തിരുവനന്തപുരം: സംസ്ഥാന സർക്കാരിന്റെ പൊതുഭരണ വകുപ്പിന്റെ ഔദ്യോഗിക വെബ്സൈറ്റ് ഹാക്ക് ചെയ്തതായി റിപ്പോർട്ട്. gad.kerala.gov.in എന്ന വെബ്സൈറ്റിലാണ് പാകിസ്ഥാൻ അനുകൂല സന്ദേശങ്ങളും പാകിസ്ഥാൻ പതാകയും പ്രത്യക്ഷപ്പെട്ടത്.
വെബ്സൈറ്റിന്റെ ഹോം പേജിന് പകരം ‘പാകിസ്ഥാൻ സിന്ദാബാദ്’, ‘വി ആർ പാകിസ്ഥാനി ഹാക്കേഴ്സ്’ തുടങ്ങിയ സന്ദേശങ്ങളാണ് പ്രത്യക്ഷപ്പെട്ടത്. ‘Team BlackLeets’ എന്ന പേരിലുള്ള സംഘമാണ് ഹാക്കിങ്ങിന് പിന്നിലെന്ന് സൈറ്റിൽ അവകാശപ്പെട്ടിരുന്നെങ്കിലും ഇക്കാര്യം ഔദ്യോഗികമായി സ്ഥിരീകരിച്ചിട്ടില്ല.
‘Pak Cyber Attacker’, ‘Dead Adders Crew’, ‘Pak Ghost Army’, ‘Pak Cyber Skulls’, ‘Pak Cyber Thunders’ തുടങ്ങിയ പേരുകളും ഹാക്ക് ചെയ്ത പേജിൽ രേഖപ്പെടുത്തിയിരുന്നു. വെബ്സൈറ്റിന്റെ നിയന്ത്രണം കൈക്കലാക്കിയതായി അവകാശപ്പെടുന്ന തരത്തിലായിരുന്നു ഹോം പേജ് മാറ്റിയത്.
അതേസമയം, ഹോം പേജ് മാത്രമാണോ മാറ്റിയത്, സെർവറിലേക്കോ ഡാറ്റാബേസിലേക്കോ ഹാക്കർമാർക്ക് പ്രവേശനം ലഭിച്ചിട്ടുണ്ടോ തുടങ്ങിയ കാര്യങ്ങൾ വ്യക്തമല്ല. സംഭവത്തിന് പിന്നാലെ വെബ്സൈറ്റ് സാധാരണ നിലയിൽ ലഭ്യമല്ലെന്നും റിപ്പോർട്ടുണ്ട്. സൈറ്റ് അധികൃതർ സുരക്ഷാ പരിശോധനയുടെ ഭാഗമായി താൽക്കാലികമായി ഓഫ്‌ലൈൻ ചെയ്തതാണോ എന്നതിലും ഔദ്യോഗിക വിശദീകരണം പുറത്തുവന്നിട്ടില്ല.
കേരള സർക്കാരിന്റെ ഔദ്യോഗിക പൊതുഭരണ വകുപ്പ് വെബ്സൈറ്റിൽ സർക്കാർ ഉത്തരവുകൾ, സർക്കുലറുകൾ, വിവിധ ഭരണപരമായ വിവരങ്ങൾ എന്നിവ ലഭ്യമാക്കുന്നുണ്ട്.
നേപ്പാളിൽ വീണ്ടും ദുരന്തം; ഹിംലങ് ഹിമാൽ ബേസ് ക്യാമ്പിൽ ഹിമപാതം, 10 പേരെ കാണാതായി
