കൊച്ചി: അൻസിബ ഹസനുമായുള്ള പ്രശ്നങ്ങൾക്ക് പിന്നാലെ തനിക്കെതിരെ കടുത്ത സൈബർ ആക്രമണം നടക്കുന്നുവെന്ന് പരാതി നൽകി നടി ലക്ഷ്മി പ്രിയ. കൊച്ചി ഇൻഫോപാർക്ക് സൈബർ പൊലീസിലാണ് ലക്ഷ്മി പ്രിയ പരാതി നൽകിയത്. അൻസിബയുടെ പരാതിയിൽ കഴമ്പില്ലെന്ന് പൊലീസ് റിപ്പോർട്ട് വന്നതിന് പിന്നാലെയാണ് തനിക്കെതിരെ സാമൂഹിക മാധ്യമങ്ങളിലൂടെ അധിക്ഷേപ പരാമർശങ്ങളുയർന്നത് എന്നാണ് ലക്ഷ്മി പ്രിയയുടെ പരാതി.
സ്ത്രീയെന്ന പരിഗണന പോലും നൽകാതെയാണ് തന്നെ ചിലർ സാമൂഹിക മാധ്യമങ്ങളിലൂടെ അപമാനിക്കുന്നതെന്നും ലക്ഷ്മി പ്രിയ പറഞ്ഞു. വളരെ ഭീകരമായ രീതിയിൽ തനിക്കെതിരെ സൈബർ ആക്രമണം നടന്നു കൊണ്ടിരിക്കുകയാണെന്നും അതാര് ചെയ്യിപ്പിച്ചാലും കുറ്റക്കാരെ കണ്ടെത്തി അർഹമായ ശിക്ഷ കൊടുക്കണമെന്ന് പറഞ്ഞാണ് താൻ പരാതി നൽകിയതെന്ന് ലക്ഷ്മി പ്രിയ പ്രതികരിച്ചു.
അതേസമയം അച്ചടക്ക നടപടിയുടെ ഭാഗമായി അമ്മ അൻസിബയ്ക്കും ലക്ഷ്മി പ്രിയയ്ക്കുമുൾപ്പെടെ കാരണം കാണിക്കൽ നോട്ടീസ് അയച്ചിരുന്നു. 21-ാം തീയതിയാണ് സംഘടനയുടെ വാര്ഷിക ജനറല് ബോഡി യോഗം നടക്കുക.
Related Post
