തിരുവനന്തപുരം: സംസ്ഥാനത്ത് മരുന്നുക്ഷാമത്തിനു കാരണം കഴിഞ്ഞ സർക്കാരിന്റെ പിടിപ്പുകേടാണെന്ന് ആരോഗ്യമന്ത്രി കെ.മുരളീധരൻ നിയമസഭയിൽ. ആരോഗ്യമേഖലയിലെ വിവിധ പ്രശ്‌നങ്ങൾ ചൂണ്ടിക്കാട്ടി പ്രതിപക്ഷം നൽകിയ അടിയന്തരപ്രമേയ നോട്ടിസിനു മറുപടി നൽകുകയായിരുന്നു മന്ത്രി. അധികാരനഷ്ടത്തിന്റെ സങ്കടത്തിലുള്ള രോഗത്തിനുള്ള മരുന്ന് മാത്രമേ സ്‌റ്റോക്കില്ലാതെയുള്ളു എന്നും ബാക്കി രോഗങ്ങൾക്കു മരുന്നുണ്ടെന്നും മന്ത്രി മുരളീധരൻ പറഞ്ഞത് സഭയിൽ ബഹളത്തിനിടയാക്കി. മന്ത്രിയെന്ന നിലയിൽ ഇത്തരത്തിൽ മറുപടി പറയുന്നതു ശരിയല്ലെന്ന് പ്രതിപക്ഷ നേതാവ് പിണറായി വിജയൻ പറഞ്ഞു.
സഭയിൽ സ്വീകരിക്കാൻ പാടില്ലാത്ത കാര്യങ്ങൾ പറയുമ്പോൾ സ്പീക്കർ പരാമർശം നടത്തണമെന്നും പിണറായി വിജയൻ പറഞ്ഞു. മരുന്നുവാങ്ങലിനു പിന്നിലെ ഡീലുകൾ പരിശോധിക്കപ്പെടണമെന്നും പ്രതിപക്ഷ നേതാവ് പറഞ്ഞു. വൻകിട കോർപറേറ്റ് ആശുപത്രികൾക്കു ചികിത്സാരംഗം അടിയറവു വയ്ക്കാനുള്ള ശ്രമമാണോ എന്നു സംശയിക്കണമെന്നും പിണറായി വിജയൻ പറഞ്ഞു. കഴിഞ്ഞ സർക്കാർ കൃത്യസമയത്ത് പർച്ചേസ് ഓർഡർ നൽകാതിരുന്നതും മരുന്നുകമ്പനികൾക്കു ഭീമമായ തുക കുടിശിക നൽകാതിരുന്നതും മൂലമാണ് 26 മരുന്നുകൾക്കു അൽപം ക്ഷാമമുണ്ടായതെന്ന് മന്ത്രി പറഞ്ഞു. ലോക്കൽ പർച്ചേസ് നടത്തിയും മരുന്ന് സ്‌റ്റോക്കില്ലാത്ത ഇടത്തേക്ക് റീഅറേഞ്ച് ചെയ്തും പ്രശ്‌നം പരിഹരിച്ചുവെന്നും മന്ത്രി പറഞ്ഞു.
ഇടനിലക്കാരെ ഒഴിവാക്കി മരുന്നു വാങ്ങാനുള്ള നടപടി ആരംഭിച്ചുവെന്നും മന്ത്രി വ്യക്തമാക്കി. കഴിഞ്ഞ പത്തുവർഷവും മരുന്നുവാങ്ങുന്നത് സർക്കാർ കമ്മിഷൻ വാങ്ങിയിരുന്നു. അമേരിക്കൻ കമ്പനിയായ ബ്ലാക്ക് സ്‌റ്റോണിന്റെ ഏജന്റുമാരായി സ്വകാര്യ കമ്പനികൾക്കു വേണ്ടി പണിയെടുക്കുകയാണ് പ്രതിപക്ഷമെന്നും മുരളീധരൻ വിമർശിച്ചു. മന്ത്രിയുടെ മറുപടിയുടെ അടിസ്ഥാനത്തിൽ അടിയന്തരപ്രമേയം അവതരിപ്പിക്കുന്നതിനു സ്പീക്കർ അനുമതി നിഷേധിച്ചു. ഇതിൽ പ്രതിഷേധിച്ച് പ്രതിപക്ഷം സഭ ബഹിഷ്‌കരിച്ചു.
