റാഞ്ചി: ടെസ്റ്റിലെ തോൽവിക്ക് പകരം വീട്ടൽ മാത്രമല്ല, ഒരുപിടി റെക്കോർഡുകൾ കട‌പുഴകിവീണ മത്സരം കൂടിയായിരുന്നു ഞായറാഴ്ച ദക്ഷിണാഫ്രിക്കയ്‌ക്കെതിരായ ഇന്ത്യയുടെ ഒന്നാം ഏകദിനം. ഈ റെക്കോർഡിനു തുടക്കമിട്ടതാകട്ടെ മുൻ ഇന്ത്യൻ നായകൻ രോഹിത് ശർമയും. ഏകദിന ഫോർമാറ്റിൽ ഏറ്റവും കൂടുതൽ സിക്‌സർ നേടുന്ന താരമെന്ന ചരിത്രനേട്ടമാണ് രോഹിത് സ്വന്തമാക്കിയത്.
മത്സരത്തിൽ 51 പന്തിൽ നിന്ന് 57 റൺസെടുത്താണ് താരം പുറത്തായത്. അഞ്ചു ഫോറുകളും മൂന്ന് സിക്‌സറുമടങ്ങുന്നതായിരുന്നു ഇന്നിങ്സ്. മൂന്ന് സിക്‌സർ നേടിയതോടെ ഏകദിനത്തിലെ താരത്തിന്റെ ആകെ സിക്‌സറുകളുടെ എണ്ണം 352 ആയി. പാക്കിസ്ഥാൻ താരം ഷാഹിദ് അഫ്രീദിയാണ് പട്ടികയിൽ രണ്ടാമത്. 351 സിക്‌സറുകളാണ് അഫ്രീദിയുടെ പേരിലുള്ളത്.
അതേസമയം അന്താരാഷ്ട്ര ക്രിക്കറ്റിലെ 83-ാമത്തെ സെഞ്ചുറിയും കോലി റാഞ്ചിയിൽ സ്വന്തമാക്കി. കൂടാതെ ഏകദിനത്തിലെ 52-ാമത്തെ സെഞ്ചുറിയും. ഇതോടെ ഒരു ഫോർമാറ്റിൽ ഏറ്റവും കൂടുതൽ സെഞ്ചുറി നേടുന്ന താരമെന്ന നേട്ടവും സച്ചിനെ മറികടന്ന് കോലി സ്വന്തം പേരിലാക്കി. അന്താരാഷ്ട്ര ക്രിക്കറ്റിൽ ഏറ്റവും കൂടുതൽ സെഞ്ചുറി നേടിയവരുടെ പട്ടികയിൽ രണ്ടാമനാണ് താരം. 100 സെഞ്ചുറി നേടിയ സച്ചിൻ തെണ്ടുൽക്കറാണ് പട്ടികയിൽ തലപ്പത്ത്. ടെസ്റ്റിൽ 30 സെഞ്ചുറി നേടിയ കോലിക്ക് ഒരു ടി20 സെഞ്ചുറിയുമുണ്ട്.
Related Post
ഇതിനിടെ ദക്ഷിണാഫ്രിക്കയെ 17 റൺസിന് ഇന്ത്യ കീഴടക്കുകയും ചെയ്തതോടെ വിജയം ഇരട്ടിമധുരമുള്ളതായി. ഇന്ത്യ ഉയർത്തിയ 350 റൺസ് വിജയലക്ഷ്യം പിന്തുടർന്ന ദക്ഷിണാഫ്രിക്ക 332 റൺസിന് ഔൾഔട്ടായി. ആദ്യ ഘട്ടത്തിൽ തകർച്ച നേരിട്ട ദക്ഷിണാഫ്രിക്കയ്ക്ക് മാത്യു ബ്രീറ്റ്സ്കെ, മാർകോ യാൻസൻ, ഡെവാൾഡ് ബ്രവിസ്, ടോണി ഡി സോർസി, കോർബിൻ ബോഷ് എന്നിവരുടെ ഇന്നിങ്സുകളാണ് രക്ഷയായത്. ഇന്ത്യയ്ക്കുവേണ്ടി സെഞ്ചുറിയുമായി കോലി തിളങ്ങിയപ്പോൾ ക്യാപ്റ്റൻ കെ.എൽ. രാഹുലും രോഹിത് ശർമയും അർധസെഞ്ചുറി തികച്ചു. ദക്ഷിണാഫ്രിക്കയ്‌ക്കെതിരായ ഏകദിന ക്രിക്കറ്റ് പരമ്പരയിലെ ആദ്യ മത്സരമാണിത്.
