ടെൽഅവീവ്: ഇസ്രയേലിലേക്കുള്ള ഫ്ലൈദുബായ് വിമാനത്തിൽ ഇന്ത്യൻ ക്യാപ്റ്റൻ സ്മിത് മച്ച്ഛറിനെ ആക്രമിച്ച ഒമാനി കോ-പൈലറ്റിനെതിരെ നേരത്തെയും സുരക്ഷാ ആശങ്കകൾ ഉയർന്നിരുന്നുവെന്ന് റിപ്പോർട്ട്. ഒമാൻ എയറിൽ ജോലി ചെയ്തിരുന്ന സമയത്ത് 2024ൽ ഇയാളുടെ കൈവശം തീവ്രവാദവുമായി ബന്ധപ്പെട്ട ഉള്ളടക്കങ്ങൾ കണ്ടെത്തിയിരുന്നുവെന്നാണ് എബിസി ന്യൂസിനെ ഉദ്ധരിച്ചുള്ള റിപ്പോർട്ടുകൾ വ്യക്തമാക്കുന്നത്. സിഎൻഎന്നിനോട് സംസാരിച്ച നയതന്ത്ര വൃത്തങ്ങളും സമാന വിവരങ്ങൾ നൽകിയിട്ടുണ്ട്.
2024ൽ ഒമാൻ എയറിൽ ട്രെയിനി കോ-പൈലറ്റായി ജോലി ചെയ്യുന്നതിനിടെയാണ് ഇയാൾ സുരക്ഷാ ഭീഷണിയാണെന്ന് അധികൃതർ തിരിച്ചറിഞ്ഞതെന്നാണ് വിവരം. തുടർന്ന് ഇയാളെ സസ്‌പെൻഡ് ചെയ്തെങ്കിലും വിമാനക്കമ്പനിയിൽ നിന്ന് പൂർണമായി പുറത്താക്കിയില്ലെന്നും പിന്നീട് ഭരണപരമായ ജോലിയിലേക്ക് മാറ്റിയെന്നും റിപ്പോർട്ടുകൾ പറയുന്നു. പിന്നീട് ഇയാൾ എങ്ങനെ ഫ്ലൈദുബായിൽ ജോലിയിൽ പ്രവേശിക്കുകയും ടെൽ അവീവിലേക്ക് പോയ വിമാനത്തിൽ ഫസ്റ്റ് ഓഫീസറായി സേവനമനുഷ്ഠിക്കുകയും ചെയ്തു എന്നതിലാണ് ഇപ്പോൾ അന്വേഷണ സംഘം ശ്രദ്ധ കേന്ദ്രീകരിക്കുന്നത്.
സംഭവത്തിൽ പ്രതിയായ കോ-പൈലറ്റ് ഹമാം അൽ ഹമ്മാമി എന്ന ഒമാനി പൗരനാണെന്ന് തിരിച്ചറിഞ്ഞു. പിതാവ് ഒമാനിയും മാതാവ് സിറിയക്കാരിയുമാണ്. യുഎഇയിലാണ് ഇയാൾ ജനിച്ചതെന്നുമാണ് വിവരം. ഈ വിഷയവുമായി ബന്ധപ്പെട്ട രണ്ട് വൃത്തങ്ങളും ഒരു ഇസ്രയേലി ഉദ്യോഗസ്ഥനും ഇക്കാര്യം സിഎൻഎന്നിനോട് സ്ഥിരീകരിച്ചതായാണ് റിപ്പോർട്ട്. ഇയാളുടേതെന്ന് കരുതുന്ന ലിങ്ക്ഡ്ഇൻ പ്രൊഫൈൽ സംഭവത്തിന് പിന്നാലെ നീക്കം ചെയ്തിരുന്നു. ഒമാൻ എയറിൽ ഏഴ് വർഷം ജോലി ചെയ്തിരുന്നതായി പ്രൊഫൈലിൽ രേഖപ്പെടുത്തിയിരുന്നു. ഈ പ്രൊഫൈൽ ഫ്ലൈദുബായ് വിമാനത്തിലെ കോ-പൈലറ്റിന്റേതാണെന്ന് ഒരു ഉറവിടം സിഎൻഎന്നിനോട് സ്ഥിരീകരിച്ചു.
