ന്യൂഡൽഹി: ഇന്ത്യയിലെ ആപ്പിളിന്റെ ഉത്പാദന കേന്ദ്രങ്ങളിൽ നിന്ന് നൂറുകണക്കിന് ചൈനീസ് എഞ്ചിനിയർമാരും ടെക്നീഷ്യൻമാരും പിന്മാറുന്നു. ഇതോടെ സെപ്റ്റംബറിൽ പുറത്തിറക്കാനുള്ള ഐഫോൺ 17 നിർമ്മാണം തടസ്സപ്പെടാൻ സാധ്യത. ഇന്ത്യയിലെ ആപ്പിൾ പ്രൊഡക്ടുകളുടെ നിർമാണം ഇതോടെ ഗതികേടിലായിരിക്കുന്നു.
ഇന്ത്യയിലെ ഫോക്‌സ്‌കോൺ യൂണിറ്റുകളിൽ പ്രവർത്തിച്ചിരുന്ന നിരവധി ചൈനീസ് വിദഗ്ധർക്കാണ് ‘ഇന്ത്യ വിടാനായി’ നിർദേശം ലഭിച്ചിരിക്കുന്നത്. ചൈന എടുത്ത ചില കടുത്ത തീരുമാനങ്ങളാണ് ഇതിനെല്ലാം കാരണമെന്ന് റിപ്പോ‍ർട്ടുകൾ സൂചിപ്പിക്കുന്നു. ടെക്‌നോളജിയുടെ ചോർച്ചയും വിദഗ്ധ തൊഴിലാളികളുടെ മൈഗ്രേഷനും തടയാൻ ചൈന സ്വീകരിച്ച പുതിയ നടപടികളുടെ ഭാഗമായാണ് ഇന്ത്യയിൽ ഈ പ്രതിസന്ധി ഉണ്ടായിരിക്കുന്നത് എന്ന് ബ്ലൂംബെർഗ് റിപ്പോർട്ട് ചെയ്യുന്നു.
ചൈന ടെക് പ്രതിഭകൾക്ക് അനുമതിയില്ല
ഉദ്യോഗസ്ഥർക്ക് പോലും മറ്റു രാജ്യങ്ങളിലേക്ക് പോയി ജോലി ചെയ്യാൻ സാധിക്കാത്ത തരത്തിലുള്ള നിയന്ത്രണങ്ങളാണ് ചൈന ഏർപ്പെടുത്തിയിരിക്കുന്നത്. ചൈനീസ് കമ്പനികൾക്ക് ഇന്ത്യയിലേയും ദക്ഷിണേഷ്യയിലേയും നിർമ്മാണ കേന്ദ്രങ്ങളിലേക്ക് പോയി ഉത്പാദനം ചെയ്യുന്നത് തടയുകയാണ് ലക്ഷ്യം. ഈ നീക്കം ആപ്പിളിന്റെ ഐഫോൺ 17 ഉൽപാദനവും ഇന്ത്യയിലെ മറ്റ് ടെക് രംഗങ്ങളിലും കാര്യമായി ബാധിക്കും. ഇന്ത്യയിൽ നിലവിൽ ആഗോള ഐഫോൺ ഉത്പാദനത്തിന്റെ 20 ശതമാനം ആണ് ഉൽപാദിപ്പിച്ചുവരുന്നത്.
ചൈനീസ് വിദഗ്ധരുടെ കഴിവുകൾ മികച്ചത്
ചൈനീസ് അസംബ്ലി തൊഴിലാളികളുടെ കഴിവുകൾ മികച്ചതാണെന്നും അതുകൊണ്ടാണ് ചൈനയിലെ ആപ്പിളിന്റെ നിർമ്മാണ പ്രവർത്തനം അത്ര എളുപ്പത്തിൽ മാറ്റാൻ കഴിയാത്തതെന്നും മാറ്റാനാവില്ലാത്തതെന്നും ആപ്പിള്‍ സിഇഒ ടിം കുക്ക് തുറന്നു പറഞ്ഞിട്ടുണ്ട്. അതേസമയം, അമേരിക്കൻ മുൻ പ്രസിഡൻറ് ഡൊണാൾഡ് ട്രംപ്, ഐഫോൺ അമേരിക്കയിൽ നിർമ്മിക്കണമെന്നും വിദേശത്തെ ഉത്പാദനം അവസാനിപ്പിക്കണമെന്നും നിരന്തരം ആവശ്യപ്പെടുന്നത് ആപ്പിളിനെ സമ്മർദ്ദത്തിലാക്കിയിട്ടുണ്ട്. എന്നാൽ ഉയർന്ന ഉത്പാദന ചെലവുകൾ കാരണം അത് നടപ്പിലാകാൻ സാധ്യത കുറവാണ്.
ഉൽപാദനം അനിശ്ചിതത്വത്തിൽ
2026 വരെ ആപ്പിള്‍ ഐഫോണുകളുടെ ഭൂരിഭാഗവും ഇന്ത്യയിൽ നിർമ്മിക്കാൻ ലക്ഷ്യമിട്ടിരുന്നു. എങ്കിലും ഇപ്പോഴുള്ള പ്രൊഫഷണൽ വിദഗ്ധരുടെ കുറവും ചൈനയുടെ നിയന്ത്രണങ്ങളും, ഇന്ത്യയുടെ ഉത്പാദന സാധ്യതകൾക്ക് വിലങ്ങുതടിയാവുന്നു.
