കൊച്ചി: കോക്ക്റോച്ച് ജനതാ പാർട്ടി (സിജെപി) പ്രക്ഷോഭങ്ങളുടെ യഥാർഥ തീരുമാനങ്ങൾ എടുത്തിരുന്നത് പാർട്ടിയുടെ സഹ കൺവീനർമാരായ സൗരവ് ദാസും അശുതോഷ് റങ്കയുമാണെന്ന് വെളിപ്പെടുത്തി പാർട്ടി സ്ഥാപകനും കൺവീനറുമായ അഭിജീത് ദീപ്കെ. താൻ ഇരുവരുടെയും നിർദേശങ്ങൾ അനുസരിക്കുക മാത്രമാണ് ചെയ്തിരുന്നതെന്നും ദീപ്കെ പറഞ്ഞു. ജയിലിൽ കഴിയുന്ന ഇരുവരും തന്റെ സഹോദരങ്ങളെപ്പോലെയാണെന്നും പ്രസ്ഥാനത്തെ മുന്നോട്ടുകൊണ്ടുപോയത് അവരാണെന്നും ദസറ ദിനത്തിൽ പുറത്തുവിട്ട വൈകാരിക വീഡിയോ സന്ദേശത്തിൽ അദ്ദേഹം വ്യക്തമാക്കി.
ചൊവ്വാഴ്ച എക്സിൽ പങ്കുവെച്ച 16 മിനിറ്റ് ദൈർഘ്യമുള്ള വീഡിയോയിലാണ് ദീപ്കെയുടെ വെളിപ്പെടുത്തലുകൾ. ദീപാവലി വരെ സിജെപി പ്രതിഷേധപരിപാടികളൊന്നും സംഘടിപ്പിക്കാൻ ഉദ്ദേശിക്കുന്നില്ലെന്നും അദ്ദേഹം അറിയിച്ചു. പാർട്ടിയുടെ അനുയായികൾ വിശേഷിപ്പിക്കുന്ന ‘കോക്ക്റോച്ചുകൾ’ കുറച്ചുകാലം വിശ്രമിക്കണമെന്നും കുടുംബത്തോടൊപ്പം സമയം ചെലവഴിക്കണമെന്നും ദിപ്കെ അഭ്യർഥിച്ചു.
സിജെപിയുടെ നേതൃത്വത്തിൽ നടന്ന വിവിധ പ്രക്ഷോഭങ്ങൾക്ക് പിന്നിൽ പ്രവർത്തിച്ചിരുന്നത് ആരാണെന്നും ദീപ്കെ വീഡിയോയിൽ വിശദീകരിച്ചു. നീറ്റ് പരീക്ഷാ ചോദ്യപേപ്പർ ചോർച്ചയുമായി ബന്ധപ്പെട്ട വിദ്യാർഥി പ്രക്ഷോഭങ്ങൾ, ബിജെപി ഭരിക്കുന്ന സംസ്ഥാനങ്ങളിലെ സർക്കാർ സ്കൂളുകളിലെ പ്രശ്നങ്ങൾ ഉയർത്തിക്കാട്ടിയ ‘സ്കൂൾ ഠീക് കരോ’ ക്യാംപെയ്ൻ, മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ടുള്ള പ്രതിഷേധങ്ങൾ എന്നിവയെല്ലാം അദ്ദേഹം പരാമർശിച്ചു.
“ഈ പ്രസ്ഥാനത്തെ യഥാർഥത്തിൽ മുന്നോട്ടുകൊണ്ടുപോയത് ആരാണെന്ന് ചോദിച്ചാൽ അത് അശുവും സൗരവുമാണ്. രണ്ടുപേർക്കും അതിൽ വളരെ വലിയ പങ്കുണ്ട്. ഞാൻ അവരുടെ നിർദേശങ്ങൾ അനുസരിക്കുക മാത്രമാണ് ചെയ്തത്. സത്യമാണ് പറയുന്നത്,” ദിപ്കെ പറഞ്ഞു. പുറത്തുനിന്ന് നോക്കുമ്പോൾ താനാണ് നേതാവെന്ന് തോന്നാമെങ്കിലും യഥാർഥത്തിൽ തീരുമാനങ്ങൾ എടുത്തിരുന്നത് സൗരവും അശുതോഷുമാണെന്നും അദ്ദേഹം കൂട്ടിച്ചേർത്തു.
