തങ്ങളുടെ ടൂത്ത് പേസ്റ്റ് വിൽപന കുറഞ്ഞതിൽ വിചിത്ര കണ്ടുപിടിത്തവുമായി കോൾഗേറ്റ് കമ്പനി. വിൽപന കുറഞ്ഞത് ഇന്ത്യക്കാർ പല്ല് തേക്കാത്തതിനാലാണെന്നാണ് കോൾഗേറ്റ് ഉയർത്തുന്ന വാദം.തുടർച്ചയായി മൂന്നാം തവണയാണ് ടൂത്ത് പേസ്റ്റ് വിൽപനയിൽ കോൾഗേറ്റ് ഇടിവ് രേഖപ്പെടുത്തുന്നത്. നഗരങ്ങളിലാണ് കോൾഗേറ്റിൻ്റെ വിപണിയിൽ വൻ ഇടിവ് രേഖപ്പെടുത്തിയത്. ഇതോടെയാണ് ഇന്ത്യക്കാർ പല്ല് തേക്കുന്നില്ല എന്ന നിർവചനത്തിൽ കോൾഗേറ്റ് എത്തിയത്. ഇന്ത്യയിലെ ഉപഭോക്താക്കൾ കുറച്ചു ടൂത്ത് പേസ്റ്റ് മാത്രമേ പല്ലുതേക്കാൻ ഉപയോഗിക്കുന്നുള്ളൂവെന്ന് നേരത്തെ കോൾഗേറ്റ് പറഞ്ഞിരുന്നു.
ഇന്ത്യയിൽ കോൾഗേറ്റ് കമ്പനിയുടെ വിൽപ്പന കുത്തനെ ഇടിഞ്ഞിരിക്കുകയാണ്. ഒരു സമയത്ത് രാജ്യത്തെ ടൂത്ത് പേസ്റ്റ് വിപണിയുടെ പകുതിയും നിയന്ത്രിക്കുന്നത് കോൾഗേറ്റ് ആയിരുന്നു. അതേസമയം കോൾഗേറ്റിന് അടുത്ത് കാലത്തൊന്നും ഇനി വിപണി തിരിച്ചു പിടിക്കാൻ ക‍ഴിയില്ലെന്ന് ആഗോള ചീഫ് എക്സിക്യൂട്ടീവ് നോയൽ വലയ്സ് പറഞ്ഞു. കഴിഞ്ഞ വർഷം സെപ്റ്റംബർ പാദത്തെ അപേക്ഷിച്ച് വരുമാനത്തിൽ 6.3 ശതമാനത്തിൻ്റെ കുറവാണ് കമ്പനിക്കുണ്ടായത്. ടൂത്ത് പേസ്റ്റ് അടക്കമുള്ള ദന്ത സംരക്ഷണ ഉത്പന്നങ്ങൾക്ക് ജിഎസ്ടി 18 ശതമാനത്തിൽ നിന്ന് അഞ്ച് ശതമാനമായി കുറച്ചിട്ടും കമ്പനിയുടെ വിൽപന ഇത്തവണ കൂടിയില്ല.
