അനധികൃത സ്വത്ത് സമ്പാദന കേസില്‍ ജെ. ജയലളിതയിൽനിന്നു പിടിച്ചെടുത്ത സ്വത്ത് വിട്ടുകിട്ടണമെന്നാവശ്യപ്പെട്ട് അനന്തരവൾ ജെ. ദീപ സുപ്രീംകോടതിയിൽ പ്രത്യേകാനുമതി ഹർജി നൽകി. സ്വത്ത് ദീപയ്ക്ക് വിട്ടുനൽകാനാവില്ലെന്ന കർണാടക ഹൈക്കോടതി വിധിയെ ചോദ്യംചെയ്താണ് ഹർജി.
2016 ഡിസംബറില്‍ ജയലളിതയുടെ മരണശേഷം അവരെ കുറ്റവിമുക്തരാക്കിയതിനെതിരായ അപ്പീല്‍ തള്ളിയതിനാല്‍, കേസുമായി ബന്ധപ്പെട്ട് കണ്ടുകെട്ടിയ എല്ലാ ജംഗമ, സ്ഥാവര സ്വത്തുക്കളും തിരികെ അവകാശപ്പെടാന്‍ അവകാശമുണ്ടെന്ന് അവരുടെ അനന്തരാവകാശികള്‍ സുപ്രീം കോടതിയെ അറിയിച്ചു.
കര്‍ണാടക ഹൈക്കോടതിയുടെ ഉത്തരവിനെത്തുടര്‍ന്ന് 2025 ജനുവരി 29-ന് പ്രത്യേക കോടതി കണ്ടുകെട്ടിയ സ്വത്തുക്കള്‍ തമിഴ്നാട് സര്‍ക്കാരിന് കൈമാറാന്‍ ഉത്തരവ് പുറപ്പെടുവിച്ചതായും സ്വത്തുക്കള്‍ സംസ്ഥാന സര്‍ക്കാരിന് കൈമാറാന്‍ ആവശ്യമായ ക്രമീകരണങ്ങള്‍ ചെയ്യാന്‍ ബെംഗളൂരു സിറ്റി സിവില്‍ കോടതി രജിസ്ട്രാറോട് നിര്‍ദ്ദേശിച്ചതായും ഹര്‍ജിയില്‍ ചൂണ്ടിക്കാട്ടുന്നു.
Related Post
ജയലളിതയെ കുറ്റവിമുക്തയാക്കിയ ഹൈക്കോടതി ഉത്തരവിനെ കര്‍ണാടക സംസ്ഥാനം ചോദ്യം ചെയ്തിരുന്നുതായി ഹര്‍ജിയില്‍ പറയുന്നു. അതേസമയം വിചാരണ നടക്കുന്നതിനിടെ അവര്‍ മരിച്ചതിനാല്‍, അവരുടെ മരണശേഷം അവര്‍ക്കെതിരായ ക്രിമിനല്‍ അപ്പീലുകള്‍ അവസാനിച്ചതായും ഹര്‍ജിയില്‍ പറയുന്നു.
അപ്പീല്‍ അവസാനിച്ചതിനാല്‍, ജപ്തി ചെയ്ത സ്വത്ത് കണ്ടുകെട്ടാനുള്ള പ്രത്യേക കോടതിയുടെ നിര്‍ദ്ദേശം ബാധകമല്ലെന്ന് ഹര്‍ജിയില്‍ പറയുന്നു.
ജയലളിതയ്ക്കെതിരായ നിയമനടപടികൾ അവസാനിപ്പിച്ച സാഹചര്യത്തിൽ സ്വത്ത് അനന്തരാവകാശികൾക്ക് വിട്ടുകിട്ടണമെന്നാണ് ജയലളിതയുടെ സഹോദരൻ ജയകുമാറിന്റെ മകളായ ദീപയുടെ വാദം.
ജയലളിതയുടെ 27 കിലോഗ്രാം സ്വർണാഭരണങ്ങളും വജ്രാഭരണങ്ങളും 11,344 സാരി, 250 ഷാൾ, 750 ജോ‍ഡി ചെരിപ്പ് എന്നിവയാണ് റെയ്ഡിൽ പിടിച്ചെടുത്തത്. സ്വത്തുകേസ് കർണാടകത്തിലെ കോടതിയിലേക്കു മാറ്റിയതോടെ പിടിച്ചെടുത്ത വസ്തുക്കൾ കർണാടകത്തിലേക്കു കൊണ്ടുപോയി.
അനധികൃത സ്വത്തുകേസിനെത്തുടർന്ന് ജയലളിതയുടെ ചെന്നൈ പോയസ് ഗാർഡനിലെ വസതിയിൽനിന്ന് 1996-ൽ പിടിച്ചെടുത്ത സ്വർണവും വജ്രവും വസ്ത്രങ്ങളുമടങ്ങുന്ന സ്വത്തുവകകൾ ഇപ്പോൾ കർണാടക സർക്കാരിന്റെ കൈവശമാണുള്ളത്. അവ തമിഴ്‌നാടിന് വിട്ടുകൊടുക്കാൻ കർണാടക ഹൈക്കോടതി കഴിഞ്ഞയാഴ്ച ഉത്തരവിട്ടിരുന്നു.
