ആൾവാർ: രാജസ്ഥാനിലെ ഡീഗ് ജില്ലയിലെ ബഡേസ്ര ഗ്രാമത്തിൽ 13 വയസ്സുള്ള ഇരട്ടക്കുട്ടികളെ കൊലപ്പെടുത്തിയ സംഭവത്തിൽ അമ്മ പ്രീതിയെയും കാമുകനെയും മൂത്ത മകനെയും പോലീസ് കസ്റ്റഡിയിലെടുത്തു. കാമുകനുമായുള്ള അമ്മയുടെ ബന്ധത്തെ കുട്ടികൾ എതിർത്തതാണ് കൊലപാതകത്തിന് കാരണമായതെന്നാണ് പോലീസിന്റെ പ്രാഥമിക നിഗമനം. വിനയ്, വിഷ്ണു എന്നീ ഇരട്ടക്കുട്ടികളുടെ മൃതദേഹങ്ങൾ വീടിന് സമീപത്തെ ഒഴിഞ്ഞ പറമ്പിലാണ് കണ്ടെത്തിയത്.
ഇരട്ടക്കുട്ടികളെ വീട്ടിൽ കാണാതായതിനെ തുടർന്ന് അമ്മയുടെ സഹോദരി നടത്തിയ തിരച്ചിലിലാണ് മൃതദേഹങ്ങൾ കണ്ടെത്തിയത്. കുട്ടികളുടെ കഴുത്തറുത്ത നിലയിലായിരുന്നുവെന്നും ശരീരത്തിൽ നിരവധി മുറിവുകളും തലയ്ക്ക് പരുക്കുകളുമുണ്ടായിരുന്നുവെന്നും ഡീഗ് എസ്.പി. കാംബ്ലെ ശരൺ ഗോപിനാഥ് പറഞ്ഞു.
കൊലപാതകത്തിൽ മൂത്ത മകനും പങ്കുണ്ടെന്നാണ് അന്വേഷണ ഉദ്യോഗസ്ഥർ വ്യക്തമാക്കുന്നത്. അമ്മയുടെ ബന്ധത്തെ മൂത്ത മകൻ പിന്തുണച്ചിരുന്നതായും കൊലപാതകത്തിന് സഹായിച്ചതായും പോലീസ് പറഞ്ഞു. സംഭവത്തിൽ കസ്റ്റഡിയിലുള്ളവരെ ചോദ്യംചെയ്തുവരികയാണ്.
ഉത്തർപ്രദേശിലെ ഹാത്രസ് ജില്ലയിലെ സരോത് മൻസ ഗ്രാമവാസിയായ നിരഞ്ജൻ സിങ്ങുമായാണ് പ്രീതിയുടെ വിവാഹം കഴിഞ്ഞത്. ഏകദേശം 20 വർഷം മുൻപായിരുന്നു വിവാഹം. ദമ്പതികൾക്ക് നാലു മക്കളാണുള്ളത്. ഇരട്ടക്കുട്ടികളുടെ കൊലപാതകത്തിലേക്ക് നയിച്ച സാഹചര്യങ്ങളും മറ്റുള്ളവരുടെ പങ്കും കണ്ടെത്താൻ പോലീസ് അന്വേഷണം തുടരുകയാണ്.