“എന്റെ ജോലി അശുവിന്റെയും സൗരവിന്റെയും നിർദേശങ്ങൾ അനുസരിക്കുക മാത്രമായിരുന്നു. നാളെ എവിടെ പോകണം, എന്തു ചെയ്യണം എന്നൊക്കെ അവർ എന്നോട് പറയും. ഞാൻ ശാന്തമായി ശരി എന്ന് പറഞ്ഞ് അത് ചെയ്യും. പുറത്തുനിന്ന് നോക്കുമ്പോൾ ഞാൻ നേതാവാണെന്ന് തോന്നിയേക്കാം. എന്നാൽ യഥാർഥ നേതാക്കൾ സൗരവും അശുവുമായിരുന്നു,” ദീപ്കെ പറഞ്ഞു.
സിജെപി സ്ഥാപിച്ചത് താനാണെങ്കിലും നിർണായക തീരുമാനങ്ങൾ എടുക്കാനുള്ള ചുമതല ഇരുവർക്കും വിട്ടുകൊടുത്തത് എന്തുകൊണ്ടാണെന്നും അദ്ദേഹം വിശദീകരിച്ചു. അവരുടെ തീരുമാനമെടുക്കാനുള്ള കഴിവ് തന്നേക്കാൾ മികച്ചതാണെന്ന് തനിക്ക് അറിയാമായിരുന്നുവെന്നായിരുന്നു ദീപ്കെയുടെ പ്രതികരണം.
“അവർക്കുള്ള കഴിവുകളും തീരുമാനമെടുക്കാനുള്ള ശേഷിയും എന്റേതിനേക്കാൾ മികച്ചതാണെന്ന് എനിക്കറിയാം. അതുകൊണ്ടാണ് അവരെ വിശ്വസിച്ചത്,” അദ്ദേഹം പറഞ്ഞു. സൗരവ് ദാസിനോടും അശുതോഷ് റങ്കയോടുമുള്ള ബന്ധം നിർദേശങ്ങൾ അനുസരിക്കുന്നതിൽ മാത്രം ഒതുങ്ങുന്നതല്ലെന്നും ദീപ്കെ വ്യക്തമാക്കി. ഇരുവരും തന്റെ സഹോദരങ്ങളും കുടുംബാംഗങ്ങളുമാണെന്ന് പറഞ്ഞ അദ്ദേഹം, അവരുടെ ജയിൽവാസം തന്നെ വൈകാരികമായി ബാധിച്ചിട്ടുണ്ടെന്നും വെളിപ്പെടുത്തി.
“ഇപ്പോൾ എനിക്ക് വൈകാരികമായി തോന്നുകയാണ്. സൗരവ് എന്റെ സഹോദരനാണ്. അശുവും എന്റെ സഹോദരനാണ്. അവർ എന്റെ കുടുംബമാണ്,” ദീപ്കെ പറഞ്ഞു. മറ്റെന്തിനേക്കാളും തനിക്ക് അവരെക്കുറിച്ച് കരുതലുണ്ടെന്നും അദ്ദേഹം കൂട്ടിച്ചേർത്തു. മൂവരും അംഗങ്ങളായിരുന്ന പ്രത്യേക വാട്സ്ആപ്പ് ഗ്രൂപ്പിനെക്കുറിച്ചും ദീപ്കെ വീഡിയോയിൽ പറഞ്ഞു. അതിൽ അവർ പരസ്പരം മീമുകൾ പങ്കുവെക്കാറുണ്ടായിരുന്നു. ഇരുവരും ജയിലിലായെങ്കിലും ഇപ്പോഴും ആ ഗ്രൂപ്പ് തുറന്നുനോക്കാറുണ്ടെന്നും അങ്ങനെ ചെയ്യുമ്പോൾ അവർ തനിക്കൊപ്പമുള്ളതായി തോന്നാറുണ്ടെന്നും അദ്ദേഹം പറഞ്ഞു. “ഇപ്പോഴും ആ ഗ്രൂപ്പ് തുറക്കുമ്പോൾ അവർ അവിടെയുണ്ടെന്ന തോന്നലാണ്,” ദീപ്കെ വ്യക്തമാക്കി.
സൗരവിന്റെയും അശുതോഷിന്റെയും കുടുംബാംഗങ്ങളാണ് ഈ പ്രയാസകരമായ സമയത്ത് തനിക്ക് കരുത്തുപകരുന്നതെന്നും അദ്ദേഹം പറഞ്ഞു. ഒക്ടോബർ 13ന് ഡൽഹിയിലെ ജന്തർ മന്തറിൽ ദേശീയ പതാക ഉയർത്താൻ ശ്രമിച്ചതിനെത്തുടർന്നാണ് സൗരവ് ദാസും അശുതോഷ് റങ്കയും ജുഡീഷ്യൽ കസ്റ്റഡിയിലായത്. പൂട്ടിയിരുന്ന ഗേറ്റ് മറികടന്ന് പ്രതിഷേധവേദിയിൽ പ്രവേശിച്ചതിലൂടെ ഇരുവരും അതിക്രമിച്ചു കയറിയെന്നാണ് പോലീസിന്റെ ആരോപണം. ഒക്ടോബർ 10ന് ഒപ്പിട്ട സമാധാന ബോണ്ട് വ്യവസ്ഥകൾ ലംഘിച്ചെന്നും അധികൃതർ ആരോപിക്കുന്നു.
