കോഴിക്കോട്: കുറ്റ്യാടി പോലീസ് സ്റ്റേഷനിലേക്ക് കാറോടിച്ചുകയറ്റി ലഹരിസംഘങ്ങളുടെ അക്രമം. ഇന്ന് പുലർച്ചെ രണ്ടുമണിയോടെയാണ് നാടകീയ സംഭവങ്ങൾ അരങ്ങേറിയത്. രണ്ട് കാറുകളിലായെത്തിയ സംഘങ്ങൾ പോലീസ് സ്റ്റേഷൻ പരിസരത്തുവെച്ച് പരസ്പരം ഏറ്റുമുട്ടുകയായിരുന്നു. സംഭവവുമായി ബന്ധപ്പെട്ട് ആറുപേരെ പോലീസ് കസ്റ്റഡിയിലെടുത്തു.
കസ്റ്റഡിയിലെടുത്തവരിൽ ലഹരിസംഘത്തിലെ പ്രധാനിയായ ആൽബിൻ സെബാസ്റ്റ്യനും ഉൾപ്പെടുന്നു. ഇയാൾക്കെതിരെ വെള്ളയിൽ പോലീസ് സ്റ്റേഷനിൽ നിലവിൽ കേസുണ്ടെന്നാണ് വിവരം. സംഘങ്ങൾ തമ്മിലുള്ള ഏറ്റുമുട്ടൽ രൂക്ഷമായതോടെ കൂടുതൽ പോലീസുകാരെത്തിയാണ് ഇവരെ കീഴടക്കി സ്ഥിതിഗതികൾ നിയന്ത്രിച്ചത്.
സംഘം സഞ്ചരിച്ച കാറുകളിലൊന്നിൽ നടത്തിയ പരിശോധനയിൽ എംഡിഎംഎയും കഞ്ചാവും കണ്ടെത്തിയതായി പോലീസ് അറിയിച്ചു. സംഭവത്തിന് പിന്നിലെ കാരണവും സംഘങ്ങൾ തമ്മിലുള്ള ബന്ധവും ഉൾപ്പെടെയുള്ള കാര്യങ്ങളിൽ കുറ്റ്യാടി പോലീസ് വിശദമായ അന്വേഷണം ആരംഭിച്ചിട്ടുണ്ട്.
