ബെംഗളൂരു: കർണാടകയിലെ തുമകുരുവിൽ ജ്വല്ലറിയിൽ നിന്ന് പത്ത് ലക്ഷം രൂപയോളം വിലമതിക്കുന്ന വജ്രാഭരണങ്ങൾ കാണാതായതോടെ ജീവനക്കാരും ഉടമയും ഞെട്ടി. മോഷണം നടന്നതിന്റെ സൂചനകളൊന്നും ഇല്ലാതിരുന്നതോടെ അന്വേഷണം സങ്കീർണമായി. എന്നാൽ സിസിടിവി ദൃശ്യങ്ങൾ പരിശോധിച്ചതോടെ യഥാർഥ ‘കള്ളനെ’ കണ്ടെത്തി. ഒരു എലിയായിരുന്നു ആഭരണങ്ങൾ കടത്തിക്കൊണ്ടുപോയത്.
തുമകുരു നഗരത്തിലെ കാൽടെക്‌സ് സർക്കിളിന് സമീപമുള്ള വിശ്വാസ് ജ്വല്ലറിയിലാണ് സംഭവം. പതിവുപോലെ കണക്കുകൾ പരിശോധിച്ച് കടയടച്ച് ജീവനക്കാർ മടങ്ങിയിരുന്നു. അടുത്ത ദിവസം കട തുറന്നപ്പോഴാണ് 50 ഗ്രാമിലധികം വരുന്ന സ്വർണ, വജ്രാഭരണങ്ങൾ കാണാതായതായി ശ്രദ്ധയിൽപ്പെട്ടത്.
കടയുടെ ഷട്ടറിന് കേടുപാടുകളൊന്നും സംഭവിച്ചിരുന്നില്ല. പുറത്ത് നിന്നാരെങ്കിലും കടയ്ക്കുള്ളിൽ പ്രവേശിച്ചതിന്റെ ലക്ഷണങ്ങളും ഉണ്ടായിരുന്നില്ല. സ്വർണമാലകളും വജ്രമോതിരങ്ങളും ഉൾപ്പെടെയുള്ള ആഭരണങ്ങൾ എങ്ങനെ അപ്രത്യക്ഷമായെന്നത് ജീവനക്കാരെ ആശയക്കുഴപ്പത്തിലാക്കി.
Related Post
തുടർന്ന് പോലീസിൽ പരാതി നൽകുന്നതിന് മുൻപ് കടയിലെ സിസിടിവി ദൃശ്യങ്ങൾ പരിശോധിക്കാൻ ജീവനക്കാർ തീരുമാനിച്ചു. ദൃശ്യങ്ങൾ പരിശോധിക്കുന്നതിനിടെയാണ് വിചിത്രമായ കാഴ്ച ശ്രദ്ധയിൽപ്പെട്ടത്. ഒരു എലി ആഭരണങ്ങൾ ഓരോന്നായി തറയിലൂടെ വലിച്ചുകൊണ്ടുപോകുന്നതാണ് സിസിടിവിയിൽ പതിഞ്ഞിരുന്നത്.
ആഭരണങ്ങൾ എലി ഒരു മാളത്തിലേക്ക് കൊണ്ടുപോകുന്നതും ദൃശ്യങ്ങളിൽ വ്യക്തമായിരുന്നു. തുടർന്ന് ജീവനക്കാർ സിസിടിവി ദൃശ്യങ്ങൾ പരിശോധിച്ച് എലിയുടെ നീക്കങ്ങൾ പിന്തുടർന്നു. ഒടുവിൽ ആഭരണങ്ങൾ സൂക്ഷിച്ചിരുന്ന മാളം കണ്ടെത്തുകയായിരുന്നു.
മാളം കുഴിച്ച് പരിശോധിച്ചപ്പോൾ കാണാതായ ആഭരണങ്ങളെല്ലാം അവിടെനിന്ന് കണ്ടെത്തി. പത്ത് മോതിരങ്ങളും മൂന്ന് മാലകളും ഉൾപ്പെടെ നഷ്ടപ്പെട്ടതായി കരുതിയിരുന്ന ആഭരണങ്ങൾ മുഴുവൻ തിരികെ ലഭിച്ചതോടെ കടയുടമയ്ക്കും ജീവനക്കാർക്കും ആശ്വാസമായി.
ജ്വല്ലറിയിൽ മോഷണം നടന്നതാണെന്ന് കരുതി അന്വേഷണം ആരംഭിക്കാനിരിക്കെയാണ് സംഭവത്തിന് പിന്നിൽ ഒരു എലിയാണെന്ന് വ്യക്തമായത്. ആഭരണങ്ങൾ എലി മാളത്തിലേക്ക് കൊണ്ടുപോകുന്ന സിസിടിവി ദൃശ്യങ്ങൾ ഇതിനോടകം സാമൂഹികമാധ്യമങ്ങളിൽ വ്യാപകമായി പ്രചരിക്കുകയാണ്.
പത്ത് ലക്ഷം രൂപയോളം വിലമതിക്കുന്ന ആഭരണങ്ങൾ മോഷ്ടിച്ച ‘കള്ളനെ’ ഒടുവിൽ കണ്ടെത്തിയപ്പോൾ അത് ഒരു എലിയാണെന്ന വിവരം പുറത്തുവന്നതാണ് സംഭവത്തെ കൂടുതൽ കൗതുകകരമാക്കിയത്. സിസിടിവി ദൃശ്യങ്ങൾ കണ്ട് നിരവധി പേരാണ് സംഭവം അവിശ്വസനീയമെന്ന് പ്രതികരിക്കുന്നത്.
🐀 KARNATAKA | RAT HEIST
According to reports a rat allegedly dragged diamond and gold jewellery worth around ₹10 lakh from a jewellery shop in Tumakuru.
After reviewing the CCTV footage staff traced the rat’s burrow and recovered the missing jewellery.
🎥 CCTV#Karnataka… pic.twitter.com/MU9TdXNotk
— contentkikamii (@contentkikamii) July 30, 2026
