തിരുവനന്തപുരം: കേരളത്തിൽ നടക്കുന്നത് ജനക്ഷേമവും കുട്ടികളുടെ സുരക്ഷയും മുൻനിർത്തിയുള്ള ഭരണത്തിന് പകരം ‘യുഡിഎഫ്-ബിജെപി ടീമി’ന്റെ ഭരണമാണ് എന്ന ആരോപണവുമായി സിപിഐഎം നേതാവ് എം.വി ജയരാജൻ. അടൂർ പ്രകാശ് പറഞ്ഞത് ശരിയാണെന്നും ഇപ്പോൾ യുഡിഎഫ് ടീം തന്നെയില്ലെന്നും അദ്ദേഹം പരിഹസിച്ചു. ആശുപത്രികളിൽ രോഗികൾക്ക് ചികിത്സയ്ക്കാവശ്യമായ പഞ്ഞിപോലും ഇല്ലാത്ത സാഹചര്യമാണെന്നും എന്നിട്ടും മന്ത്രിയുടെ വായാടിത്തത്തിന് യാതൊരു കുറവുമില്ലെന്നും ജയരാജൻ വിമർശിച്ചു. കായികമേളയ്ക്കിടെ അപകടമുണ്ടായപ്പോൾ പരിക്കേറ്റവരെ ആശുപത്രിയിലെത്തിക്കാൻ പോലും ആവശ്യമായ സംവിധാനമുണ്ടായിരുന്നില്ലെന്നും അദ്ദേഹം ആരോപിച്ചു.
കായികമന്ത്രിയുടെ ഭാഗത്തുനിന്നുണ്ടായ വീഴ്ചയ്ക്ക് വിദ്യാഭ്യാസ മന്ത്രിയെ പഴിചാരി രക്ഷപ്പെടാനാണ് ശ്രമമെന്നും ജയരാജൻ പറഞ്ഞു. സംസ്ഥാനത്ത് ജനങ്ങളുടെ ക്ഷേമത്തിനും കുട്ടികളുടെ സുരക്ഷയ്ക്കുമല്ല പ്രാധാന്യം നൽകുന്നതെന്നും അദ്ദേഹം ആരോപിച്ചു.
പൊലീസ് നടപടികളെയും ജയരാജൻ രൂക്ഷമായി വിമർശിച്ചു. എസ്‌എഫ്‌ഐ ജില്ലാ സെക്രട്ടറിക്കെതിരെ പൊലീസ് ഉദ്യോഗസ്ഥൻ ഭീഷണി മുഴക്കിയെന്ന ആരോപണം ചൂണ്ടിക്കാട്ടിയായിരുന്നു വിമർശനം. എസ്‌ഐ ഗോകുലിനെതിരെ ഗുരുതര ആരോപണങ്ങളാണ് ജയരാജൻ ഉന്നയിച്ചത്. കുപ്രസിദ്ധിക്ക് റെക്കോർഡ് നൽകേണ്ട ഉദ്യോഗസ്ഥനാണ് ഗോകുലെന്നും കോൺഗ്രസുകാരോ ബിജെപിക്കാരോ കുറ്റം ചെയ്താൽ കേസെടുക്കാതിരിക്കുകയും സിപിഐഎം പ്രവർത്തകർക്കെതിരെ മാത്രം കേസെടുക്കുകയും ചെയ്യുന്ന സാഹചര്യമാണെന്നും അദ്ദേഹം ആരോപിച്ചു. രാഷ്ട്രീയമായി അണികളെ ഭയപ്പെടുത്താനും ഒപ്പം നിർത്താനുമുള്ള മർദനവും ക്രൂരതയുമാണ് സർക്കാർ നടത്തുന്നതെന്നും ജയരാജൻ ആരോപിച്ചു. പൊലീസ് വേട്ട തുടർന്നാൽ ജനങ്ങൾക്ക് തെരുവിലിറങ്ങേണ്ടിവരുമെന്നും ഗോകുലിനെ പുറത്താക്കുന്നതുവരെ പ്രതിഷേധം തുടരുമെന്നും അദ്ദേഹം പറഞ്ഞു.
പി. നന്ദകുമാറിന്റെ മലപ്പുറം പരാമർശവുമായി ബന്ധപ്പെട്ടും ജയരാജൻ നിലപാട് വ്യക്തമാക്കി. ഒരു ജില്ലയ്ക്കെതിരെയും സിപിഐഎമ്മിന് നിലപാടില്ലെന്നും ഒരു ജില്ലയെയും അപമാനിക്കാൻ പാർട്ടി ഉദ്ദേശിക്കുന്നില്ലെന്നും അദ്ദേഹം പറഞ്ഞു. ഒരു മതത്തെയും അപമാനിക്കുന്ന നിലപാട് സിപിഐഎമ്മിനില്ലെന്നും ജയരാജൻ വ്യക്തമാക്കി. അതേസമയം മുസ്‌ലിം ലീഗ് ജമാഅത്തെ ഇസ്‌ലാമിയുമായി ഒരേസമയം കൂട്ടുകൂടുകയും ബിജെപിയുമായി ധാരണയുണ്ടാക്കുകയും ചെയ്യുന്നുവെന്നും അദ്ദേഹം ആരോപിച്ചു. ലീഗ് മന്ത്രിമാരുടെ നേതൃത്വത്തിൽ ബിജെപി അജണ്ട നടപ്പാക്കുകയാണെന്നും ജയരാജൻ ആരോപിച്ചു. വർഗീയതയ്‌ക്കെതിരെ സിപിഐഎമ്മിന് വ്യക്തമായ നിലപാടുണ്ടെന്നും പാർട്ടിയുടെ നിലപാടിന് വിരുദ്ധമായ അഭിപ്രായം ആർക്കും ഉണ്ടാകരുതെന്നും അദ്ദേഹം പറഞ്ഞു.
Related Post
