പാലക്കാട്: കരോൾ സംഘത്തെ ആക്രമിച്ച സംഭവത്തിൽ പ്രതിക്കെതിരെ കൂടുതൽ വകുപ്പുകൾ ചുമത്തിയേക്കുമെന്ന് റിപ്പോർട്ട്. കരോൾ സംഘത്തെ ആക്രമിച്ച ആർഎസ്എസ് പ്രവർത്തകൻ അശ്വിൻരാജ് കുട്ടികളെ മർദ്ദിച്ചതായും പോലീസിനു നൽകിയ പരാതിയിൽ പറയുന്നു.
അതേസമയം കുട്ടികളെ മർദ്ദിച്ചത് തെളിഞ്ഞാൽ അശ്വിനെതിരെ കൂടുതൽ വകുപ്പുകൾ ചുമത്തും. പ്രതിയെ ഇന്നലെ കോടതിയിൽ ഹാജരാക്കി റിമാൻഡ് ചെയ്തിരുന്നു. കഴിഞ്ഞ ദിവസമാണ് പുതുശ്ശേരി സുരഭി നഗറിൽ വച്ച് കരോൾ സംഘത്തെ അശ്വിൻ രാജ് ആക്രമിച്ചത്. കുട്ടികൾ അടങ്ങുന്ന കരോൾ സംഘത്തെ പ്രതി ആക്രമിക്കുകയായിരുന്നു. കരോളിന് ഉപയോഗിച്ച ഡ്രമ്മിൽ സിപിഎം എന്നെഴുതിയത് ചോദ്യം ചെയ്തായിരുന്നു ആക്രമണം. സുരഭിനഗർ എന്ന സ്ഥലത്തെത്തിയപ്പോഴായിരുന്നു സംഭവം.
പ്രതി ചോദ്യം ചെയ്തതോടെ കുട്ടികൾ ഡ്രം ഉപേക്ഷിച്ച് ഓടിരക്ഷപ്പെട്ടു. തിരിച്ചെത്തിയപ്പോൾ അവ തകർത്ത നിലയിലായിരുന്നു. തുടർന്ന് കസബ പോലീസിലെത്തി പരാതി നൽകുകയായിരുന്നു. പിന്നാലെ പോലീസ് അശ്വിൻരാജിനെ അറസ്റ്റ് ചെയ്തു. ആക്രമണം നടക്കുമ്പോൾ മറ്റ് രണ്ട് പേരും അശ്വിനൊപ്പമുണ്ടായിരുന്നുവെന്നാണ് അറിയുന്നത്.
