കണ്ണൂർ: പ്രതിപക്ഷ നേതാവ് പിണറായി വിജയൻറെ വീട്ടിൽ നോട്ടീസ് നൽകാൻ ഇഡി എത്തി. പിണറായി സ്ഥലത്തില്ലാത്തതിനാൽ വീട്ടുകാർ നോട്ടീസ് കൈപ്പറ്റിയില്ല. ഇതോടെ പോലീസുമായെത്തി നോട്ടീസ് വീട്ടിലെ ഭിത്തിയിൽ പതിച്ച് ഇഡി മടങ്ങുകയായിരുന്നു. 23ന് നേരിട്ട് ഹാജരാകാനാണ് സമൻസിലെ നിർദേശം.
സുപ്രിംകോടതി കേസ് പരിഗണിക്കുന്ന പശ്ചാത്തലത്തിൽ ഹാജരാകുന്ന കാര്യം പിന്നീട് തീരുമാനിക്കും. നിയമസഭ നടക്കുന്ന കാര്യവും ചൂണ്ടിക്കാട്ടാൻ ആലോചനയെന്നാണ് റിപ്പോർട്ട്. അതിനിടെ സിഎംആർഎൽ കേസിലെ പിണറായി വിജയൻറെ ഹർജി അനുഭാവപൂർവം പരിഗണിക്കാമെന്ന് സുപ്രിംകോടതി അറിയിച്ചു. വെക്കേഷൻ ബെഞ്ച് പരിഗണിക്കാനാവുമോയെന്ന് നോക്കാമെന്നും ഇല്ലെങ്കിൽ 26ന് പരിഗണിക്കുമെന്നും കോടതി വ്യക്തമാക്കി. അതേസമയം അറസ്റ്റിന് സാധ്യതയുണ്ടെന്ന് പിണറായി കോടതിയെ അറിയിച്ചു. സിദ്ദാർഥ് ലൂത്രയാണ് പിണറായിക്ക് വേണ്ടി കോടതിയിൽ ഹാജരായത്. പിണറായിയെ കൂടാതെ മുഹമ്മദ് റിയാസും വീണയും സുപ്രിംകോടതിയിൽ ഹർജി നൽകിയിട്ടുണ്ട്.
അതേസമയം ഹൈക്കോടതി ഉത്തരവിനെതിരെയാണ് പിണറായി ഹർജി നൽകിയത്. കേസിൽ എഫ്ഐആർ രജിസ്റ്റർ ചെയ്ത് അന്വേഷണം നടത്തണമെന്ന സിംഗിൾ ബെഞ്ച് ഉത്തരവ് ഹൈക്കോടതി ഡിവിഷൻ ബെഞ്ച് ശരിവെച്ചിരുന്നു. സിംഗിൾ ബെഞ്ച് ഉത്തരവ് റദ്ദാക്കണമെന്ന ആവശ്യം ഡിവിഷൻ ബെഞ്ച് പരിഗണിച്ചില്ല. സിംഗിൾ ബെഞ്ച് വിധിയിൽ തന്റെ ഭാഗം കേട്ടില്ലെന്നും ഏകപക്ഷീയമായാണ് ഉത്തരവിട്ടതെന്നും ചൂണ്ടിക്കാട്ടി പിണറായി സമർപ്പിച്ച ഹർജി കോടതി ഒറ്റവരിയിൽ തള്ളുകയായിരുന്നു. തന്റെ വാദം കൂടി കേൾക്കണമെന്ന പിണറായി വിജയന്റെ ആവശ്യം ഡിവിഷൻ ബെഞ്ച് അംഗീകരിക്കാൻ തയ്യാറായില്ല. ഇതിനെതിരെയാണ് പിണറായി സുപ്രിംകോടതിയെ സമീപിച്ചത്.
