അഗർത്തല: സിപിഎമ്മിന്റെ പുതിയ സെക്രട്ടറിയെ തനിക്ക് അറിയില്ലെന്നും കേരളത്തിൽ നിന്നുള്ളയാളെന്ന് പറഞ്ഞുകേട്ടുവെന്നും ബിജെപി നേതാവും മുൻ ത്രിപുര മുഖ്യമന്ത്രിയുമായ ബിപ്ലബ് കുമാർ ദേബ്. താൻ മുഖ്യമന്ത്രിയായിരുന്നപ്പോഴും എംപിയായിരുന്നിട്ടും അദ്ദേഹത്തെ പറ്റി കേട്ടിട്ടില്ല. അദ്ദേഹത്തെ കുറിച്ച് അറിയാൻ താൻ ഗൂഗിളിൽ സെർച്ച് ചെയ്യുമെന്നും ബിപ്ലബ് കുമാർ പരിഹസിച്ചു.
നരേന്ദ്രമോദിയെ പോലെയോ അമിത് ഷായെ പോലെയോ യോഗി ആദിത്യനാഥിനെ പോലെയോ ദേശീയതലത്തിൽ തലപ്പൊക്കമുള്ള നേതാക്കൾ കമ്യൂണിസ്റ്റ് പാർട്ടിയിൽ ഇല്ല. പുതിയ സെക്രട്ടറി പാർട്ടിക്ക് വളരെ വേണ്ടപ്പെട്ടവനാവാം. എന്നാൽ പാർട്ടിയുടെ ഏറ്റവും ഉയർന്ന സ്ഥാനത്തേക്കുള്ള പുതിയ നേതാവിന്റെ ആരോഹണം രാജ്യമെമ്പാടും പ്രതിധ്വനിച്ചില്ലെന്നും ബിപ്ലബ് കുമാർ ദേബ് പറഞ്ഞു.
ബിജെപിയിൽ ദേശീയതലത്തിൽ തലപ്പൊക്കമുള്ള നിരവധി നേതാക്കളുണ്ട്. കോൺഗ്രസിനകത്ത് ഒരു കുടുംബവാഴ്ചയുണ്ട്. എന്നാൽ കമ്യൂണിസ്റ്റുകാരിൽ ഇത്തരമൊരു നേതാവ് ഇല്ലെന്നും ഒരു പാർട്ടിക്ക് നേതൃത്വം നൽകാൻ രാജ്യമെമ്പാടും അറിയപ്പെടുന്ന ഒരു നേതാവ് ആവശ്യമാണെന്നും ബിപ്ലബ് കുമാർ പറഞ്ഞു.