ജന്തർ മന്തർ പ്രതിഷേധവേദിയായി ഉപയോഗിക്കുന്നതിനുള്ള ഔദ്യോഗിക അനുമതി പിൻവലിച്ച സാഹചര്യത്തിൽ, പോലീസ് ബാരിക്കേഡുകൾ മറികടന്ന് അകത്തുകയറിയ സിജെപി പ്രവർത്തകരുടെ സംഘത്തിലായിരുന്നു ഇരുവരും. മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഇവർ മുദ്രാവാക്യങ്ങളും മുഴക്കിയിരുന്നു. ഇരുവരുടെയും ജുഡീഷ്യൽ കസ്റ്റഡി നീട്ടിയതായി റിപ്പോർട്ടുകളുണ്ട്.
അതേസമയം, ഫ്രാൻസിൽ നടക്കുന്ന പ്രതിഷേധങ്ങളും അക്രമസംഭവങ്ങളും സിജെപി പ്രക്ഷോഭങ്ങളുമായി താരതമ്യം ചെയ്യുന്നതിനെയും ദീപ്കെ വീഡിയോയിൽ എതിർത്തു. ഫ്രാൻസിൽ സ്കൂളുകളുടെ നിലവാരവും വിദ്യാഭ്യാസ മേഖലയിലെ പ്രശ്നങ്ങളും ജീവിതച്ചെലവും ഉയർത്തിക്കാട്ടി വിദ്യാർഥികളും തൊഴിലാളി സംഘടനകളും തെരുവിലിറങ്ങിയിട്ടുണ്ട്. പാരിസ്, മാർസെയിൽ, ലിമോജ് തുടങ്ങിയ നഗരങ്ങളിൽ പ്രതിഷേധങ്ങൾക്കിടെ അക്രമവും തീവെപ്പും റിപ്പോർട്ട് ചെയ്തിരുന്നു.
ഇന്ത്യയിലെ സാഹചര്യവും ഫ്രാൻസിലെ സംഭവങ്ങളും താരതമ്യം ചെയ്യുന്നത് ശരിയല്ലെന്നായിരുന്നു ദീപ്കെയുടെ നിലപാട്. “ഇന്ത്യയിൽ എന്താണ് സംഭവിക്കുന്നതെന്ന് നോക്കൂ. സൗരവ് ദാസും അശുതോഷ് റങ്കയും ചിരിച്ചുകൊണ്ടാണ് ജയിലിലേക്ക് പോയത്. ഫ്രാൻസിൽ നടക്കുന്നതുപോലെയുള്ള ഒന്നും അവർ ചെയ്തിട്ടില്ല. നിങ്ങൾക്ക് കുറച്ചെങ്കിലും ലജ്ജയുണ്ടാകണം,” അദ്ദേഹം പറഞ്ഞു.
തങ്ങളെ അന്യായമായാണ് ജയിലിലടച്ചതെന്ന് വിശ്വസിച്ചിട്ടും സൗരവും അശുതോഷും സമാധാനത്തിന്റെയും സഹാനുഭൂതിയുടെയും പാതയാണ് തിരഞ്ഞെടുത്തതെന്ന് ദിപ്കെ അവകാശപ്പെട്ടു. ദേഷ്യമോ വിദ്വേഷമോ പ്രകടിപ്പിക്കാതെ പുഞ്ചിരിച്ചുകൊണ്ടാണ് അവർ ജയിലിലേക്ക് പോയതെന്നും അദ്ദേഹം പറഞ്ഞു. മഹാത്മാഗാന്ധിയുടെ സത്യാഗ്രഹത്തോടും അഹിംസാ സമരമാർഗത്തോടുമാണ് ദിപ്കെ ഇരുവരുടെയും നിലപാടിനെ താരതമ്യം ചെയ്തത്. ജയിലിലായിട്ടും അഹിംസയുടെ പാത ഉപേക്ഷിക്കാൻ അവർ തയ്യാറായില്ലെന്നും അദ്ദേഹം കൂട്ടിച്ചേർത്തു.
