കൊച്ചി: സംസ്ഥാന സ്കൂൾ കായികമേളയിലെ ഭക്ഷണത്തിൽ പുഴുവിനെ കണ്ടെത്തിയെന്ന വിവാദത്തിൽ അറസ്റ്റിലായ കായികാധ്യാപകൻ ജിജോ ജയിംസിനെ കോൺഗ്രസുകാരനായി ചിത്രീകരിച്ചുള്ള പ്രചാരണം തെറ്റാണെന്ന് യൂത്ത് കോൺഗ്രസ് നേതാവ് ജിന്റോ ജോൺ. ജിജോ നിലവിൽ കോൺഗ്രസിലോ കോൺഗ്രസ് അനുകൂല അധ്യാപക സംഘടനയിലോ അംഗമല്ലെന്നും 2021ൽ തന്നെ പാർട്ടി വിട്ടതാണെന്നും അദ്ദേഹം ഫെയ്‌സ്ബുക്ക് കുറിപ്പിൽ വ്യക്തമാക്കി.
2020ലെ തദ്ദേശ സ്വയംഭരണ തിരഞ്ഞെടുപ്പിൽ ജിജോ ജയിംസ് കോൺഗ്രസ് സ്ഥാനാർഥിയായി മത്സരിച്ചിരുന്നു. എന്നാൽ, തിരഞ്ഞെടുപ്പിൽ വിജയിച്ചത് കോൺഗ്രസ് വിമത സ്ഥാനാർഥിയായിരുന്നു. വിജയിയെ പിന്നീട് പാർട്ടിയിൽ തിരിച്ചെടുത്തതിൽ പ്രതിഷേധിച്ചാണ് ജിജോ കോൺഗ്രസ് വിട്ടതെന്നാണ് ജിന്റോ ജോണിന്റെ വിശദീകരണം. തുടർന്ന് അന്നത്തെ സി.പി.എം. ലോക്കൽ സെക്രട്ടറി ജോർജ്ജി ജോയിയുടെ നേതൃത്വത്തിൽ ഡി.വൈ.എഫ്.ഐ. അംഗത്വമെടുത്ത് പ്രവർത്തിച്ചുവെന്നും അദ്ദേഹം ആരോപിച്ചു.
കോൺഗ്രസിൽ പ്രവർത്തിച്ചിരുന്ന കാലത്ത് അധ്യാപക സംഘടനയായ കെ.പി.എസ്.ടി.എയിൽ ജിജോ അംഗമായിരുന്നുവെന്നും പാർട്ടി വിട്ടശേഷം അംഗത്വം പുതുക്കിയിട്ടില്ലെന്നും ജിന്റോ ജോൺ പറഞ്ഞു. കഴിഞ്ഞ അഞ്ച് വർഷമായി കോൺഗ്രസിന്റെയോ അനുബന്ധ സംഘടനകളുടെയോ പരിപാടികളിൽ പങ്കെടുക്കാത്ത വ്യക്തിയെ കോൺഗ്രസുകാരനായി ചിത്രീകരിക്കാൻ ചില മാധ്യമങ്ങളും ഇടത് കേന്ദ്രങ്ങളും ബോധപൂർവം ശ്രമിക്കുകയാണെന്നും അദ്ദേഹം കുറ്റപ്പെടുത്തി.
മുൻപ് കോൺഗ്രസിൽ പ്രവർത്തിച്ചിരുന്ന ടി.കെ. ഹംസ, പി. സരിൻ, കെ.പി. അനിൽകുമാർ, ലതിക സുഭാഷ്, പി.എസ്. പ്രശാന്ത് തുടങ്ങിയവർ ഇപ്പോൾ പ്രവർത്തിക്കുന്ന രാഷ്ട്രീയ പ്രസ്ഥാനങ്ങളുടെ പേരിൽ മാത്രമാണ് വിലയിരുത്തപ്പെടുന്നതെന്നും ജിന്റോ ജോൺ ചൂണ്ടിക്കാട്ടി. ശബരിമല സ്വർണക്കൊള്ളക്കേസിൽ അറസ്റ്റിലായ പ്രശാന്ത് മുൻപ് കോൺഗ്രസ് ചിഹ്നത്തിൽ മത്സരിച്ച വ്യക്തിയാണെങ്കിലും പഴയ ചിത്രം ഉപയോഗിച്ച് കോൺഗ്രസിനെ പ്രതിക്കൂട്ടിലാക്കുന്നില്ലെന്നും അദ്ദേഹം വാദിച്ചു.
ജിജോ ജയിംസിന്റെ മുൻകാല രാഷ്ട്രീയബന്ധം ഉയർത്തിക്കാട്ടി കോൺഗ്രസിനെ അപകീർത്തിപ്പെടുത്താനുള്ള നീക്കമാണ് നടക്കുന്നതെന്നും ഈ പ്രചാരണങ്ങൾക്ക് അടിസ്ഥാനമില്ലെന്നുമാണ് ജിന്റോ ജോണിന്റെ നിലപാട്. അതേസമയം, ജിജോ ജയിംസിന്റെ നിലവിലെ രാഷ്ട്രീയബന്ധത്തെക്കുറിച്ചുള്ള പരാമർശങ്ങൾ അദ്ദേഹത്തിന്റെ ഫെയ്‌സ്ബുക്ക് പോസ്റ്റിൽ ഉന്നയിച്ച വാദങ്ങളാണ്.
