കണ്ണൂർ: ജില്ലാ സെക്രട്ടറിയായി കെ.കെ.രാഗേഷിനെ തിരഞ്ഞെടുത്തതില്‍ അതൃപ്തി അറിയിച്ച് സിപിഐഎം ജനറൽ സെക്രട്ടറി എം എ ബേബിക്ക് പരാതി നൽകി കണ്ണൂരിലെ ഒരു വിഭാഗം നേതാക്കൾ. സംഘടനാ ചട്ടങ്ങൾ പാലിക്കാതെയാണ് തിരഞ്ഞെടുപ്പെന്ന് പരാതിയിൽ ചൂണ്ടിക്കാട്ടുന്നു.
ജില്ലാ കമ്മിറ്റിയംഗം അല്ലാത്തയാളെ എങ്ങനെ ജില്ലാ സെക്രട്ടറിയാക്കിയെന്ന് വ്യക്തമാക്കണം എന്നും ആവശ്യമുണ്ട്. കണ്ണൂരിൽ നിന്നുള്ള സിപിഐഎമ്മിന്റെ ചില കേന്ദ്ര കമ്മിറ്റി അംഗങ്ങളുടെ അറിവോടുകൂടിയാണ് പരാതി വന്നിരിക്കുന്നതെന്നതും ശ്രദ്ധേയമാണ്.
തിരഞ്ഞെടുപ്പ് സമയത്തും കെ കെ രാഗേഷിന്റെ പ്രവർത്തനങ്ങളെ പറ്റി പരാതികൾ ഉയർന്നിരുന്നു. തളിപ്പറമ്പിലേയും പയ്യന്നൂരിലെയും സ്ഥാനാർഥി നിർണയം, രക്തസാക്ഷി ഫണ്ട് വിവാദം ഇതിലെല്ലാം കെ കെ രാഗേഷ് സ്വീകരിച്ച നിലപാടുകളിൽ അടക്കം കണ്ണൂരിലെ ചില നേതാക്കൾ അതൃപ്തി പ്രകടമാക്കിയിരുന്നു.