സംഭവത്തിന് ഏകദേശം ഒമ്പത് മണിക്കൂറിന് ശേഷം ബുധനാഴ്ചയാണ് പ്രൊഫൈലിൽ രണ്ട് പോസ്റ്റുകൾ പ്രത്യക്ഷപ്പെട്ടത്. ഇവ നേരത്തെ ഷെഡ്യൂൾ ചെയ്തതാണോ അതോ മറ്റാരെങ്കിലും അപ്‌ലോഡ് ചെയ്തതാണോ എന്നത് വ്യക്തമല്ല. ആദ്യ പോസ്റ്റിൽ ബോയിങ് 737 മാക്സ് വിമാനത്തിന്റെ കോക്പിറ്റിനുള്ളിൽനിന്നുള്ള നിരവധി വീഡിയോകളുണ്ടായിരുന്നുവെന്നാണ് റിപ്പോർട്ട്. ബുധനാഴ്ച ആക്രമണത്തെ തുടർന്ന് സൗദി അറേബ്യയിലേക്ക് തിരിച്ചുവിട്ട ഫ്ലൈദുബായ് വിമാനവും ബോയിങ് 737 മാക്സ് ആയിരുന്നു.
വീഡിയോയുടെ അവസാനം അൽഖായിദ മുൻ നേതാവ് ഒസാമ ബിൻ ലാദന്റെ മരണശേഷം സംഘടനയുടെ നേതൃത്വം ഏറ്റെടുത്ത അയ്മൻ അൽ സവാഹിരിയുടെയും 2009ൽ അഫ്ഗാനിസ്ഥാനിലെ സിഐഎ ഉദ്യോഗസ്ഥർ ഉൾപ്പെടെ ഒമ്പത് പേരുടെ മരണത്തിനിടയാക്കിയ ചാവേർ ആക്രമണം നടത്തിയ ഹുമാം ഖലീൽ അബു-മുലാൽ അൽ-ബലാവിയുടെയും ചിത്രങ്ങൾ ഉണ്ടായിരുന്നുവെന്നാണ് റിപ്പോർട്ട്. അൽ-ബലാവി അൽഖായിദയോട് കൂറു പുലർത്തിയിരുന്നയാളായിരുന്നു.
രണ്ടാമത്തെ പോസ്റ്റിൽ ഇസ്ലാമിന്റെ മൂന്ന് പ്രധാന പുണ്യസ്ഥലങ്ങളായ മക്ക, മദീന, ജറുസലേം എന്നിവ ഉൾപ്പെടുത്തിയ എഐ നിർമിത ചിത്രം ഉണ്ടായിരുന്നുവെന്നും സിഎൻഎൻ റിപ്പോർട്ട് ചെയ്യുന്നു. പശ്ചാത്തലത്തിൽ മുഴങ്ങിയ കവിതയിൽ അപമാനം അംഗീകരിക്കില്ലെന്നും മരണത്തെ ഭയപ്പെടില്ലെന്നും സ്വന്തം അഭിമാനത്തിനായി നിലകൊള്ളുമെന്നും പറയുന്ന വരികളുണ്ടായിരുന്നുവെന്നാണ് റിപ്പോർട്ട്.
അതേസമയം ബുധനാഴ്ച ദുബായിൽ നിന്ന് ടെൽ അവീവിലേക്ക് പോയ ഫ്ലൈദുബായ് എഫ്‌സെഡ്1073 വിമാനത്തിലാണ് സംഭവം നടന്നത്. വിമാനത്തിന്റെ കോക്പിറ്റിനുള്ളിൽ വെച്ച് കോ-പൈലറ്റ് ഇന്ത്യൻ ക്യാപ്റ്റൻ സ്മിത് മച്ച്ഛറിനെ ആക്രമിക്കുകയായിരുന്നു. ആക്രമണത്തിൽ ഗുരുതരമായി പരുക്കേറ്റ ക്യാപ്റ്റന് രക്തസ്രാവമുണ്ടായിരുന്നുവെന്നും റിപ്പോർട്ടുകളുണ്ട്.