അതേസമയം ദക്ഷിണാഫ്രിക്കൻ ഇന്നിങ്സിലെ രണ്ടാം ഓവർ എറിയാനെത്തിയ ഹർഷിത് റാണ വിറപ്പിച്ചാണ് തുടങ്ങിയത്. ഓവറിലെ ആദ്യ പന്തിലും രണ്ടാം പന്തിലും താരം വിക്കറ്റെടുത്തു. റിക്കൽട്ടെണും ഡികോക്കും ഡക്കായി മടങ്ങി. എയ്ഡൻ മാർക്രമിനെ(7) അർഷ്ദീപ് സിങ്ങും കൂടാരം കയറ്റിയതോടെ ദക്ഷിണാഫ്രിക്ക 11-3 എന്ന നിലയിലായി. പിന്നീട് ടോണി ഡി സോർസിയും മാത്യു ബ്രീറ്റ്‌സ്‌കെയും ചേർന്ന് രക്ഷാപ്രവർത്തനം ആരംഭിച്ചു.
എങ്കിലും സ്‌കോറുയർത്തിയ ഇരുവരും ടീമിനെ 70 കടത്തി. പിന്നാലെ 39 റൺസെടുത്ത സോർസി പുറത്തായി. അഞ്ചാം വിക്കറ്റിൽ ബ്രവിസുമായി ചേർന്നും ബ്രീറ്റ്സ്കെ കൂട്ടുകെട്ട് പടുത്തുയർത്തി. അർധസെഞ്ചുറി കൂട്ടുകെട്ടുയർത്തിയതോടെ ദക്ഷിണാഫ്രിക്ക 130 ലെത്തി. 37 റൺസെടുത്ത ബ്രവിസിനെ റാണ മടക്കിയതോടെ പ്രോട്ടീസ് പ്രതിരോധത്തിലായി. എന്നാൽ പിന്നീടിറങ്ങിയ മാർകോ യാൻസൻ വെടിക്കെട്ട് ബാറ്റിങ് പുറത്തെടുത്തു.
22 ഓവറിൽ 134-5 എന്ന നിലയിൽ തകർന്നടിഞ്ഞ ദക്ഷിണാഫ്രിക്ക 30 ഓവറിൽ 206 ലെത്തി. ഇന്ത്യൻ ബൗളർമാരെ തകർത്തടിച്ച യാൻസൻ 26 പന്തിൽ നിന്ന് അർധസെഞ്ചുറി തികച്ചു. അർധസെഞ്ചുറിയുമായി ബ്രീറ്റ്‌സ്‌കെയും ക്രീസിൽ നിലയുറപ്പിച്ചതോടെ ഇന്ത്യ പരുങ്ങലിലായി. എന്നാൽ കുൽദീപ് യാദവ് എറിഞ്ഞ 34-ാം ഓവറിൽ കളിയുടെ ഗതി മാറി. യാൻസനെയും ബ്രീറ്റ്സ്കെയെയും പുറത്താക്കി കുൽദീപ് ഇന്ത്യക്ക് ജയപ്രതീക്ഷ സമ്മാനിച്ചു. യാൻസൻ 39 പന്തിൽ നിന്ന് 70 റൺസെടുത്താണ് മടങ്ങിയത്. ബ്രീറ്റ്സ്കെ 72 റൺസെടുത്ത് പുറത്തായി. അതോടെ ദക്ഷിണാഫ്രിക്ക പ്രതിരോധത്തിലായി.
പിന്നീട് എട്ടാം വിക്കറ്റിൽ കോർബിൻ ബോഷും പ്രിനലൻ സുബ്രയാനും ചേർന്ന് നിർണായക കൂട്ടുകെട്ട് പടുത്തുയർത്തിയത് ഇന്ത്യയെ കുഴക്കി. ഇരുവരും ടീമിനെ 270 ലെത്തിച്ചു. 17 റൺസെടുത്ത സുബ്രയാനെ കൂടാരം കയറ്റി കുൽദീപ് വീണ്ടും പ്രതീക്ഷ നൽകി. എന്നാൽ കോർബിൻ നാന്ദ്രെ ബർഗറുമായി ചേർന്നും കൂട്ടുകെട്ടുണ്ടാക്കിയതോടെ ടീം 300 കടന്നു. കോർബിൻ അർധസെഞ്ചുറിയുമായി പ്രോട്ടീസിന് പ്രതീക്ഷ നൽകിയെങ്കിലും 332 ൽ നിൽക്കേ കോർബിൻ പുറത്തായതോടെ പതനം പൂർത്തിയായി. കോർബിൻ 67 റൺസെടുത്തു.
