ടെൽ അവീവ്: ദുബായിൽനിന്ന് ടെൽ അവീവിലേക്ക് പറന്ന ഫ്ലൈദുബായ് വിമാനത്തിൽ പൈലറ്റുമാർ തമ്മിലുണ്ടായ സംഘർഷമാണ് അടിയന്തര ലാൻഡിങ്ങിന് കാരണമായതെന്ന കൂടുതൽ വിവരങ്ങൾ പുറത്ത്. പൈലറ്റിന് കുത്തേറ്റതായും സഹായത്തിനായി ഇയാൾ നിലവിളിച്ചിരുന്നതായും വിമാനത്തിലെ യാത്രക്കാരെ ഉദ്ധരിച്ച് റിപ്പോർട്ടുകൾ പുറത്തുവന്നു. പൈലറ്റുമാരിലൊരാളെ കീഴ്പ്പെടുത്തി ബന്ധിച്ചിടാൻ യാത്രക്കാർ സഹായിച്ചതായും റിപ്പോർട്ടുകളുണ്ട്.
ദുബായിൽനിന്ന് ടെൽ അവീവിലേക്ക് പോയ ഫ്ലൈദുബായ് FZ1073 വിമാനത്തിലാണ് സംഭവം. 27 കുട്ടികളടക്കം 174 യാത്രക്കാരാണ് വിമാനത്തിലുണ്ടായിരുന്നത്. യാത്രക്കാരിൽ ഭൂരിഭാഗവും ഇസ്രയേൽ പൗരന്മാരായിരുന്നു. വിമാനത്തിലെ പൈലറ്റുമാരിലൊരാൾ യുഎഇ സ്വദേശിയും സഹപൈലറ്റ് ഒമാൻ സ്വദേശിയുമാണെന്ന് ഇസ്രയേലി ഉദ്യോഗസ്ഥരെ ഉദ്ധരിച്ച് എൻഡിടിവി റിപ്പോർട്ട് ചെയ്തു.
റോയിട്ടേഴ്‌സിനെ ഉദ്ധരിച്ചുള്ള റിപ്പോർട്ടുകൾ പ്രകാരം ഒമാൻ സ്വദേശിയായ സഹപൈലറ്റാണ് മറ്റൊരു പൈലറ്റിനെ കുത്തിയതെന്നാണ് വിവരം. തുടർന്ന് കുത്തേറ്റ പൈലറ്റിനെ യാത്രക്കാരുടെ സഹായത്തോടെ കീഴ്പ്പെടുത്തിയതായും റിപ്പോർട്ടുകളുണ്ട്. സംഭവത്തിന്റെ കൃത്യമായ കാരണം സംബന്ധിച്ച് ഔദ്യോഗിക സ്ഥിരീകരണം ഇതുവരെ പുറത്തുവന്നിട്ടില്ല.
പൈലറ്റുമാർ തമ്മിലുള്ള സംഘർഷത്തിനിടെ വിമാനത്തിന്റെ നിയന്ത്രണം നഷ്ടപ്പെട്ടതോടെ വിമാനം 14,125 അടി ഉയരത്തിലേക്ക് താഴ്ന്നതായി ഫ്ലൈറ്റ് ട്രാക്കിങ് വിവരങ്ങൾ സൂചിപ്പിക്കുന്നു. വിമാനം കുത്തനെ താഴ്ന്നതോടെ യാത്രക്കാർ പരിഭ്രാന്തരാവുകയും നിലവിളിക്കുകയും ചെയ്തതായി യാത്രക്കാർ പറഞ്ഞു. വിമാനത്തിന്റെ മുൻഭാഗത്തുനിന്ന് സഹായത്തിനായുള്ള പൈലറ്റിന്റെ നിലവിളി കേട്ടതായും ഒരു യാത്രക്കാരി പറഞ്ഞു.
വിമാനം തട്ടിക്കൊണ്ടുപോകാൻ ശ്രമം നടന്നതാണെന്ന ആശങ്ക ആദ്യം ഉയർന്നിരുന്നു. ഇതിനെ തുടർന്ന് ഇസ്രയേൽ യുദ്ധവിമാനങ്ങൾ വിമാനത്തെ നിരീക്ഷിക്കാൻ പുറപ്പെട്ടിരുന്നു. എന്നാൽ പിന്നീട് പൈലറ്റുമാർ തമ്മിലുണ്ടായ സംഘർഷമാണ് സംഭവത്തിന് പിന്നിലെന്നാണ് പ്രാഥമിക വിവരം. അതേസമയം, തീവ്രവാദ ആക്രമണത്തിനുള്ള സാധ്യത പൂർണമായി തള്ളിക്കളയാനാകില്ലെന്നും ഇസ്രയേലി ഉദ്യോഗസ്ഥർ പറഞ്ഞതായി റിപ്പോർട്ടുകളുണ്ട്.
സംഭവത്തിന് പിന്നാലെ വിമാനം സൗദി അറേബ്യയിലെ തബൂക്ക് വിമാനത്താവളത്തിൽ സുരക്ഷിതമായി ഇറക്കി. സിവിലിയൻ, സൈനിക ആവശ്യങ്ങൾക്കായി ഉപയോഗിക്കുന്ന വിമാനത്താവളമാണിത്. വിമാനം ദുബായിൽനിന്ന് പുറപ്പെട്ട് ഏകദേശം രണ്ടര മണിക്കൂറിന് ശേഷമാണ് സംഭവമുണ്ടായതെന്നാണ് ഫ്ലൈറ്റ് ട്രാക്കിങ് വിവരങ്ങൾ വ്യക്തമാക്കുന്നത്.
സംഭവത്തെക്കുറിച്ച് ഔദ്യോഗിക അന്വേഷണം തുടരുകയാണ്. പൈലറ്റുമാർ തമ്മിലുള്ള സംഘർഷത്തിന്റെ കാരണം, കുത്തേറ്റെന്ന റിപ്പോർട്ട്, വിമാനത്തിന്റെ നിയന്ത്രണം നഷ്ടപ്പെട്ട സാഹചര്യം എന്നിവ സംബന്ധിച്ച് കൂടുതൽ വിവരങ്ങൾ അധികൃതരിൽനിന്ന് പുറത്തുവരാനുണ്ട്.
🚨🇮🇱🇷🇺🇺🇦 The flydubai scare may have been far worse than a cockpit fight, with authorities looking into whether one of the pilots deliberately tried to CRASH the plane.
One pilot reportedly sharply pointed the plane downward, and the other fought him off and pulled it out of the… https://t.co/ZcUnhBo9Yr pic.twitter.com/7qS7YULl2c
— Mario Nawfal (@MarioNawfal) September 30, 2026
