ന്യൂഡൽഹി: അതിർത്തിയിൽ പട്രോളിങ്ങിനിടെ അബദ്ധത്തിൽ ബംഗ്ലാദേശിലേക്ക് കടന്ന ഇന്ത്യൻ ജവാനെ ബോർഡർ ഗാർഡ് ബംഗ്ലാദേശ് (ബി.ജി.ബി) കസ്റ്റഡിയിലെടുത്തു. സ്വാഭാവിക അതിർത്തി അടയാളങ്ങൾ വ്യക്തമല്ലാത്ത മേഖലയിലൂടെ സഞ്ചരിക്കുന്നതിനിടെ വഴിതെറ്റിയാണ് ജവാൻ അതിർത്തി കടന്നതെന്നാണ് ഇന്ത്യൻ സൈനിക ഉദ്യോഗസ്ഥർ നൽകുന്ന വിശദീകരണം.
സംഭവം ശ്രദ്ധയിൽപ്പെട്ട ഉടൻ ബംഗ്ലാദേശ് സൈനികർ ജവാനെ തടഞ്ഞുവെക്കുകയായിരുന്നു. തുടർന്ന് വിവരം ഉന്നത ബി.എസ്.എഫ് ഉദ്യോഗസ്ഥരെ അറിയിച്ചു. ജവാന്റെ സുരക്ഷ ഉറപ്പാക്കുന്നതിനും സുരക്ഷിതമായി ഇന്ത്യയിലേക്ക് തിരിച്ചെത്തിക്കുന്നതിനുമുള്ള നടപടികളും ആരംഭിച്ചു.
അതിർത്തി പ്രദേശങ്ങളിൽ പതിവ് നിരീക്ഷണത്തിനിടെ അബദ്ധത്തിൽ അതിർത്തി കടക്കുന്ന സംഭവങ്ങൾ മുൻപും ഉണ്ടായിട്ടുണ്ടെന്നും ഇത്തരം സാഹചര്യങ്ങളിൽ പരസ്പര ധാരണയോടെയാണ് ഇരു രാജ്യങ്ങളുടെയും സേനകൾ പ്രവർത്തിക്കാറുള്ളതെന്നും അധികൃതർ ചൂണ്ടിക്കാട്ടി.
ജവാനെ സുരക്ഷിതമായി ഇന്ത്യയിലേക്ക് തിരിച്ചെത്തിക്കുന്നതിനായി ബി.എസ്.എഫും ബി.ജി.ബിയും തമ്മിൽ ചർച്ചകൾ പുരോഗമിക്കുകയാണ്. ഉന്നതതല ഫ്ലാഗ് മീറ്റിങ് ഉൾപ്പെടെയുള്ള സൈനികതല ചർച്ചകളിലൂടെ പ്രശ്നം പരിഹരിക്കാനാണ് നീക്കം. ജവാന്റെ കൈവശമുണ്ടായിരുന്ന ആയുധങ്ങളും മറ്റ് ഉപകരണങ്ങളും സുരക്ഷിതമാണെന്ന് ഉറപ്പുവരുത്തുന്നതിനൊപ്പം നടപടിക്രമങ്ങൾ വേഗത്തിലാക്കാനും ശ്രമം നടക്കുന്നുണ്ട്.
ഇന്ത്യയും ബംഗ്ലാദേശും തമ്മിലുള്ള അതിർത്തി സുരക്ഷാ സഹകരണ കരാറുകളുടെയും നിലവിലുള്ള പ്രോട്ടോക്കോളുകളുടെയും അടിസ്ഥാനത്തിലാണ് പ്രശ്നപരിഹാര നീക്കങ്ങൾ. ചർച്ചകൾ പൂർത്തിയാകുന്നതോടെ ജവാനെ ഔദ്യോഗികമായി ബി.എസ്.എഫിന് കൈമാറുമെന്നാണ് പ്രതീക്ഷ.