തൃശൂർ: മരത്തംകോട് പുതിയമാത്തൂർ ചിറപുറത്തുള്ള വാടകവീട്ടിൽ ബിഹാറുകാരനായ അതിഥി തൊഴിലാളിയെ കഴിഞ്ഞ ദിവസം മരിച്ചനിലയിൽ കണ്ടെത്തിയ സംഭവം കൊലപാതകം. ഹൃദയാഘാതമാണ് മരണകാരണമെന്ന് ഭാര്യയും കുടുംബാംഗങ്ങളും പോലീസിനോട് പറഞ്ഞത്. എന്നാൽ ഇൻക്വസ്റ്റിൽ പോലീസിന് സംശയം തോന്നി. കഴുത്തിൽ അടയാളങ്ങൾ കണ്ടെത്തിയിരുന്നു. പോസ്റ്റ് മോർട്ടത്തിനു മുമ്പ് സർജനോട് പോലീസ് ഇക്കാര്യങ്ങൾ പങ്കുവച്ചിരുന്നു. തുടർന്ന് കൊലപാതകമെന്ന് സ്ഥിരീകരിക്കുകയായിരുന്നു.
ബീഹാറിൽ നിന്ന് എട്ടു വർഷം മുമ്പാണ് ജോലി തേടി മുഹമ്മദ് മുംതാബ് മിയാനും കുടുംബവും തൃശൂരിൽ എത്തുന്നത്. കെട്ടിടനിർമാണമായിരുന്നു തൊഴിൽ. സ്ഥിരമായി മദ്യപിക്കുന്നയാളാണ് മുഹമ്മദ് മുംതാബ് മിയാൻ. വീട്ടിൽ വഴക്ക് പതിവായിരുന്നു. ഇതിനിടെ ഭാര്യ റോഷൻ കാത്തൂൺ . ബിഹാർ സ്വദേശിയായ ഹസന്നാൻ എന്ന 38കാരനുമായി അടുപ്പത്തിലായി. വീട്ടിൽ സ്ഥിരമായി പ്രശ്നമുണ്ടാക്കുന്ന ഭർത്താവിനെ കുറിച്ച് ആൺസുഹൃത്തിനോട് ഭാര്യ പറഞ്ഞിരുന്നു. സുഹൃത്തും ഭർത്താവും ഒന്നിച്ചിരുന്ന് മദ്യപിച്ചപ്പോൾ ഇക്കാര്യം ചർച്ചയായി. പിന്നെ, തർക്കമായി. തുടർന്നു സുഹൃത്തും ഭാര്യയും ചേർന്ന് കൊലപ്പെടുത്തുകയായിരുന്നു. വീടിനു പുറത്തു കിടന്ന മൃതദേഹം തോർത്ത് മുണ്ട് ഉപയോഗിച്ച് കഴുത്തിൽകെട്ടി വലിച്ച് വീടിനകത്തു കിടത്തുകയായിരുന്നു. പിറ്റേന്നു രാവിലെ അയൽവാസികളെ സ്വാഭാവിക മരണമെന്ന് അറിയിച്ചു.
അതേസമയം കൊലപാതകം നടക്കുന്ന സമയത്ത് മക്കൾ ബഹളം കേട്ട് പുറത്തുവരാതിരിക്കാൻ മുറിയടച്ചിരുന്നു. വിശദമായ ചോദ്യംചെയ്യൽ തുടരുകയാണ്. മദ്യലഹരിയിൽ ഉപദ്രവം സ്ഥിരമായതാണ് കൊലയ്ക്കു കാരണമെന്ന് ഭാര്യ പോലീസിന് മൊഴിനൽകി. ഭാര്യയേയും കാമുകനേയും പോലീസ് കസ്റ്റഡിയിലെടുത്തു.
