പത്തനംതിട്ട: പ്രമാടത്ത് അങ്കണവാടിയിൽ പനി ബാധിച്ച മൂന്ന് വയസുകാരിയെക്കൊണ്ട് ഛർദി തുടപ്പിച്ചുവെന്ന പരാതിയുമായി കുട്ടിയുടെ കുടുംബമ. കുട്ടിയുടെ വസ്ത്രം അഴിച്ചാണ് അങ്കണവാടി അധ്യാപിക ഛർദി തുടപ്പിച്ചത് എന്നാണ് ഇവർ ആരോപിക്കുന്നത്.
സെപ്തംബർ ഒന്നിനാണ് സംഭവം. പനി ലക്ഷണങ്ങളോടെ അങ്കണവാടിയിലെത്തിയ കുട്ടി പനി കൂടിയതിനെ തുടർന്ന് ക്ലാസിൽ വെച്ച് ഛർദിച്ചു. ഇതോടെ അധ്യാപിക കുട്ടി ധരിച്ചിരുന്ന വസ്ത്രം ഊരി നിർബന്ധിച്ച് നിലത്തുവീണ ഛർദി തുടപ്പിച്ചെന്നാണ് ആരോപണം. സംഭവത്തിൽ അങ്കണവാടിയിൽ ജോലി ചെയ്തിരുന്ന താത്കാലിക ഹെൽപ്പർ, അധ്യാപികക്കെതിരെ മൊഴി നൽകിയിട്ടുണ്ട്.
അതേസമയം അധ്യാപികയ്ക്കെതിരെ എതിരെ മറ്റു കുട്ടികളുടെ മാതാപിതാക്കൾക്കും പരാതി ഉണ്ട്. പരാതി ഉയർന്ന് ഒരാഴ്ചയ്ക്ക് ശേഷം ചൈൽഡ് ഡെവലപ്‌മെന്റ് പ്രൊജക്ട് ഓഫീസറുടെ നേതൃത്വത്തിൽ പ്രാഥമിക അന്വേഷണം നടത്തിയെങ്കിലും കുറ്റക്കാർക്കെതിരെ തുടർനടപടികൾ സ്വീകരിക്കുന്നതിൽ അധികൃതരുടെ ഭാഗത്തുനിന്ന് കടുത്ത വീഴ്ചയാണുണ്ടായതെന്നും രക്ഷിതാക്കൾ ആരോപിക്കുന്നു.
