ഗർഭനിരോധനമാർഗം സ്വീകരിക്കുകയെന്നതു സ്ത്രീകൾക്ക് മാത്രം ഉത്തരവാദിത്വമാണെന്ന ധാരണ തിരുത്തുകയാണ് YCT-529 എന്ന പുതിയ മരുന്ന്. പുരുഷന്മാരെ ഗർഭനിരോധനത്തിന് സഹായിക്കുന്ന YCT-529 എന്ന ഗുളിക പ്രാരംഭഘട്ടത്തിലെ ക്ലിനിക്കൽ ട്രയലുകളിൽ ഫലപ്രദമാണെന്ന് തെളിഞ്ഞുകഴിഞ്ഞു.
ബീജ ഉത്പാദനത്തിൽ പ്രധാന പങ്കുവഹിക്കുന്ന ഒരു പ്രോട്ടീനെ തടയുകയാണ് മരുന്നിന്റെ പ്രധാനലക്ഷ്യം. ബീജങ്ങളുടെ വളർച്ചയിലെ പ്രധാനഘടകമായ റെറ്റിനോയിക് ആസിഡ് എന്ന ഒരിനം വിറ്റാമിൻ എയുടെ പ്രവർത്തനത്തെ തടസപ്പെടുത്തുകയാണ് ഗുളിക ചെയ്യുന്നത്. ക്ലിനിക്കൽ ട്രയലുകൾ നടത്തുന്ന ബയോഫാർമസ്യൂട്ടിക്കൽ കമ്പനിയായ യുവർചോയ്സ് തെറാപ്യൂട്ടിക്സും ന്യൂയോർക്കിലെ കൊളംബിയ സർവകലാശാലയും ചേർന്നാണ് ഈ ഗുളിക വികസിപ്പിച്ചത്. കമ്മ്യൂണിക്കേഷൻസ് മെഡിസിൻ എന്ന ജേണലിൽ ഇതുസംബന്ധിച്ച പഠനം പ്രസിദ്ധീകരിച്ചിട്ടുണ്ട്.
ആരംഭ ഘട്ടത്തിൽ എലികളിലും ആൺകുരങ്ങുകളിലും നടത്തിയ ക്ലിനിക്കൽ ട്രയലിൽ ഈ ഗുളിക ഫലപ്രദമാണെന്ന് കണ്ടെത്തിയിരുന്നു. മരുന്ന് കഴിച്ച എലികളിൽ ആറ് ആഴ്ചകൾക്കുള്ളിലും കുരങ്ങുകളിൽ പത്തു മുതൽ പതിനഞ്ച് ആഴ്ചകൾക്കുള്ളിലും പ്രത്യുത്പാദനക്ഷമത വീണ്ടെടുത്തതായും കണ്ടെത്തിയിരുന്നു.
Related Post
തുടർന്നു ആരോഗ്യവാന്മാരായ പതിനാറ് പുരുഷന്മാരിലാണ് ക്ലിനിക്കൽ ട്രയൽ നടത്തിയത്. 10, 30,90, 180 mg ഡോസിലുള്ള ഗുളികകളുടെ സിംഗിൾ ഡോസാണ് ഇവർക്കു നൽകിയത്. തുടർന്ന് ഇവരിലെ ഹൃദയമിടിപ്പ്, മാനസികാവസ്ഥ, ലൈംഗികാസക്തി, ഹോർമോൺ നില തുടങ്ങിയവ നിരീക്ഷിക്കുകയും ചെയ്തു. ശേഷമാണ് ട്രയലിൽ പങ്കാളികളായവരിൽ ആർക്കും വലിയ രീതിയിലുള്ള പാർശ്വഫലങ്ങൾ പ്രകടമായില്ലെന്നും ടെസ്റ്റോസ്റ്റിറോണിനെയോ മറ്റ് പ്രത്യുത്പാദന ഹോർമോണുകളെയോ ബാധിച്ചിട്ടില്ലെന്നും കണ്ടെത്തിയത്. മാത്രമല്ല ഗുളികയുടെ ഉയർന്ന ഡോസായ 180 mg കഴിച്ചവരിലും സുരക്ഷിതമാണെന്ന് കണ്ടെത്തി. ഭക്ഷണം കഴിക്കുന്നതിന് മുമ്പോ, ശേഷമോ ഏതുസമയത്തും കഴിക്കുന്നതും ഫലംചെയ്യുമെന്നും ട്രയലിൽ വ്യക്തമായി.
അതേസമയം പരീക്ഷണഘട്ടത്തിലിരിക്കുന്ന മറ്റ് പുരുഷ ഗർഭനിരോധന ഗുളികകളിൽ നിന്ന് വ്യത്യസ്തമായി YCT-529 ഹോർമോൺ നിലയെ ബാധിക്കുന്നില്ലെന്നും അതിനാൽ ദീർഘനാൾ ഉപയോഗത്തിന് സുരക്ഷിതമാണെന്നും നിർമാതാക്കൾ അവകാശപ്പെടുന്നു. നിലവിൽ വിശാലാടിസ്ഥാനത്തിലുള്ള പഠനങ്ങൾക്ക് മുന്നോടിയായുള്ള ഗുളികയുടെ ആദ്യഘട്ട പരീക്ഷണമാണ് വിജയകരമായി പൂർത്തിയായത്.
