കണ്ണൂർ: വനിതാ ജയിലിലെ ശിക്ഷാതടവുകാരിയിൽനിന്ന് 0.30 ഗ്രാം എംഡിഎംഎ പിടികൂടി. ഇരിട്ടി സ്വദേശിനിയായ റുബൈദയിൽനിന്നാണ് മയക്കുമരുന്ന് കണ്ടെടുത്തത്. സഹതടവുകാരിയായ സാബിറ നൽകിയതാണ് എംഡിഎംഎയെന്നാണ് റുബൈദയുടെ മൊഴി. തിങ്കളാഴ്ച വൈകിട്ടായിരുന്നു സംഭവം.
കേസുമായി ബന്ധപ്പെട്ട് ന്യൂമാഹി കോടതിയിൽ ഹാജരാക്കിയ ശേഷം റുബൈദയെ തിരികെ ജയിലിലെത്തിച്ചിരുന്നു. തുടർന്ന് തടവുകാർ വെള്ളം കുടിക്കാനായി ഗ്ലാസ് എടുത്തപ്പോഴാണ് അധികൃതർക്ക് സംശയം തോന്നിയത്. ഇതിന്റെ അടിസ്ഥാനത്തിൽ നടത്തിയ പരിശോധനയിലാണ് എംഡിഎംഎ കണ്ടെത്തിയത്. റുബൈദയും സാബിറയും മയക്കുമരുന്ന് കേസുകളിൽ ശിക്ഷിക്കപ്പെട്ട് ജയിലിലെത്തിയവരാണ്. സംഭവത്തിൽ ജയിൽ സൂപ്രണ്ടിന്റെ പരാതിയുടെ അടിസ്ഥാനത്തിൽ കണ്ണൂർ ടൗൺ പോലീസ് കേസെടുത്തു. ജയിലിനുള്ളിൽ മയക്കുമരുന്ന് എത്തിയ സാഹചര്യം സംബന്ധിച്ച് കൂടുതൽ അന്വേഷണം നടത്തും.
