’ബസ് ചാർജ് വർധനയില്ല,വിദ്യാർഥികളുടെ കൺസെഷനും കൂട്ടില്ല’; ബസുടമകളുടെ ആവശ്യം തള്ളി മന്ത്രി; ’മക്കൾ വാഹനമോടിച്ച് അപകടമുണ്ടാക്കിയാൽ രക്ഷിതാക്കളും കുടുങ്ങും’

തിരുവനന്തപുരം: സംസ്ഥാനത്ത് ബസ് ചാർജ് വർധിപ്പിക്കില്ലെന്ന് ഗതാഗതമന്ത്രി സി.പി. ജോൺ. ബസ് ചാർജ് വർധിപ്പിക്കണമെന്ന ഉടമകളുടെ ആവശ്യം മന്ത്രി തള്ളി. വിദ്യാർഥികളുടെ കൺസെഷൻ നിരക്കും വർധിപ്പിക്കില്ല. ഇതൊഴികെയുള്ള ബസുടമകളുടെ മറ്റ് ആവശ്യങ്ങൾ പരിഗണിക്കുമെന്നും മന്ത്രി വ്യക്തമാക്കി.

ബസുടമകൾക്കിടയിൽ തന്നെ നിരക്ക് വർധനയെ എതിർക്കുന്ന ഒരു വിഭാഗമുണ്ടെന്നാണ് മന്ത്രിയുടെ വിശദീകരണം. നിരക്ക് വർധിപ്പിച്ചാൽ യാത്രക്കാരുടെ എണ്ണം കുറയുമെന്നാണ് ഇവരുടെ ആശങ്ക. യാത്രക്കാർ സ്വകാര്യ വാഹനങ്ങളിലേക്ക് മാറാനും സാധ്യതയുണ്ട്. സംസ്ഥാനത്ത് 30,000 ബസുകൾ ഉണ്ടായിരുന്നത് ഇപ്പോൾ 8,000 ആയി കുറഞ്ഞെന്നും മന്ത്രി ചൂണ്ടിക്കാട്ടി.

ഓട്ടോ, ടാക്സി നിരക്കുകൾ വർധിപ്പിക്കണമെന്നാണ് സർക്കാരിന്റെയും നിലപാട്. 2022ലാണ് അവസാനമായി ഇവരുടെ നിരക്കുകൾ നിശ്ചയിച്ചതെന്നും മന്ത്രി വിശദീകരിച്ചു.

അതേസമയം, കൗമാരക്കാർ പ്രതികളാകുന്ന വാഹനാപകടങ്ങളിൽ രക്ഷിതാക്കൾ ഉത്തരവാദിത്തം ഏറ്റെടുക്കേണ്ടിവരുമെന്നും മന്ത്രി പറഞ്ഞു. മക്കൾ വാഹനമോടിച്ച കാര്യം അറിഞ്ഞിരുന്നില്ലെന്ന് പറഞ്ഞ് രക്ഷിതാക്കൾക്ക് ഉത്തരവാദിത്തത്തിൽനിന്ന് ഒഴിഞ്ഞുമാറാനാകില്ല. വാഹന ഉടമകളെന്ന നിലയിൽ രക്ഷിതാക്കൾ ശിക്ഷ അനുഭവിക്കേണ്ടിവരുമെന്നും അദ്ദേഹം വ്യക്തമാക്കി.

മദ്യപിച്ച് വാഹനമോടിക്കുന്നവർക്കുള്ള ശിക്ഷ വർധിപ്പിക്കണമെന്നും മന്ത്രി കൂട്ടിച്ചേർത്തു.

സ്കൂട്ടിയിലെത്തിയ രണ്ടംഗ സംഘം വീടിന്റെ ഗെയിറ്റ് മോഷ്ടിച്ചു, നഷ്ടപ്പെട്ടത് 5500 രൂപ വിലവരുന്ന ഗേറ്റ്