ആക്രമണത്തിന് പിന്നാലെ വിമാനം കുത്തനെ താഴേക്ക് പതിക്കാൻ തുടങ്ങി. വിമാനം താഴേക്ക് പോകുകയാണെന്ന് മനസിലാക്കിയ മച്ച്ഛർ ഗുരുതരമായി പരുക്കേറ്റ അവസ്ഥയിലും കോക്പിറ്റ് വാതിൽ തുറക്കുകയായിരുന്നു. പിന്നീട് ഇന്ത്യൻ പ്രധാനമന്ത്രി നരേന്ദ്ര മോദിയുമായുള്ള സംഭാഷണത്തിൽ അദ്ദേഹം സംഭവത്തെക്കുറിച്ച് വിശദീകരിച്ചിരുന്നു.
വിമാനം താഴേക്ക് പോകുന്നത് താൻ മനസിലാക്കിയെന്നും നിലത്ത് വീണിരുന്നെങ്കിലും കോക്പിറ്റ് വാതിൽ തുറക്കാൻ കഴിഞ്ഞെന്നും മച്ച്ഛർ പറഞ്ഞതായി റോയിട്ടേഴ്സ് റിപ്പോർട്ട് ചെയ്തു. വാതിൽ തുറന്നതോടെ യാത്രക്കാർ കോക്പിറ്റിലേക്ക് പ്രവേശിച്ച് പ്രതിയെ കീഴ്പ്പെടുത്താൻ സഹായിച്ചു. 182 പേരാണ് വിമാനത്തിലുണ്ടായിരുന്നതെന്നാണ് അസോസിയേറ്റഡ് പ്രസിന്റെ റിപ്പോർട്ട്. വിമാനം സൗദി അറേബ്യയിലെ തബൂക്കിലേക്ക് തിരിച്ചുവിടുകയും സുരക്ഷിതമായി ലാൻഡ് ചെയ്യുകയും ചെയ്തു.
സംഭവത്തിന്റെ സാഹചര്യങ്ങളും ആക്രമണത്തിന്റെ ഉദ്ദേശ്യവും സംബന്ധിച്ച് യുഎഇ അന്വേഷണം ആരംഭിച്ചിട്ടുണ്ട്. ആക്രമണത്തിന് തീവ്രവാദ ബന്ധമുണ്ടോയെന്നും സംഭവം മുൻകൂട്ടി ആസൂത്രണം ചെയ്തതാണോയെന്നും ഉൾപ്പെടെയുള്ള കാര്യങ്ങളാണ് അന്വേഷിക്കുന്നത്. അന്വേഷണത്തെക്കുറിച്ച് വിവരം ലഭിച്ച വൃത്തങ്ങളെ ഉദ്ധരിച്ച്, വിമാനം ഇസ്രയേലിലെത്തിച്ചി തകർക്കുകയായിരുന്നു ലക്ഷ്യമെന്ന് പ്രതി അന്വേഷണ ഉദ്യോഗസ്ഥരോട് പറഞ്ഞതായും റിപ്പോർട്ടുകളുണ്ട്. എന്നാൽ ഇക്കാര്യം സ്വതന്ത്രമായി സ്ഥിരീകരിച്ചിട്ടില്ല. ആക്രമണത്തിന് പിന്നിലെ യഥാർഥ ഉദ്ദേശ്യം കണ്ടെത്താനുള്ള അന്വേഷണം തുടരുകയാണ്.
പ്രതിക്ക് ഇസ്ലാമിക തീവ്രവാദവൽക്കരണം സംഭവിച്ചിരുന്നുവെന്നാണ് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു പ്രതികരിച്ചത്. മറ്റാരെങ്കിലും ഇയാളെ ആക്രമണത്തിന് പ്രേരിപ്പിച്ചിരുന്നോ എന്നതും പരിശോധിക്കുന്നുണ്ടെന്നും അദ്ദേഹം പറഞ്ഞു. അതേസമയം, ഔദ്യോഗിക അന്വേഷണം തുടരുന്ന സാഹചര്യത്തിൽ അധികൃതരുടെ അഭ്യർഥന പ്രകാരം ടെൽ അവീവ് സർവീസുകൾ താൽക്കാലികമായി നിർത്തിവെച്ചതായി ഫ്ലൈദുബായ് അറിയിച്ചു.
