കൊച്ചി: സർക്കാർ വാഗ്ദാനം ചെയ്ത വീട് ലഭിക്കാത്തതിൽ പ്രതിഷേധിച്ച് ആലുവയിൽ പീഡനത്തിനിരയായി കൊല്ലപ്പെട്ട അഞ്ചുവയസ്സുകാരിയുടെ കുടുംബം. ചൂർണിക്കര ഗ്രാമപഞ്ചായത്തിന് മുന്നിലാണ് കുടുംബത്തിന്റെ കുത്തിയിരിപ്പ് സമരം. ദുരന്തത്തിനിരയായ കുടുംബത്തിന് വീട് നിർമിച്ചുനൽകുമെന്ന് നവകേരള സദസ്സിലടക്കം മുൻ മുഖ്യമന്ത്രി പിണറായി വിജയൻ പ്രഖ്യാപിച്ചിരുന്നു.
എന്നാൽ ഇതുവരെ വീട് നിർമിച്ചുനൽകുന്നതിനുള്ള നടപടികൾ സ്വീകരിച്ചിട്ടില്ലെന്നാണ് കുടുംബത്തിന്റെ പരാതി. 2023 ജൂലൈയിലാണ് അതിഥിത്തൊഴിലാളി കുടുംബത്തിലെ അഞ്ചുവയസ്സുകാരിയെ ആലുവ മാർക്കറ്റിന് സമീപം പീഡിപ്പിച്ച് കൊലപ്പെടുത്തിയത്. സംഭവത്തിൽ ബിഹാർ സ്വദേശിയായ പ്രതിയെ പൊലീസ് അറസ്റ്റ് ചെയ്തിരുന്നു.
കുട്ടിയുടെ മരണത്തിന് പിന്നാലെ കുടുംബത്തിന് സഹായം നൽകുമെന്ന് സർക്കാർ പ്രഖ്യാപിച്ചിരുന്നു. എന്നാൽ വീട് ലഭിക്കാത്തതിനെ തുടർന്നാണ് കുട്ടിയുടെ മാതാവും കുടുംബവും പ്രതിഷേധവുമായി രംഗത്തെത്തിയിരിക്കുന്നത്.
