കുളത്തൂപ്പുഴ; മിനിലോറി വീടിന് മുന്നിലേക്ക് ഇടിച്ചു കയറി അപകടം. ചൊവ്വാഴ്ച പുലർച്ചെ കുളത്തൂപ്പുഴയിലാണ് അപക‌ടമുണ്ടായത്. തമിഴ്നാട്ടിൽ നിന്ന് കിളിമാനൂരിലേക്ക് പച്ചക്കറിയുമായി വന്ന മിനി ലോറി നിയന്ത്രണം വിട്ട് വീട്ടിലേക്ക് ഇടിച്ചുകയറുകയായിരുന്നു. തെന്മലയ്ക്കു സമീപം കുളത്തൂപ്പുഴ സ്വദേശി റിനു തോമസിന്റെ വീട്ടിലേക്കാണ് വണ്ടി ഇടിച്ചു കയറിയത്. വാഹനം ചുമരിലിടിച്ചു നിന്നതിനാൽ വൻ ദുരന്തം ഒഴിവായി. ഡ്രൈവർ ഉറങ്ങിപ്പോയതാണ് അപകട കാരണമെന്നു സംശയിക്കുന്നു.
അതേസമയം വീടിനു കേടുപാടുകൾ സംഭവിച്ചിട്ടുണ്ട്. വളവിനോടു ചേർന്നാണ് റിനു തോമസിന്റെ വീട്. ഇവിടെ അപകടങ്ങൾ പതിവാണെന്ന് ഇവർ പറയുന്നു. മുൻപും റിനു തോമസിന്റെ വീട്ടിലേക്ക് വാഹനങ്ങൾ ഇടിച്ചു കയറിയിട്ടുണ്ട്. ഈ പ്രദേശത്ത് മുന്നറിയിപ്പ് ബോർഡുകൾ സ്ഥാപിക്കണമെന്നാണ് നാട്ടുകാരുടെ ആവശ്യം.
