തിരുവനന്തപുരം: ആർഎസ്എസ് സർസംഘചാലക് മോഹൻ ഭാഗവത് പങ്കെടുത്ത പ്രഭാഷണ പരിപാടിയിൽ പങ്കെടുക്കാൻ കേരളത്തിലെ മൂന്ന് സർവ്വകലാശാല വൈസ് ചാൻസലർമാർ പോയത് വലിയ രാഷ്ട്രീയ വിവാദത്തിന് വഴിവെക്കുന്നു. ആർഎസ്എസിന്റെ നൂറാം വാർഷികാഘോഷങ്ങളുമായി ബന്ധപ്പെട്ട സംഘാടകരായിട്ടാണ് വി.സിമാർ പങ്കെടുത്തതെന്നാണ് പുറത്തുവരുന്ന വിവരം.
ആരോഗ്യ സർവ്വകലാശാല വി.സി ഡോക്ടർ മോഹൻ കുന്നുമ്മൽ, എം.ജി സർവ്വകലാശാല വി.സി ഡോക്ടർ ഡി. മാവൂത്ത്, മലയാളം സർവ്വകലാശാല വി.സിയുടെ ചുമതലയുള്ള ഡോക്ടർ സി.ആർ. പ്രസാദ് എന്നിവരാണ് ആർഎസ്എസ് വേദിയിലെത്തിയത്. ഇതിൽ ഡോക്ടർ മാവൂത്ത് ബിജെപി അധ്യാപക സംഘടനാ നേതാവാണ്. മെയ് 31-ന് സർവീസിൽ നിന്നും വിരമിച്ചെങ്കിലും ഡോക്ടർ സി.ആർ. പ്രസാദിനെ മലയാളം സർവ്വകലാശാലയിൽ വി.സിയായി തുടരാൻ അനുവദിച്ചിരുന്നു.
അതുപോലെ നേരത്തെ ഇടതുപക്ഷ അധ്യാപക സംഘടനകളിൽ അംഗമായിരുന്ന പ്രസാദ് ഇപ്പോൾ ബിജെപി അനുഭാവിയാണെന്നാണ് വിവരം. വി.സിമാർ സംഘപരിവാർ വേദിയിൽ എത്തിയത് അതീവ ഗൗരവതരമാണെന്ന് സിപിഎം സംസ്ഥാന സെക്രട്ടറി എം.വി ഗോവിന്ദൻ പ്രതികരിച്ചു.
വിസിമാർ പങ്കെടുത്ത ന‌ടപടി ഉന്നത വിദ്യാഭ്യാസ മേഖലയിലെ കാവിവൽക്കരണത്തിന്റെ ഏറ്റവും ശ്രദ്ധേയമായ പ്രവർത്തനമാണെന്നും മതനിരപേക്ഷതയെ തകർക്കുന്ന നടപടിയാണെന്നും അദ്ദേഹം ആരോപിച്ചു. ഈ നടപടിക്ക് കോൺഗ്രസും യുഡിഎഫ് ഗവൺമെന്റും പൂർണ്ണമായി കൂട്ടുനിൽക്കുകയാണെന്നും എം.വി ഗോവിന്ദൻ ആരോപിച്ചു. ഇക്കാര്യത്തിൽ ഉന്നത വിദ്യാഭ്യാസ മന്ത്രി ഇക്കാര്യത്തിൽ വ്യക്തമായ മറുപടി പറയണമെന്നും, മതനിരപേക്ഷ ഉള്ളടക്കത്തോടെ ഇത്തരം നീക്കങ്ങളെ ജനാധിപത്യപരമായി പ്രതിരോധിക്കണമെന്നും അദ്ദേഹം ആവശ്യപ്പെട്ടു.
