഉറപ്പാക്കും.
* കരാറിന്റെ ആനുകൂല്യങ്ങൾ പ്രധാനമായും ഇന്ത്യക്കും യുഎസിനും ലഭിക്കുന്ന തരത്തിൽ Rules of Origin നിശ്ചയിക്കും.
* മെഡിക്കൽ ഉപകരണങ്ങൾ, ഐസിടി ഉൽപ്പന്നങ്ങൾ, കൃഷി-ഭക്ഷ്യ മേഖലകൾ എന്നിവയിൽ നിലനിൽക്കുന്ന നോൺ-ടാരിഫ് തടസ്സങ്ങൾ ഇന്ത്യ പരിഹരിക്കുമെന്ന് സമ്മതിച്ചു.
* സാങ്കേതിക മാനദണ്ഡങ്ങളും പരിശോധനാ നടപടികളും ലളിതമാക്കാൻ ഇരുരാജ്യങ്ങളും സംയുക്ത ചർച്ചകൾ നടത്തും.
* ബിടിഎ ചർച്ചകളുടെ ഭാഗമായി ഇന്ത്യൻ ഉൽപ്പന്നങ്ങൾക്കുള്ള യുഎസ് തീരുവ കുറയ്ക്കണമെന്ന ഇന്ത്യയുടെ ആവശ്യം അമേരിക്ക പരിഗണിക്കും.
* സപ്ലൈ ചെയിൻ സുരക്ഷയും സാമ്പത്തിക സുരക്ഷാ സഹകരണവും ശക്തിപ്പെടുത്താൻ ഇരുരാജ്യങ്ങളും തമ്മിൽ ധാരണ.
* അടുത്ത അഞ്ച് വർഷത്തിനുള്ളിൽ 500 ബില്യൺ ഡോളറിന്റെ യുഎസ് ഊർജ്ജ ഉൽപ്പന്നങ്ങൾ, വിമാനങ്ങൾ, വിലയേറിയ ലോഹങ്ങൾ, സാങ്കേതിക ഉൽപ്പന്നങ്ങൾ, കോക്കിംഗ് കോൾ എന്നിവ ഇന്ത്യ വാങ്ങുമെന്ന് പ്രഖ്യാപിച്ചു.
* ഡിജിറ്റൽ വ്യാപാരത്തിൽ നിലനിൽക്കുന്ന വിവേചനപരമായ നടപടികൾ ഒഴിവാക്കി ശക്തമായ ഡിജിറ്റൽ ട്രേഡ് ചട്ടങ്ങൾ രൂപീകരിക്കാനും ഇരുരാജ്യങ്ങൾ തീരുമാനിച്ചു.
* ഇടക്കാല കരാർ വേഗത്തിൽ നടപ്പാക്കി, സമഗ്രമായ ഇന്ത്യ–യുഎസ് ബൈലാറ്ററൽ ട്രേഡ് അഗ്രിമെന്റ് പൂർത്തിയാക്കുന്നതിനുള്ള നടപടികൾ ഉടൻ ആരംഭിക്കും.
