കടലിന്റെ വിശാലതയിൽ വിപരീത ദിശകളിലേക്ക് സഞ്ചരിച്ചുകൊണ്ടിരുന്ന രണ്ട് കപ്പലുകൾ. അടുത്തുവരുന്ന കപ്പലിനെ സാധാരണ കപ്പലായി മാത്രമാണ് നാവികനായ റുഷീൽ സരൺ ആദ്യം കരുതിയത്. എന്നാൽ കപ്പലിന്റെ വിവരങ്ങളും യാത്രാമാർഗവും പരിശോധിച്ചതോടെ ആ സത്യം തിരിച്ചറിഞ്ഞു. എതിർദിശയിൽ സഞ്ചരിച്ചെത്തുന്നത് സ്വന്തം അച്ഛൻ യാത്ര ചെയ്യുന്ന കപ്പലായിരുന്നു.
വടക്കോട്ട് സഞ്ചരിക്കുകയായിരുന്ന റുഷീൽ തെക്കോട്ട് നീങ്ങുന്ന വലിയ കപ്പലാണ് കടലിൽ കണ്ടത്. ചാർട്ടുകളും കപ്പലിന്റെ വിവരങ്ങളും പരിശോധിച്ചപ്പോഴാണ് അച്ഛനും അതേ ഭാഗത്തുണ്ടെന്ന് മനസിലായത്. തുടർന്ന് നടുക്കടലിൽ ഇരുവരും പരസ്പരം കണ്ടുമുട്ടുകയായിരുന്നു. ഈ അപൂർവ അച്ഛൻ-മകൻ കൂടിക്കാഴ്ചയുടെ ദൃശ്യങ്ങൾ റുഷീൽ ഇൻസ്റ്റഗ്രാമിൽ പങ്കുവച്ചു.
‘ജീവിതത്തിലെ ഏറ്റവും ഓർമിക്കപ്പെടുന്ന അച്ഛൻ-മകൻ നിമിഷങ്ങളിലൊന്ന് നടുക്കടലിലായിരുന്നു’ എന്നാണ് റുഷീൽ വീഡിയോയിൽ പറയുന്നത്. രണ്ട് തലമുറകളിലെ നാവികർ, രണ്ട് കപ്പലുകൾ, രണ്ട് വ്യത്യസ്ത യാത്രകൾ. എന്നാൽ ഒരേ കടൽ അപ്രതീക്ഷിതമായി ഇരുവരെയും ഒരിടത്ത് എത്തിക്കുകയായിരുന്നു.
അച്ഛൻ പറഞ്ഞ വാക്കുകൾ റുഷീലിനെയും ഏറെ സ്പർശിച്ചു. “അച്ഛൻ പറഞ്ഞ ഒരു കാര്യം എന്റെ മനസ്സിൽ ആഴത്തിൽ പതിഞ്ഞുപോയി. ‘ഈ വിശാലമായ ശൂന്യതയിൽ എവിടെയോ വെച്ച്, വ്യത്യസ്ത ദിശകളിലേക്ക് യാത്ര ചെയ്യുന്ന ഒരു അച്ഛനും മകനും പരസ്പരം കണ്ടെത്തി; ഒരേ സമുദ്രത്താൽ അവർ തമ്മിൽ ബന്ധിപ്പിക്കപ്പെടുകയും ചെയ്തു’,” അദ്ദേഹം പറയുന്നു. വഴി കാണിച്ചുതന്ന വ്യക്തിയോടൊപ്പമുള്ള യാത്ര ഒരിക്കലും അവസാനിക്കുന്നില്ലെന്ന ചിന്തയാകാം അച്ഛൻ പങ്കുവയ്ക്കാൻ ശ്രമിച്ചതെന്നും റുഷീൽ പങ്കുവെച്ചു.
വീഡിയോ സോഷ്യൽ മീഡിയയിൽ വൈറലായതോടെ നിരവധി പേരാണ് അച്ഛനും മകനും തമ്മിലുള്ള ഈ അപ്രതീക്ഷിത കൂടിക്കാഴ്ചയെ ഹൃദയസ്പർശിയായ നിമിഷമെന്ന് വിശേഷിപ്പിച്ചത്. ജീവിതത്തിൽ ഒരിക്കൽ മാത്രം സംഭവിക്കാവുന്ന അപൂർവ അനുഭവമാണിതെന്നും പലരും പ്രതികരിച്ചു. സമാനമായ അനുഭവങ്ങൾ ഉണ്ടായിട്ടുള്ള ചില നാവികരും തങ്ങളുടെ കഥകൾ പങ്കുവെച്ചു.