നേരത്തേ നിശ്ചിത 50 ഓവറിൽ ഇന്ത്യ എട്ടു വിക്കറ്റ് നഷ്ടത്തിൽ 349 റൺസാണെടുത്തത്. ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യയ്ക്ക് തുടക്കത്തിൽ തന്നെ ഓപ്പണർ യശസ്വി ജയ്‌സ്വാളിനെ നഷ്ടമായി. 18 റൺസ് മാത്രമാണ് താരത്തിന് നേടാനായത്. എന്നാൽ രണ്ടാം വിക്കറ്റിൽ ഒന്നിച്ച വിരാട് കോലിയും രോഹിത് ശർമയും ഇന്ത്യൻ ഇന്നിങ്‌സിനെ മുന്നോട്ടു നയിച്ചു. തുടക്കത്തിൽ പ്രോട്ടീസ് ബൗളർമാരെ ശ്രദ്ധയോടെയാണ് ഇരുവരും നേരിട്ടത്. പതിയെ ബൗണ്ടറികളുമായി സ്‌കോറുയർത്തി. പത്തോവർ അവസാനിക്കുമ്പോൾ 80-1 എന്ന നിലയിലായിരുന്നു ടീം. എന്നാൽ അടുത്ത പത്തോവറിൽ ഇരുവരും അടിച്ചുകളിക്കുന്നതാണ് റാഞ്ചിയിൽ കണ്ടത്. അതോടെ ഇന്ത്യ 20 ഓവറിൽ 153 ലെത്തി. രോഹിത്തും വിരാടും അർധസെഞ്ചുറി തികയ്ക്കുകയും ചെയ്തു.
പക്ഷെ ടീം സ്‌കോർ 161 ൽ നിൽക്കേ രോഹിത്തിനെ പുറത്താക്കി മാർക്കോ യാൻസൻ ദക്ഷിണാഫ്രിക്കയെ മത്സരത്തിലേക്ക് തിരിച്ചുകൊണ്ടുവന്നു. 51 പന്തിൽ 57 റൺസെടുത്താണ് താരം പുറത്തായത്. രോഹിത് മടങ്ങിയതിന് പിന്നാലെ നാലാമനായി ഇറങ്ങിയ ഋതുരാജ് ഗെയ്ക്വാദും വാഷിങ്ടൺ സുന്ദറും നിരാശപ്പെടുത്തി. എട്ടു റൺസ് മാത്രമാണ് ഗെയ്ക്വാദിന്റെ സമ്പാദ്യം. സുന്ദർ 13 റൺസെടുത്ത് പുറത്തായി. ടീം 200 കടത്തിയ കോലി വൈകാതെ സെഞ്ചുറിയും തികച്ചു. 102 പന്തിൽ നിന്നാണ് താരം സെഞ്ചുറി നേടിയത്.
38-ാം ഓവറിൽ സെഞ്ചുറി തികച്ച കോലി അടുത്ത ഓവറുകളിലും തകർത്തടിച്ചു. കോലി രണ്ട് വീതം ഫോറും സിക്‌സും നേടിയതോടെ ഓവറിൽ ഇന്ത്യ 21 റൺസാണ് അടിച്ചെടുത്തത്. എന്നാൽ 43-ാം ഓവറിൽ കോലിയെ നാന്ദ്രെ ബർഗർ പുറത്താക്കി. 120 പന്തിൽ നിന്ന് 11 ഫോറുകളുടെയും ഏഴു സിക്‌സറിന്റെയും അകമ്പടിയോടെ 135 റൺസെടുത്താണ് താരം മടങ്ങിയത്. കോലി പുറത്തായതോടെ കെ.എൽ. രാഹുലും രവീന്ദ്ര ജഡേജയും ചേർന്ന് സ്‌കോറുയർത്തി. ആറാം വിക്കറ്റിൽ മികച്ച കൂട്ടുകെട്ട് പടുത്തുയർത്തിയ ഇരുവരും ടീമിനെ മുന്നൂറ് കടത്തി. ക്യാപ്റ്റനായെത്തിയ മത്സരത്തിൽ രാഹുൽ അർധസെഞ്ചുറിയോടെ തിളങ്ങി. രാഹുൽ 56 പന്തിൽ നിന്ന് 60 റൺസെടുത്ത് പുറത്തായി. ജഡേജ 20 പന്തിൽ നിന്ന് 32 റൺസെടുത്തു. 50 ഓവറിൽ എട്ടു വിക്കറ്റ് നഷ്ടത്തിൽ 349 റൺസിന് ഇന്ത്യൻ ഇന്നിങ്സ് അവസാനിച്ചു.
