തിരുവനന്തപുരം: എഐ സാങ്കേതികവിദ്യ ഉപയോഗിച്ച് തയാറാക്കിയ തന്റെ ഡാൻസ് വീഡിയോ സാമൂഹികമാധ്യമങ്ങളിൽനിന്ന് നീക്കം ചെയ്തതിൽ അതൃപ്തി പ്രകടിപ്പിച്ച് മുഖ്യമന്ത്രി വി.ഡി. സതീശൻ. പൊലീസിന്റെ നടപടി തികച്ചും അന്യായമാണെന്ന് അദ്ദേഹം പറഞ്ഞു. ഒരു പരിപാടിയിൽ സംസാരിക്കുകയായിരുന്നു മുഖ്യമന്ത്രി.
കഴിഞ്ഞമാസമാണ് ‘എഐ കവല’ എന്ന ഇൻസ്റ്റഗ്രാം അക്കൗണ്ടിൽ കെഎസ്ഇബി ജീവനക്കാർക്കൊപ്പമുള്ള സതീശന്റെ എഐ ഡാൻസ് വീഡിയോ പോസ്റ്റ് ചെയ്തത്. വീഡിയോ വലിയ രീതിയിൽ വൈറലായതിന് പിന്നാലെ ഇന്ത്യയിൽ അതിന്റെ ലഭ്യത മെറ്റ നിയന്ത്രിച്ചിരുന്നു. വീഡിയോ നീക്കം ചെയ്യാൻ താനോ തന്റെ ഓഫീസോ പരാതി നൽകിയിട്ടില്ലെന്ന് സതീശൻ നേരത്തേ വ്യക്തമാക്കിയിരുന്നു.
തൃശൂരിൽ നിന്നുള്ള രണ്ട് പേരാണ് എഐ ഉപയോഗിച്ച് തന്റെ ഡാൻസ് വീഡിയോ നിർമിച്ചതെന്ന് സതീശൻ പറഞ്ഞു. തമിഴ് നടൻ വിജയ്‌യെ പോലെയാണ് വീഡിയോയിൽ താൻ നൃത്തം ചെയ്യുന്നത്. വീഡിയോ വളരെ മനോഹരമായിരുന്നെന്നും വിജയ്‌യെക്കാൾ മികച്ച രീതിയിലാണ് താൻ ഡാൻസ് ചെയ്തതെന്ന് നിരവധി ചെറുപ്പക്കാർ പറഞ്ഞിരുന്നെന്നും മുഖ്യമന്ത്രി പറഞ്ഞു.
Related Post
വീഡിയോ പൊലീസ് നീക്കം ചെയ്തതിൽ തനിക്ക് സന്തോഷമില്ലെന്നും സതീശൻ പറഞ്ഞു. എല്ലാ ദിവസവും രാത്രി ഉറങ്ങാൻ പോകുന്നതിന് മുമ്പ് ആ വീഡിയോ കാണുമായിരുന്നെന്നും അദ്ദേഹം പറഞ്ഞു. എന്നാൽ പൊലീസ് അത് നീക്കം ചെയ്തുകളഞ്ഞു. അത് ശരിയായില്ലെന്ന് പൊലീസിനോട് പറഞ്ഞതായും സതീശൻ വ്യക്തമാക്കി.
എഐ ഡാൻസ് വീഡിയോയെക്കുറിച്ച് സതീശൻ നേരത്തേയും പ്രതികരിച്ചിരുന്നു. വീഡിയോ കണ്ട് താൻ ഞെട്ടിപ്പോയെന്നും മോഹൻലാലിനേക്കാളും വിജയ്‌യേക്കാളും മികച്ച രീതിയിലാണ് താൻ അതിൽ ഡാൻസ് ചെയ്തതെന്നുമായിരുന്നു അന്നത്തെ പ്രതികരണം. അഞ്ചുവയസുള്ള ഒരു കുട്ടി തന്റെ ഡാൻസ് ഗംഭീരമായിരുന്നെന്ന് പറഞ്ഞതായും അദ്ദേഹം വ്യക്തമാക്കിയിരുന്നു. അതേസമയം, എഐ ഉപയോഗിച്ച് വ്യക്തികളെ ഉൾപ്പെടുത്തി വീഡിയോകൾ നിർമിക്കുന്നതിൽ നിയമപരമായ പ്രശ്നങ്ങൾ ഉയരാമെന്നും സതീശൻ അന്ന് മുന്നറിയിപ്പ് നൽകിയിരുന്നു.
