‘ അൽപമെങ്കിലും ഉളുപ്പും ലജ്ജയുമുണ്ടെങ്കിൽ വി.ഡി. സതീശൻ മാപ്പുപറയണം; നിങ്ങൾ നിയമം അനുസരിക്കുന്ന സംസ്ഥാനമാണെങ്കിൽ എന്തുകൊണ്ട് എഫ്.ഐ.ആർ. രജിസ്റ്റർ ചെയ്തില്ല, ഞങ്ങൾക്ക് നിങ്ങളെ കേൾക്കേണ്ടതില്ലയെന്നാണ് ഡിവിഷൻ ബെഞ്ച് ചോദിച്ചത് ’; പിണറായിയെയും കൂട്ടുപ്രതികളെയും സംരക്ഷിച്ചത് യു.ഡി.എഫ് സർക്കാരെന്ന് കെ.എം. ഷാജഹാൻ

ന്യൂഡൽഹി: സി.എം.ആർ.എൽ–എക്സാലോജിക് കേസിൽ സുപ്രീം കോടതി നടത്തിയ നിരീക്ഷണങ്ങൾ ചൂണ്ടിക്കാട്ടി പ്രതിപക്ഷ നേതാവ് വി.ഡി. സതീശനെതിരെയും യു.ഡി.എഫിനെതിരെയും രൂക്ഷവിമർശനവുമായി പരാതിക്കാരനായ കെ.എം. ഷാജഹാൻ. അൽപമെങ്കിലും ഉളുപ്പും ലജ്ജയുമുണ്ടെങ്കിൽ തന്നോട് വി.ഡി. സതീശൻ മാപ്പുപറയണമെന്ന് അദ്ദേഹം ആവശ്യപ്പെട്ടു. പിണറായി വിജയനെയും കൂട്ടുപ്രതികളെയും സംരക്ഷിക്കാൻ ശ്രമിച്ചത് യു.ഡി.എഫ് സർക്കാരാണെന്നും ഷാജഹാൻ ആരോപിച്ചു.

സംസ്ഥാന സർക്കാരിന്റെ അഡീഷണൽ അഡ്വക്കേറ്റ് ജനറലിനോട് എഫ്.ഐ.ആർ. രജിസ്റ്റർ ചെയ്യാത്തതിനെക്കുറിച്ച് സുപ്രീം കോടതി ചോദ്യം ഉന്നയിച്ചതായി ഷാജഹാൻ പറഞ്ഞു. നിയമം അനുസരിക്കുന്ന സംസ്ഥാനമാണെങ്കിൽ എന്തുകൊണ്ട് എഫ്.ഐ.ആർ. രജിസ്റ്റർ ചെയ്തില്ലെന്നും പരാതിക്കാരനെ കേൾക്കാനാണ് തങ്ങൾക്ക് താൽപ്പര്യമെന്നും കോടതി നിരീക്ഷിച്ചതായാണ് ഷാജഹാന്റെ വിശദീകരണം. കേസിൽ വിസിൽ ബ്ലോവറായി പ്രവർത്തിച്ച പരാതിക്കാരനെ കേൾക്കാനുള്ള കോടതിയുടെ താൽപ്പര്യം തനിക്ക് വലിയ അംഗീകാരമാണെന്നും അദ്ദേഹം മാധ്യമങ്ങളോട് പറഞ്ഞു.

ഹൈക്കോടതിയിൽ തന്നെ സത്യസന്ധതയില്ലാത്ത വ്യവഹാരിയെന്ന് വിശേഷിപ്പിച്ചതിന് പിന്നിൽ വി.ഡി. സതീശന്റെ നിർദേശമുണ്ടായിരുന്നുവെന്നും ഷാജഹാൻ ആരോപിച്ചു. കോടതിയിൽ സർക്കാർ അഭിഭാഷകർ ഉന്നയിച്ച കാര്യങ്ങളെല്ലാം തങ്ങളുടെ നിർദേശപ്രകാരമായിരുന്നുവെന്ന് സതീശൻ നേരത്തേ പത്രസമ്മേളനത്തിൽ വ്യക്തമാക്കിയിട്ടുണ്ടെന്നാണ് ഷാജഹാന്റെ വാദം. ഈ സാഹചര്യത്തിൽ പൊതുപ്രവർത്തകനായ തന്നോട് സതീശൻ മാപ്പുപറയണമെന്നും അദ്ദേഹം ആവശ്യപ്പെട്ടു.

പിണറായി വിജയന് ലഭിച്ച ഒരാഴ്ചത്തെ വിജിലൻസ് അന്വേഷണ സ്റ്റേ താൽക്കാലിക ആശ്വാസം മാത്രമാണെന്നും ഷാജഹാൻ പറഞ്ഞു. എഫ്.ഐ.ആറോ ഇ.സി.ഐ.ആറോ സ്റ്റേ ചെയ്തിട്ടില്ലെന്നാണ് അദ്ദേഹത്തിന്റെ വിശദീകരണം. എൻഫോഴ്സ്മെന്റ് ഡയറക്ടറേറ്റ് സെപ്റ്റംബർ ഏഴിന് നൽകിയ 26 പേജുള്ള റിപ്പോർട്ടിൽ പ്രഥമദൃഷ്ട്യാ കുറ്റകൃത്യം നടന്നതായി സൂചനയുണ്ടായിരുന്നിട്ടും അന്നുതന്നെ എഫ്.ഐ.ആർ. രജിസ്റ്റർ ചെയ്യാൻ തയാറായില്ലെന്നും അദ്ദേഹം ആരോപിച്ചു.

എഫ്.ഐ.ആർ. രജിസ്റ്റർ ചെയ്യുന്നതിൽ കാലതാമസം വരുത്തിയെന്നും കേസ് വിജിലൻസിന് കൈമാറുന്നതിന് പകരം ക്രൈംബ്രാഞ്ചിനും പ്രത്യേക അന്വേഷണ സംഘത്തിനും കൈമാറി അന്വേഷണം നീട്ടിക്കൊണ്ടുപോകാൻ ശ്രമിച്ചെന്നുമാണ് ഷാജഹാന്റെ ആരോപണം. പിണറായി വിജയനെയും കേസിലെ മറ്റ് പ്രതികളെയും സംരക്ഷിക്കാൻ ശ്രമിച്ചെന്ന ആരോപണത്തിൽ യു.ഡി.എഫ്. സർക്കാർ കേരളത്തിലെ ജനങ്ങളോടും കോൺഗ്രസ് പ്രവർത്തകരോടും മാപ്പുപറയണമെന്നും അദ്ദേഹം ആവശ്യപ്പെട്ടു.