കാസർഗോഡ്: കാഞ്ഞങ്ങാട് സൗത്ത് ഗവൺമെൻറ് വൊക്കേഷണൽ ഹയർ സെക്കൻ്ററി സ്‌കൂളിൻ്റെ മേൽക്കൂര ശക്തമായ കാറ്റിൽ പറന്നു പോയി. 8 ക്ലാസ് റൂമുകൾക്ക് മുകളിലുള്ള റൂഫിംഗ് ഷീറ്റാണ് ശക്തമായ കാറ്റിൽ പറന്നു പോയത്. മേൽക്കൂരയുടെ ഷീറ്റ് ഉൾപ്പെടെയുള്ള ഭാഗം തെങ്ങിൻ്റെ മുകളിൽ കുടുങ്ങിക്കിടക്കുകയാണ്. ബാക്കിയുള്ള ഷീറ്റുകൾ തൊട്ടടുത്ത പറമ്പിലാണ് വീണത്. ഇന്നലെ രാത്രി എട്ട് മണിക്കാണ് സംഭവം നടന്നത്. വ്യാപകമായ നാശം സംഭവിച്ചതിനാൽ ഇന്ന് സ്കൂളിന് അവധി പ്രഖ്യാപിച്ചു.
കാസർഗോഡ് മടക്കരയിൽ മീൻപിടിക്കാൻ പോയ വള്ളം നീലേശ്വരം അഴിത്തല പുലിമുട്ടിൽ തട്ടി തകർന്നു. വള്ളത്തിലുണ്ടായിരുന്ന ഒഡിഷ സ്വദേശികളായ അഞ്ച് തൊഴിലാളികൾ രക്ഷപ്പെട്ടുവെങ്കിലും വള്ളം തകർന്ന് എൻജിനും വലയും ഉൾപ്പെടെ നഷ്ടമായി.
